Read Quechua Bolivia DC Bible EZEQUIEL 14 Bible Online

EZEQUIEL 14 - Quechua Bolivia DC Bible bible

EZEQUIEL 14

¹Israelpa kuraj runasninmanta wakin noqata watukoj jamorqanku ñaupaqeypitaj tiyarikorqanku.

²Señortaj parlamuwarqa, niwarqataj: Runa, kay runasqa lanti yupaychanaman churakunku, mayta yupaychanku. Imaschus juchaman urmachin chaykunallapi yuyashanku. Saqesajchu imallatapis tapurikunawankuta?

⁴Paykunaman noqamanta kay jinata parlay: Israel ayllumanta kajkuna, pillapis tukuy sonqonwan lantisninta yupaychanman, juchaman urmachej imasllapitaj yuyayninta churanman; chantá profetaman tapurikoj jamunman chayqa, noqa payman kutichisaj mashkhachus lantisnin kasqanman jina. Lantisninkurayku noqamanta karunchakoj tukuy israelitaspa sonqonkuta noqa t'ojpirisaj.

⁶Chayrayku Israel aylluman niy: Señorman kutiriychej, nispa. Lantisninkuta saqechunku, millachikunapaj jina imastawan.

⁷Pi runallapis Israel ayllumanta, chayri waj llajtamanta kaj Israelpi tiyakuspa, noqamanta karunchakuspa lantita yupaychaspa paykunata juchaman urmachej imaspi yuyashaspa, uj profetanejta tapurikuwanman chayqa, noqa kikiy kutichisaj: Noqa chay runaj contrampi sayarisaj, tukuy rikunampaj jina jasut'isaj, tukuy runas paykunamanta parlakunankupaj jina. Aylluymantataj paykunata qharqosaj. Chaypacha qankuna rejsiwankichej noqa Señor kasqayta.

⁹Sichus uj profeta llullata parlanqa chayqa, noqa chay profetata ch'aukiyarqani. Makiyta oqharisaj payta jasut'inaypaj, Israel ayllumantataj chinkachisaj.

¹⁰Tapurikoj runa, jinallataj profetapis iskayninku juchankumanta ujllapi jasut'isqas kanqanku.

¹¹Ajinamanta Israel aylloqa ama jayk'ajpis noqamanta t'aqakunampaj, amataj runata wañurachispa ch'ichichanankupaj. Paykuna aylluy kanqanku, noqataj paykunaj Diosninku kasaj. Noqa Señormin kaytaqa nini.

¹²Señorqa parlamuwarqa, niwarqataj: Sichus uj llajta mana kasuta ruwawaspa contrayta juchallikun chayqa, noqa contranta oqharikusaj jasut'inaypaj. Mikhuna tantakusqankuta qhechusaj, yarqhayta chay llajtaman apachimusaj, wañurachisajtaj runasta angelestawan.

¹⁴Kay kinsa runaschus chay llajtapi kashankuman Noé, Daniel, Job ima chayqa, paykunalla kinsantinku salvasqas kankuman cheqa runas kasqankurayku. Noqa Señormin chayta nini.

¹⁵Sichus uj llajtaman millay animalesta kachaykamuyman chaypi tiyakojkunata wañurachinampaj, ch'inman tukuchinankama, nitaj pipis chayninta pasayta atinampaj jina chay millay animalesta manchachikuspa.

¹⁶Chay kinsa runaschus chay llajtapi tiyakushankuman chaypis, manapuni wawasnillankutapis salvayta atinkumanchu, nitaj warmi wawasninkutapis, paykunalla salvasqas kankuman. Llajtarí ch'inman tukuchisqa kanman. Noqa Señormin kausayniyrayku jurani.

¹⁷Sichus chay nacionman ch'ajwata chayachimuyman, kamachiymantaj runas, jinallataj animalespis wañuranankuta. Chay kinsa runas chaypi kausashankuman chaypis, manapuni salvayta atinkumanchu, qhari wawasninkuta, nitaj warmi wawasninkutapis, paykunalla kinsantinku salvakunkuman. Noqa Señormin kausayniyrayku jurani.

¹⁹Chay llajtamanchus onqoykunata chayachimuyman, phiñakuyniypitaj wañuyta tarpuyman, wañurachiymantaj runasta animalestawan.

²⁰Chaypitajchus Noé, Daniel, Job ima tiyakushankuman chaypis, mana salvayta atinkumanchu, qhari wawasninta, nitaj warmi wawasnintapis. Paykunalla cheqa runas kasqankurayku salvakunkuman. Noqa Señormin kausayniyrayku jurani.

²¹Noqa Señormin nini: Aswanraj kanqa maypachachus noqa tawantin sinch'i jasut'iyniyta Jerusalenman apachimojtiy. Ch'ajwata, yarqhayta, millay animalesta, onqoykunata ima, runata, uywasta ima wañurachinampaj.

²²Chaymanta pisilla kausashaj qhepakonqanku, qhari wawasninkuwan, warmi wawasninkuwan llojsiyta atenqankutaj. Qankunajman paykuna jamusojtinkutaj qankuna rikunkichej, imaynatachus kasqankuta, imastatajchus ruwasqankuta. Chantá kusikunkichej Jerusalenman jasut'ita apachimusqaymanta.

²³Kusikunkichej paykunaj puriyninkuta ruwasqasninkuwan rikuspa. Chaypacha yachankichej imajtinchus Jerusalempi chay tukuy imasta ruwasqayta. Noqa Señor kaytaqa nini.