Read Quechua Bolivia DC Bible EZEQUIEL 20 Bible Online

EZEQUIEL 20 - Quechua Bolivia DC Bible bible

EZEQUIEL 20

¹Qanchis kaj watapi, phishqa killamanta chunka p'unchay kashajtin, Israelpa kuraj runasninmanta wakin jamorqanku Señorta tapurikoj, ñaupaqeypitaj tiyarakorqanku.

²Señorqa parlamuwaspa niwarqa:

³Runa, Israelpa kuraj runasninman parlay, paykunaman noqaj sutiypi niy: Qankunachu jamuwankichej? Noqa Señorqa, kausayniyrayku jurani, mana qankunawan tapuchikusajchu.

⁴Runa, paykunata juchasninkumanta cheqanchay. Cheqanchay, tatasninkoj millay imasta ruwasqasninkutataj paykunaman rikuchiy.

⁵Noqamanta paykunaman niy: Señorqa kay jinata nin: Israelta ajllakorqani chaypachaqa, makiyta oqharispa Jacobpa ayllunman jurarqani, maypachachus paykunaman Egiptopi rikhurerqani chaypacha. Sumajtapuni paykunaman jurarqani, noqa Señor Diosniykeqa kani, nispa.

⁶Chay p'unchaypi noqa juraspa nerqani Egiptomanta paykunata orqhonayta, pusanaytataj noqa mask'arqani chay jallp'aman. Chaypitaj lechewan misk'iwanqa yaku jina puririshan, chaytaj tukuy jallp'asmanta aswan sumajpuni.

⁷Tukuy paykunata kamacherqani millay dioskunasninkuta saqenankuta, Egiptopi kaj lantiswan ama ch'ichichakunankuta, imaraykuchus noqa Señorman Diosninkoqa kani, nispa.

⁸Paykunataj contraypi sayarerqanku, manataj uyariyta munawarqankuchu. Ñawisninkuta ch'aukiyaj millay juchasninkumanta ni pipis t'aqakorqankuchu, nitaj Egiptopi kaj lantistapis saqerqankuchu. Yuyarqani paykunaj patampi k'aj phiñakuyninmanta samariyta, Egipto jallp'api kikin phiñakuyniyta paykunapi junt'anaypaj.

⁹Chay tukuywampis, sutiyrayku chay yuyasqayta saqerqani. Paykuna kasharqanku chay llajtasniyoj runakuna rejsiwarqanku, paykunaj ñaupaqempi ama p'enqaypi rikhurinayrayku, paykunata Egiptomanta orqhorqani.

¹⁰Egipto jallp'amanta orqhospa paykunata ch'in pampaman pusarqani.

¹¹Chaypi leyesniyta paykunaman qorqani, kamachisqasniytapis rejsicherqani, chaykunata pillapis junt'ajqa kausanampaj.

¹²Chantapis, paykunaman qollarqanitaj samakuna p'unchaykunasniyta noqawan, paykunawan uj señal kanampaj, yachanankupajtaj noqa Señor paykunata ajllakusqayta.

¹³Astawampis israelitasqa ch'in pampapi contrayta sayarerqanku. Mana leyesniyman jinachu purerqanku, kamachisqasniyta qhesacharqanku. Chaykunata junt'aj runaqa kausanqa. Samakunay p'unchaykunasniytaqa manapuni kasuta ruwarqankuchu. Chayrayku noqa nerqani ch'in pampapi paykunata phiñakuyniypi tukuyninkuta chinkachinayta.

¹⁴Chaywampis, sutiyrayku chay yuyasqayta mana yuyarqanichu, Egiptomanta paykunata orqhomushajta rikuwarqanku, chay jallp'amanta runaspa ñaupaqempi ama p'enqaypi rikhurinayrayku.

¹⁵Chay tukuywampis, ch'in pampapi paykunaman jurarqani, paykunata mana pusaykunaypaj, maypichus lechewan, misk'iwan yaku jinapuni karishan chay jallp'aman. Chaytaj tukuymanta may k'acha jallp'a karqa.

¹⁶Paykunaqa kamachisqasniyta qhesacharqanku, leyesniyta mana kasorqankuchu, samakuna p'unchaykunasniyta mana kasuta ruwarqankuchu, sonqonkupi lantisnillankuta yuyasqankurayku.

¹⁷Chay tukuywampis, paykunata khuyakuspa juchasninkumanta perdonarqani, manataj paykunata ch'in pampapi wañurachispa tukucherqanichu.

¹⁸Astawampis wawasninkuta ch'in pampapi nerqani: Ama tatasniykichejpa kamachisqasninman jina puriychejchu, amataj yachachisqasnintapis waqaychaychejchu, nitaj ch'ichichakuychejchu lantisninkuwan.

¹⁹Paykunata nerqani: Señor Diosniykichejqa noqa kani. Kamachisqasniyta ama pantaspa junt'aychej, yachachisqasniyta waqaychaychej, ruwaychejtaj.

