Read Quechua Bolivia DC Bible EZEQUIEL 18 Bible Online

EZEQUIEL 18 - Quechua Bolivia DC Bible bible

EZEQUIEL 18

¹Señor parlamuwarqa niwarqataj: Imatá qankuna yuyankichejri, chay nisqaymanta, mayqentachus Israel jallp'api sapa kuti nishanku: Tatasqa k'allku uvasta mikhunku, wawaspis kirusninkuta chañachikunku, nispa?

³Noqa Señor kausayniyrayku jurani: Amaña jayk'ajpis Israelpi chay niytaqa parlankichu.

⁴Noqajtamin tukuynin runasqa, tatas kajpis, jinallatataj wawaspis, pillapis juchallejqa wañonqa.

⁵Cheqan kaj runaqa cheqa kajta ruwan, manataj pantanchu:

⁶Lomaspi lanti yupaychana cheqaspi mana jatun mikhunasta ruwaysikunchu lantista yupaychanpaj, nitaj Israelpa llulla dioskunasninkupi atienekunchu. Runa masimpa warminta mana qhechunchu, warmin killa yawarnimpi kashajtin mana qayllanchu.

⁷Mana pitapis ñak'arichinchu, manunman prenda saqesqanta qopun, mana pimantapis suwanchu, yarqhachikojman t'antata qon, mana p'achayojmantaj pachallichin.

⁸Mañarispaqa mana qolqen mirayniyoj kanampajchu qon, nitaj kurajtachu orqhon, mana cheqa kaj ruwaymanta t'aqakun, astawampis cheqa kajwampuni runa masisninta cheqanchan.

⁹Kamachisqasninman jina purin, waqaychanta kamachiyniykunata maychus kajta ruwanampaj, cheqanta imatapis ruwanampaj. Kaymin cheqan runaqa, pay kausanqa. Noqa Señor kaytaqa nini.

¹⁰Sichus kay runaj wawan suwakuspa juchallinman, runasta wañuchinman, kay juchasmanta mayqellantapis ruwanman, manataj wajpi juchallikunmanchu, manachayqa, lomaspi mikhumunman, runa masimpa warminwan qhenchachakunman.

¹²Wajchasta mana tiyapuyniyojkunata ima ñak'arichinman, suwakunman, prenda qosqata mana kutichipunmanchu, lantistapis yupaychanan, millay imastataj ruwanman, manuspaqa qolqempa miraynintawan mañakapunman chayqa, chay runaqa mana kausanqachu, chay tukuy juchasta ruwasqanmanta. Payqa cheqamanta wañonqa, yawarnintaj paypa patampi kanqa.

¹⁴Chay juchachakoj runajtachus wawan kallanmantaj chayqa, tatampa tukuy juchallisqanta rikushaspapis, mana yachaqakunmanchu.

¹⁵Lomas patapi mana mikhunmanchu, Israel aylloj llulla dioskunasninkuta mana qhawarinmanchu, runa masimpa warminwan mana qhenchachakunmanchu; mana pitapis ñak'arichinmanchu, prenda jap'isqantapis mana jap'ikapunmanchu. Yarqhayniyojman mikhunanmanta qorinman, mana p'achayojman p'achallichinman, mana cheqa kaj runamanta t'aqakunman, manuspaqa mana qolqempa mirayninmanta orqhonmanchu, nitaj aswan kurajtachu mañakapunman. Kamachiyniykunata waqaychanqa, kamachisqasniyman jinataj purenqa, chay wawaqa tatampa juchasninmantaqa mana wañonqachu, aswampis kausanqa.

¹⁸Tatanrí runa masinta ñak'aricherqa, suwakorqa, aylluy ukhupi mana allin imasta ruwarqa. Chayrayku payqa kikin juchasninmanta wañonqa.

¹⁹Qankuna tapurikunkichejchá: Imaraykutaj wawaqa tatampa juchasninmanta mana paganmanchuri? Imaraykuchus wawaqa maychus kajta, cheqanta ruwarqa. Tukuy leyesniyta waqaycharqa, junt'arqataj. Chayrayku payqa kausanqa.

²⁰Pichus juchallikoj runaqa wañonqa. Wawaqa tatampa juchanmanta mana paganqachu, nitaj tatapis wawampa juchanmanta. Cheqamanta kausaj runaqa cheqa ruwasqanmanta t'inkata jap'ikaponqa. Sajra kausayniyoj runataj sajra ruwasqanmanta ñak'ariyta jap'ikaponqa.

²¹Sajra kausayniyoj runachus tukuy juchallikuyninmanta t'aqakuspa kutirimponqa kamachisqasniyta junt'aspa, cheqan kajta, maychus kajtataj ruwanqa chayqa, cheqamanta kausanqa, manataj wañonqachu.

²²Noqataj tukuy juchallikusqanmanta mana yuyarikusajchu. Payqa kausanqa cheqan kajta ruwasqanrayku.

²³Mana noqa munanichu juchasapa runa wañunanta, manachayqa kutirimpunanta munani, kausanantataj. Noqa Señor kaytaqa nini.

²⁴Cheqampi kausaj runachus, cheqa kaj ruwayninta saqespa sajra kausayniyoj runaj tukuy juchallikuynimpi purenqa, millay imata ruwaykunasninta ruwaspataj chayqa, yuyankichejchu chay runa kausanallantapuni? Noqaqa mana yuyarisajchu tukuy allin kajta ruwasqasnintaqa. Noqaqa wasanchawasqanrayku, juchallikusqasninraykutaj payqa wañonqa.

²⁵Qankuna niwankichej mana cheqa kajta ruwashasqayta. Israel ayllu, uyariway kunanqa: Manachu allinta ruwashani? Aswampis qankunaj ruwasqasniykichejraj mana allinchu.

²⁶Cheqanta purej runachus sajra kajta ruwanqa allin kaj ruwayta saqespa chayqa, juchampi wañonqa sajra imasta ruwasqanrayku.

²⁷Sajra runachus juchallikuyninmanta t'aqakuspa, cheqa kajta, maychus allin kajtataj ruwanqa chayqa, kausanqa.

²⁸Allinta qhawarikuspa tukuy sajra ruwasqasninmanta t'aqakun chayqa, cheqamanta kausanqa, manataj wañonqachu.

²⁹Israel aylloqa niwanqa, noqaj ruwasqayqa mana cheqanchu kasqanta. Israel, ruwasqasneyqa manachu cheqan kanku? Astawampis Israel aylloj ruwasqasnenqa mana cheqanchu kashan.

³⁰Chayrayku, Israel ayllu, sapa ujta purisqaykichejman jina cheqanchasqayki chej. Noqa Señor chayta nini. Ujkama sajra ruwaykunata saqepuychej, kutirimpuychejtaj, ajinamanta ama sajra kausayniykichej llakiyta apamunampaj.

³¹Contraypi tukuy sajra ruwasqasniykichejmanta t'aqakuychej, mosoj sonqoyojman tukuychej, mosoj espirituyojmantaj. Israel ayllu, imaraykutaj wañuwajri?

³²Mana noqaqa ni pi wañunanta munanichu. Sajra kajmanta t'aqakuychej, chantaqa kausankichej. Noqa Señor kaytaqa nini.