Read Quechua Bolivia DC Bible EZEQUIEL 16 Bible Online

EZEQUIEL 16 - Quechua Bolivia DC Bible bible

EZEQUIEL 16

¹Señorqa parlamuwaspa niwarqa: Qan runa, Jerusalenman chay jina millay imasta munasqanta rikuchiy.

³Kay jinata Jerusalenmanta nin Señorqa: Rikhuriyniykeqa, nacekuyniykipis Canaán jallp'api karqa. Tataykeqa amorreosmanta karqa, mamaykita hitita karqa.

⁴Nacekorqanki chay punchaypeqa, kururuykita mana khuchusorqankuchu, yakuwan mana mayllasorqankuchu, mana kachiwan chhallusorqankuchu, nitaj waltha chumpiwan k'irusorqankuchu.

⁵Ni pi qanmanta khuyakususqachu, nitaj dakorqachu chay imasta qanrayku ruwananmanta. Nacekorqanki chay p'unchayqa, pampapi wijch'usqata saqesorqanku. Qanmanta millachikusorqanku.

⁶Noqataj maypichus kasharqanki chaynejta pasashaspa, kikin yawarniykipi wat'aqeyashajta rikorqayki nerqaykitaj: Kausay yawarniyki jich'akushasojtimpis kausakuypuni.

⁷Pampa qhorasta jina wiñacherqayki. Jatunman wiñarqanki, may k'acha warmipuni kanaykikama. Chuchusniykipis wiñarisorqaña. Pelosniykipis wiñaykusorqanku. Chaywampis mana ima p'achayoj q'alalla sayasharqanki.

⁸Maypichus kasharqanki chayninta ujtawan pasallarqanitaj, chaypachataj qhawarerqayki, munakunapaj jina kasharqanki. P'achaywantaj tukuy q'ala ukhuykita qhataykorqayki. Qanta parlapayarqayki, uj tratota qanwan ruwarqani, noqajtataj karqanki. Noqa Señormin chaytaqa nini.

⁹Yakuwan mayllarqayki, yawarniykita picharqani, chantá k'acha q'apaj aceitewantaj jawerqayki.

¹⁰Tukuy laya coloreswan k'achanchasqa p'achata churarqayki, sinch'i qaramanta ruwasqa ujut'awan. Chumpillicherqayki linomanta awasqa chumpiwan, seda p'achawantaj qhataykorqayki.

¹¹Mayta qori imaswan k'achancharqayki. Makiykiman jatun sortejata churarqayki, kunkaykimantaj walqata walqaykucherqayki.

¹²Senqaykiman uj sortejata churaykorqayki, ningrisniykimantaj zarcillota, umaykimantaj uj k'acha pilluta churarqayki.

¹³Ajina, qolqewan, qoriwantaj k'achanchasqa karqanki. P'achasniykeqa linomanta, sedamanta ima karqa, may sumaj coloreswan sirasqastaj. Mikhorqanki trigomanta jak'usqa yuraj jak'uta, misk'iyojta, olivomanta kaj aceiteyojtaj. Manchay k'achanchasqa karqanki, uj reina jinataj llojserqanki.

¹⁴Chay jina k'acha kasqaykimantaqa tukuy nacionespi yacharqanku, imaraykuchus tukuy imawan junt'asqa karqanki, tukuy k'acha imasniywan k'achanchasusqayrayku. Noqa Señormin kaytaqa nini.

¹⁵Chay jina k'acha kasqaykiman atienekorqanki, tukuy runas k'acha kasqaykita yachasqankuraykutaj uj phisu warmiman tukorqanki. Ukhuykitataj tukuy purej qharisman jaywarqanki.

¹⁶P'achasniykiwantaj lomaspi tukuy laya yupaychana toldosta ruwakorqanki, chaykunapitaj qhenchachakorqanki.

¹⁷Noqa qorqayki qorista, qolqetawan, chaykunamanta runaman rijch'akojkunata ruwakorqanki, chaykunawantaj qhenchachakorqanki.

¹⁸K'acha tukuy laya coloreswantaj ruwasqa p'achasniykita chaykunaman churarqanki, aceiteyta, inciensoytawan jaywarqanki.

¹⁹Sumaj kaj jak'umanta ruwasqa t'antayta jaywarqayki, aceiteta, misk'itawan ima, mikhucherqayki, chaykunata qan lantikunaman jaywarqanki may sumaj q'apaj jaywanata jina. Noqa Señormin chaytaqa nini.

²⁰Jinallataj qampi qhari wawas, warmi wawaspis tiyapuwarqa, chaykunata lantisman qaraykorqanki. Pisipajchu qhenchachakusqasniykitaqa jap'erqanki?

²¹Chantapis pisichu karqa wawasniyta lantisman rikuchikuta jina ninapi laurashajta jaywarasqaykeqa?

