Read Quechua Bolivia DC Bible EZEQUIEL 1 Bible Online

EZEQUIEL 1 - Quechua Bolivia DC Bible bible

EZEQUIEL 1

¹Kinsa chunka watapi, tawa kaj killampi phishqa p'unchaynimpi, llajtankumanta wijch'usqas runakunaj chaupimpi kasharqani, Quebar nisqa mayu cantopi. Chaypacha janaj pacha kicharikorqa, Diostataj mosqoypi jina rikorqani.

²Rey Joaquinta jap'ispa apasqankumanta phishqa wataña kashajtin, tawa kaj killamanta phishqa kaj p'unchaynimpi, noqa Buzej wawan sacerdote Ezequielman Señorqa parlamuwarqa caldeospa jallp'ampi, Quebar mayu cantopi. Chantá Señorqa makinta patayman churaykuwarqa.

⁴Chaypacha rikorqani wichaynejmanta uj jatun muyoj wayra jamushajta. Chantá uj jatun phuyumanta nina lauray jina llojserqa, muyuynimpitaj sinch'i k'anchay karqa. Chay nina chaupipi uj broncepis kanman jina lliphipisharqa.

⁵Kikin chay chaupipitaj tawa kausajkuna runaman rijch'akoj kasharqanku.

⁶Sapa ujninku tawa uyasniyoj, tawa lijrasniyojtaj karqanku.

⁷Cheqan chakisniyoj, chakisnintaj waka uñaj phapatusnin jina karqanku, lliphipisharqataj llosq'ochasqa bronce jina.

⁸Tawantin ladosnimpi, lijrasnin urapi runa makisniyoj karqanku; uyasnintaj tawantin ladosman qhawarisqas karqanku.

⁹Lijrasninkoqa purajmanta tinkunasqas karqanku. Purispaqa mana kutirerqankuchu, manachayqa cheqanta ñaupajllaman rerqanku.

¹⁰Chay tawa kausajkunaj uyasnin sapa ujninkojta kay jina karqa: Ñaupajnimpi kajqa runa uya, paña ladopi kajqa león uya, lloq'empi kajtaj toro uya, qhepampi kajtaj anka uya.

¹¹Iskay lijrasnin pataman oqharisqas karqanku. Chaykunataj puntapura tinkunasqas karqanku, iskaywantaj ukhusninta qhataykorqanku.

¹²Sapa uj cheqanta ñaupajman purerqanku mana qhepaman kutirispa, Espíritu maymanchá pusarqa chayman.

¹³Chay kausajkunaqa nina tisi k'ajarishajman rijch'akorqanku, chayri k'anchaykunaman rijch'akoj, risharqanku, jamusharqankutaj paykunaj chaupinkupi. Ninaqa k'anchashaj karqa, nina chaupimantataj chhispas phawarisharqanku.

¹⁴Chay kausajkunataj kayman jaqayman usqhay usqhayta correykacharqanku lliuj lliujpis kankuman jina.

¹⁵Qhawarerqani, repararqanitaj chay kausajkunaj sapa ujpa ladompi pampapi uj rueda kasqanta.

¹⁶Tawantin ruedasqa uj rej ruwasqalla karqanku, topacio rumi jinataj lliphipisharqanku. Rijch'akullarqataj sapa uj ruedaj chaupimpi uj ruedapis kanman jina.

¹⁷Purispaqa tawantin ladoman muyurillaj kanku mana tijrakuspa.

¹⁸Tawantimpata muyusninkoqa jatuchaj karqanku. Sapa ruedataj lliphipej ñawiswan tukuy muyuyninkupi junt'as karqanku.

¹⁹Chay kausayniyojkuna purejtinkoqa, ruedaspis oqharikullarqankutaj paykunawan khuska. Paykuna pampamanta pataman oqharikojtinku, ruedaspis oqharikullarqankutaj.

²⁰Chay kausajkunata maymanchus Diospa atiynin puriricherqa, chaynejllamantaj ruedaspis purirerqanku paykunawan khuska, imaraykuchus ruedasqa kikin chay kausajkunapi kasharqanka.

²¹Kausajkuna purejtinkoqa, ruedaspis purillarqankutaj. Paykuna sayapojtinku, ruedaspis sayallarqankutaj. Chay kausajkuna pampamanta pataman oqharikojtinkoqa, ruedaspis pataman oqharikullarqankutaj paykunaj qhepanta, imaraykuchus ruedasqa kausajkunapi karqanku.

²²Chay kausajkunaj umanku patapitaj lliphipej cristal jina llanthuwan qhatasqa jina rikukorqa.

²³Kay llanthuchaj urampi chay kausajkunaj lijrasninkoqa cheqanman aysarisqas karqanku, ujkunaqa ujkunawan tinkunasqas, sapa ujninku iskay lijrasninkuwan ukhunkuta qhatarqanku.

²⁴Uyarerqanitaj purejtinku lijrasninkoj sonayninta: Manchay ashkha yakoj sonayninta jina, chayri Tukuy Atiyniyojpa qhaparisqanta jina, manachayri ashkha soldadospa ch'ajwayninta jina. Sayaspataj lijrasninkuta uraykucherqanku.

²⁵Sayaspa lijrasninkuta uraykuchejtinku llanthucha patamanta uj sonay llojserqa.

²⁶Chay llanthuchaj patampitaj uj tronota jina rikorqani, zafiro rumimanta ruwasqaman rijch'akojta, chay tronopitaj uj runaman rijch'akoj tiyarisqa kashajta.

²⁷Chay runaman rijch'akojpata ñañu wasanmanta pataman llosq'osqa bronceta jina rikorqani lliphipishajta, ninawan muyuykusqatataj. Ñañu wasanmanta uramantaj ninata jina rikorqani. K'anchaywan muyuykusqataj karqa.

²⁸Imaynatachus k'uychi phuyus chaupipi p'unchay paramojtin rikhurin, ajina muyuynimpi karqa. Kay jinamanta Señorpa jatun kaynenqa mosqoypi jina rikhuriwarqa. Chay jinata rikuspa, pampakama k'umuykorqani. Chay rato uj parlamojta uyarerqani.