Read Quechua Bolivia DC Bible EZEQUIEL 19 Bible Online

EZEQUIEL 19 - Quechua Bolivia DC Bible bible

EZEQUIEL 19

¹Qanqa runa, Israel aylloj reyesnimpaj kay aya p'ampay takiyta takipuy:

²Mamaykeqa china león karqa. Orqo leones chaupipi kausakorqa, jusk'uta ruwakuspa juch'uy uñitasninta uywakorqa.

³Ujnin uñantataj jatunyanankama uywarqa. Jap'iytataj yachaykorqa, runasta ima mikhuyta yachaykorqa.

⁴Chay jallp'asmanta kaj runastaj chay leonmanta parlajta uyarispa, uj tojllapi jap'iykorqanku, cadenaswan wataykuspataj, Egiptokama qhatatispa aparqanku.

⁵Mama leontaj chayta rikuspa, may llakisqa qhepakorqa. Chanta ujnin uñantañataj jatunyanankama wiñarqocherqa.

⁶Chay kajpis jatuchaj leones chaupipi rerqa jamorqataj. Jap'iyta yachaykorqa, runastataj mikhorqa.

⁷Palaciospi t'unaykuspa llajtasta ch'inyacherqa. Qhapariyninwantaj tukuyta kharkatiticherqa.

⁸Chaypacha paypa contranta jatarerqanku, qayllampi kaj tukuynin jallp'aspi kaj runas, ch'ipaswan choqaspa jap'erqanku.

⁹Ganchoswan wisq'aykorqanku, chantá Babiloniapi kaj reyman aparqanku. Chaypitaj wisq'aykorqanku, amaña qhaparisqan Israel orqospi uyarikunampaj.

¹⁰Mamaykeqa uj uvas sach'aman rijch'akorqa, yaku cantopi plantasqa, sumaj poqoj sach'a ashkha q'omer laphisniyoj, ashkha yakuyoj kasqanrayku.

¹¹Ramasnintaj may sinch'ita rakhuyarqanku reyespa tojnusnimpaj kanankama, maytapuni wiñarqa, phuyusta taripanankama. Tukuy sach'asmanta llojsisqa karqa, chhika jatumpuni, ashkha q'omer ramasniyojtaj.

¹²Phiñakuywan sik'isqa karqa, pampamantaj wijch'orqanku. Inti llojsimuynejmanta wayra wayramuspa ch'akicherqa, uvasnintaj ch'akiraporqanku, chay sinch'i ramasnimpis ch'akiraporqanku, ninamantaj choqaykorqanku.

¹³Kunanqa ch'in pampapi plantasqa kashan, ch'aki jallp'api, mana poqojpi.

¹⁴Ramasninmanta nina llojsimun, chaytaj q'omer ramasninta ch'akiykuchipun, jinallataj poqoynintapis. Manaña sinch'i ramasnin kanchu reyespa tojnusnimpajqa. Kay takeyqa aya p'ampanapaj takiy karqa.