²²Chhika millay kausayniykiwan ujwan ujwantaj qhenchachakusqaykiwan ima, manaña yuyarikunkichu wawa kasqaykimantaqa, mana p'achayoj q'alalla kasqaykitapis, nitaj kikin yawarniykipi nacespa sunt'isqaykitapis.

²³Chayta noqa Señorqa nini: Way, way qanmanta! Tukuy sajra imasta ruwasqasniykimanta qhepata, tukuynin ch'usaj cheqaspi uj altarta ruwakorqanki lantista yupaychanaykipaj.

²⁴

²⁵Jatun ñankunapi chay jinata ruwakorqanki. K'acha kayniykitataj millayman tukucherqanki, tukuy chaynejta rejkunaman ukhuykita jaywarqanki, sapa kutitataj qhenchachakorqanki.

²⁶Qayllaykipi kajkunawan mayta qhenchachakorqanki, chay jina q'oñirisqa egipcioswan. Sapa kuti qhenchachakusqaykiwan phiñachiwanki.

²⁷Chay jinamanta jasut'isunaypaj makiyta oqharerqani. Mikhunasniykita pisiyacherqani. Filisteoswantaj jap'icherqayki. Paykunaqa chejnikusunku, millay puriyniykimantataj p'enqakunku.

²⁸Chaywan mana sajsakuspataj asirioswanñataj qhenchachakorqanki, chaywampis nillataj sajsakorqankichu.

²⁹Babiloniapipis qhatojkunaj jallp'ankupi qhenchachakullarqankitaj. Chaywampis manapuni sajsakorqankichu.

³⁰Noqa Señormin cheqamanta nini: Sonqoyki onqosqa karqa. Chayrayku qhencha warmi jina, mana p'enqakuspa pureranki.

³¹Tukuy jatun ñan pataspi, tukuy ch'usaj cheqaspi altarkunata ruwakorqanki, lantista yupaychanaykipaj. Mana qhencha warmimanchu rijch'akorqanki. Qanqa mana pagachikorqankichoqa.

³²Qosanta wasanchaj warmeqa, waj qhariswan purin.

³³Tukuy qhencha warmismanqa t'inkata qonku, qantajrí tukuy munapayasojkunaman t'inkata qorqanki, pagarqankitaj tukuynejmanta qanwan juchallej jamunankupaj.

³⁴Qhenchachakuyniykipeqa, waj warmikunamanta nisqaqa waj jinata ruwanki. Mana pipis mask'asunkuchu qanwan juchallinankupajqa, astawampis qan paykunaman paganki. Chayllapi qanqa waj jina kanki.

³⁵Chayrayku, qhencha warmi, palabrayta uyariy: Noqa Señor qanta niyki: Qanta mana p'enqakuspa ukhuykita q'alakunki munapayasojkunawan kanaykipaj, jinataj millay lantisniykiwan ima. Wawasniykej yawarnintataj jich'arqanki, paykunaman rikuchikuta jina jaywanaykipaj.

³⁶

³⁷Chayrayku, pistachus munakorqanki chay tukuyta noqa tantaykusaj. Jinallataj pikunatachus munakorqanki, chanta pikunatachus chejnikorqanki chay tukuyta. Paykunataqa muyuyniykiman tantaykusaj. Paykunaj rikunantataj q'alasqayki, paykuna q'alallata qhawasunankupaj.

³⁸Casarakuspaña waj qhariwan qhenchachakoj warmita jina jasut'isqayki, runa wañuchista jinataj. Phiñakuywan, tumpaywantaj wañuchichisqayki.

³⁹Paykunaj makinman saqesqayki, qhenchachakunayki cheqasta, lantista yupaychanayki cheqastawan thuñiykunankupaj. Chantá p'achasniykita lluch'usonqanku walqasniykita ima qhechususpa, q'alallata saqerpayasonqanku.

⁴⁰Ashkha runas contraykipi oqharikonqanku. Rumiswan ch'anqasuspa, cuchillosninkuwan ima t'ojsisuspataj wañuchisonqanku.

⁴¹Wasisniykitapis ninawan kanaykonqanku. Ashkha warmispa ñaupaqempitaj qanta juchachasonqanku. Ajinapitaj qhenchachakuypi purinaykita tukuchisaj, manañataj ujtawampis tiyapususqantaqa qhenchachakuspa pagankichu.

⁴²Chaypachataj phiñakuyniyta qampi thasnusaj, tumpasunaypis manaña kanqachu. Samarikusaj, manañataj astawampis phiñakusajchu.

⁴³Sipas kasqaykimanta qonqakaporqanki sajra imasta ruwaspa, millay juchapi purispataj phiñachiwarqanki. Chayrayku, noqaqa chay purisqaykiman jina jasut'isqayki. Manapuni yuyarqankichu manchayta k'achanchakusqaykimantapis. Noqa Señormin chaytaqa nini.

