Read Quechua Bolivia DC Bible EZEQUIEL 10 Bible Online

EZEQUIEL 10 - Quechua Bolivia DC Bible bible

EZEQUIEL 10

¹Qhawarispa rikorqani, querubinespa patampi k'umpasqa toldoina karqa, chay patapitaj zafiromanta trono jina rikhurerqa.

²Señortaj linomanta p'achayoj runaman nerqa: Carroj ruedasnimpi chaupinman yaykuy, querubinespa uranman. Chay querubines chaupimantataj nina k'ajajta jich'irikuspa llajta pataman qhallarpariy. Qhawashajtiy chay runa yaykorqa.

³Chay ratopi querubinesqa Diosta yupaychana wasej paña ladompi kasharqa. Ukhu kaj patioman phuyu junt'aykorqa.

⁴Chantá Señorpa k'anchaynenqa querubinespa patanmanta, Diosta yupaychana wasiman yaykuna chaynejman purirerqa. Phuyutaj Diosta yupaychana wasiman junt'aykorqa. Señorpa k'anchaynintaj patio junt'ata k'anchaykorqa.

⁵Querubinespa lijrasnimpa sonaynintaj jawa patioman uyarikorqa. Tukuy Atiyniyoj Diospis parlashanman jina karqa.

⁶Chantá linomanta p'achayoj runata Señorqa kamacherqa, ruedas chaupipi kaj querubinespa chaupinmanta ninata oqharimunanta. Chay runataj rispa ruedas qayllapi sayarqa.

⁷Ujnin querubintaj makinta aysarispa, paykuna chaupipi kasharqa chay ninamanta uj chhikanta oqharispa, linomanta p'achayoj runaj makisninman churaykorqa, chay runataj ninata jap'iytawan llojsiporqa.

⁸Chaypacha noqa allinta repararqani querubinespa lijrasnin uramanta runaj makin jina rikhurimushajta.

⁹Querubines chaynejpi rikorqani tawa ruedasta, sapa ruedas uj querubinwan khuskata. Ruedasqa topacio rumi jina lliphipisharqanku.

¹⁰Chay tawantin ruedasqa uj rejlla karqanku, rijch'akorqankutaj uj ruedaqa uj ruedaj chaupimpipis kashankuman jina.

¹¹Chay querubinesqa purispa, mayqenchá paykunamanta ñaupajman purerqanku chayta tukuyninku qhatirerqanku. Mana kutirinankuchu karqa, manachayqa maymanchus chay tawantinmanta ujnin kaj ladoman purirejtin mana kutirinankuchu karqa chayllamantaj mana kutirispa purirerqanku.

¹²Cuerposninku, wasasninku, makisninku, lijrasninkupis ñawiswan junt'a karqanku, jinallataj tawantin ruedaspis.

¹³Noqallataj uyarerqani ruedastaqa carro nispa sutichashajta.

¹⁴Sapa querubín tawa uyayoj karqa: Ñaupaj uyanqa toroj uyan, iskay kajqa runaj uyan, kinsa kajqa león uya, tawa kajtaj ankaj uyan karqa.

¹⁵Querubinestaj jatarerqanku chaykunaqa, Quebar nisqa mayupi rikorqani chaykunallataj karqanku.

¹⁶Querubines purirejtinkoqa ruedaspis paykunawan khuska puririllarqankutaj. Querubines pampamanta jatarinapaj lijrasninkuta oqharejtinku, ruedasqa paykunamanta mana kacharikorqankuchu.

¹⁷Querubines kikimpi sayajtinkoqa, ruedaspis sayallarqankutaj; jatarejtinkutaj ruedaspis jatarillarqankutaj, imaraykuchus querubinespa kausaynin paykunapi karqa.

¹⁸Chantá Señorpa k'anchaynin Diosta yupaychana wasi patamanta oqharikorqa, querubines patapitaj sayarqa.

¹⁹Querubinesqa lijrasninkuta oqharispa, pampamanta pataman phawarerqanku qhawashajtillayraj, ruedaspis paykunawan khuskallataj llojserqanku. Sayarqankutaj Señorpata wasimpa inti llojsimuynin lado punkumpi. Israelpa Diosnimpa k'anchaynin paykunaj patankupi kasharqa.

²⁰Kay kausayniyojkunallatataj Israelpa Diosnimpa urampi rikorqani, Quebar nisqa mayu cantopi, querubines kasqankuta rejserqanipuni.

²¹Sapa ujninku tawa uyasniyoj, tawa lijrasniyojtaj karqanku. Lijrasninku uramantataj runaj makin jina makisniyoj rikhurimusharqa.

²²Uyasninkuta Quebar mayu chaypi rikorqani chaykunaman rijch'akorqanku. Sapa ujtaj cheqanta ñaupajman rerqanku.