⁴⁴Uj parlay tiyan. Chay parlaywan, tukuy ajinata parlajkunaqa nisonqanku: Mamampuni ajina karqa, kikillantaj wawampis.

⁴⁵Mamaykeqa qosanta wawasnintawan chejnikorqa. Qantaj paypa wawan kanki. Ñañasniykipis jinallataj, qosasninkuta, wawasninkutawan chejnikorqanku. Mamaykeqa hititamanta karqa.

⁴⁶Samaria nisqa llajta kuraj ñañaykeqa wichaynejpi kasharqa, ranchosnimpiwan ima. Sodoma nisqa llajta sullk'a ñañaykitaj uranejpi kasharqa, ranchosnimpiwan ima.

⁴⁷Qantaj mana paykuna jinallapis purerqankichu, nitaj paykuna jina purisqasniykiwampis contentakuspa aswan millayta purerqanki.

⁴⁸Noqa Señor kausayniyrayku jurani Sodoma ñañaykeqa ranchosnimpis mana ruwankuchu, qampa ruwasqasniyki jinatapuneqa, nitaj ranchosniykej ruwasqasninta jinapis.

⁴⁹Sodoma ñañaykej juchanqa kay jina karqa: Payqa, jinataj ranchosnimpis jatunchakorqanku, wapuykacharqankutaj ashkha mikhunayoj kaspa, allin imaswan junt'asqa kausakusqankurayku, manataj wajchasman, ni pisichikojkunatapis yanaparqankuchu.

⁵⁰May wapusman tukorqanku, millay imastataj ñaupaqeypi ruwarqanku, chayrayku paykunata rikunaykita t'unaykorqani.

⁵¹Samaria llajtaqa mana khuskallantapis juchallinchu qampa juchallisqaykita jinaqa. Qanqa aswan millay imasta ruwarqanki paykunamanta nisqaqa. Chay chhikatapuni juchallisqaykirayku, paykunaqa ladoykipi mana juchayojpis kankuman jina rikhurinku.

⁵²Qan, ñak'ariy ari k'umuykachaspa. Ñañasniykimanta nisqaqa aswan millay juchastaraj ruwarqanki, paykuna mana juchayojpis kankuman jina rikhurinankukama. Chay p'enqayta qan apanayki tiyan, imaraykuchus ñañasniykita mana juchayojta rikhurichinki.

⁵³Sodoma llajtata, chantá Samaria llajtata imaqa mana allin kausayman kutirichipusaj, jinallataj ranchosnintapis. Qanmampis allin kausayta kutichipusqayki ujtawan, jap'isqa kajkunata kutichimpuspa.

⁵⁴Chaypachataj k'umuykuspa ñak'arinayki tiyan, p'enqakunaykitaj tiyan tukuy ima ruwasqasniykimanta. Chaywan paykunata kusichinaykipaj.

⁵⁵Maypachachus Sodoma, Samariapis, jinallataj juch'uy llajtasnin ima, imaynachus ñaupajta karqanku chay jinaman tukonqa, chaypacha qanqa, jinallataj juch'uy llajtasniykipis, imaynachus ñaupajta karqankichej, chay kikillanmantaj tukupunkichej.

⁵⁶Sodoma ñañaykimanta qanqa asiykukorqanki wapuykachasharqanki chaypacha.

⁵⁷Sajra ruwasqasniykeqa manaraj sut'inchakusharqachu, kunantaj edomita llajtakuna, filisteo llajtakuna ima, tukuy qayllaykipi kajkunawan sajrata qanmanta parlanku, tukuynin runastaj chejnikusunku.

⁵⁸Kunanqa mana allin purisqasniykimanta, millay ruwasqasniykimantawan jasut'ita jap'ikunayki tiyan. Noqa Señormin chaytaqa nini.

⁵⁹Noqa Señormin nini: Ruwasqasniykiman jina qosqayki. Qanqa juramento ruwasqasniykita pak'erqanki, manataj trato ruwasqaykita junt'arqankichu.

⁶⁰Noqataj sipas kashajtiyki qanwan tratota ruwasqayta yuyarikusaj, chantá uj tratota qanwan wiñaypaj ruwasaj.

⁶¹Yuyarikunkitaj purisqasniykimanta, penqakunkitaj kuraj ñañasniykita, sullk'asniykitapis wawasniyki kanampaj qosqayki chaypacha, manataj qanwan tratota ruwasqaymantachu.

⁶²Noqa qanwan tratoyta mosojyachisaj. Chantá yachanki noqa Señor kasqayta.

⁶³Qantaj yuyarikuspa may chhikata p'enqakunki, k'umuykunkitaj, simiykitapis mana ujtawan kicharinkichu, maypachachus noqa tukuy ima ruwasqasniykimanta perdonasqayki chaypacha. Noqa Señor chaytaqa nini.