²⁰Samakuna p'unchaykunasniytaqa waqaychaychej, qankunawan tratota ruwasqaymanta uj señal kanampaj, ajinamanta yachanaykichejpaj noqa Señor Diosniykichej kasqayta.

²¹Paykunaj wawasninkutaj contrayta jatarillarqankutaj. Mana kamachisqayman jinachu purerqanku. Yachachisqasniyta mana waqaycharqankuchu, nitaj junt'arqankuchu. Junt'ajqa kausayta tarenqa. Samakuna p'unchaykunasniyta mana kasorqankuchu. Chayrayku, noqa yuyarqani ch'in pampapi paykunaj patankuman k'ajaj phiñakuyniyta urmachimuyta, ajinamanta paykunapi phiñakuyniymanta samarinaypaj.

²²Sutiyrayku makiyta mana churarasqanichu, chay jallp'api tiyakoj runakunaj ñaupaqeypi ama p'enqaypi rikhurinayrayku. Paykuna rikuwarqanku, imaynatachus Egiptomanta orqhosqayta.

²³Chantá jurallarqanitaj ch'in pampapi tukuy kay pachapi kaj llajtasman, paykunata ch'eqerachinayta.

²⁴Paykunaqa yachachisqasniyta mana junt'arqankuchu, astawampis kamachisqasniyta qhesacharqanku, samakuna p'unchaykunasniytataj mana kasuta ruwarqankuchu, tatasninkoj millay lantisnillankuta qhawasharqanku.

²⁵Chayrayku noqapis paykunaman qorqani, mana allin kamachiykunata, mana kausayta atinankupaj jina kamachisqastataj.

²⁶Saqerqani ch'ichichakunankuta lantisman jaywanasta apaspa, kuraj wawasninkuta wañuchispataj ninapi ruphachispa jaywanankuta. Chayta ruwarqani paykunaj p'enqayninkupaj, rejsinawankupajtaj noqa Señor kasqayta.

²⁷Chayrayku runa, Israel aylluwan parlay, niytaj noqamanta: Señorqa kay jinata nin: Tatasniykeqa kay imaspi phiñachillawankupuni contraypi oqharikuspa.

²⁸Makiyta oqharispa paykunaman uj jallp'ata qonaypaj jurarqani, chayman pusaykojtiytaj, tukuy lomasta, chayri tukuy thansa sach'asta rikuytawan, chaypi uywa wañuchisqasta ruphacherqanku, jinataj rikuchikusninkuta jaywarqanku. Chaykuna noqata mayta phiñachiwanku. Chaypi k'acha q'apaj inciensosta q'osñicherqanku, vinowantaj ch'ajchorqanku.

²⁹Paykunata tapurerqani: Qankuna lomapi yupaychanaman rillankichej chay yupaychana waseqa imatajri? Kunan punchaykama lomapi wakichisqa yupaychana sutiyoj qhepakun.

³⁰Israel aylluman noqamanta niy: Señorqa kay jinata nin: Imaraykutaj qankuna ñaupa tatasniykichej jina ch'ichichakuyta munankichejri? Imaraykutaj noqamanta karunchakuspa millay lantista yupaychankichejri?

³¹Rikuchikusniykichejta jaywaspa, jinataj wawasniykichejta wañuchispa ninapi ruphachispa imaqa kunankama ch'ichichakushallankichejpuni lantisniykichejwan. Ajina kashaspachu Israel ayllu noqata tapukoj jamuwankichej? Noqa Señorqa kausayniyrayku jurani, qankunawanqa mana tapuchikusqaykichejchu.

³²Qankunaqa nerqankichej: Kay jallp'api tiyakoj llajtayoj runas jina kasunchej, nispa; paykunaqa k'aspita, chantá rumita yupaychanku. Chaytaj mana jinachu kanqa.

³³Noqa Señormin kausayniyrayku jurani. Jatun atiyniywan, phiñakuywan jasut'ispataj qankunata kamachisqaykichej.

³⁴Noqa orqhomusqaykichej mayqen aylluspichus, may jallp'aspitajchus ch'eqerasqas kashankichej chaymanta, tantaykusqaykichejtaj jatun atiyniywan phiñakuywan jasut'ispa.

³⁵Llajtakunaj ch'in pampannejman pusasqaykichej, chaypitaj uyapurapi cheqanchasqaykichej.

³⁶Egipto jallp'api ch'in cheqampi tatasniykichejta cheqancharqani, ajinallatataj qankunatapis cheqancharqaykichej. Noqa Señormin chaytaqa nini.

³⁷Noqa allinta qhawarisqaykichej, imaynatachus uj michejqa ovejasninta yuparqon ajinata, tratomantaj churasqaykichej purinaykichejpaj.

³⁸Mana kasukojkunata qankunamanta t'aqasaj, contraypi oqharikorqanku chaykunata. Waj jallp'api kunan kausashanku chaymanta wijch'usaj, manataj Israelpa jallp'anman yaykonqankuchu. Chaypacha qankunaqa noqa Señorta rejsiwankichej.

³⁹Israel ayllu, kay jinata qankunaman Señorqa nisunkichej: Sichus noqata qankuna mana kasuwankichejchu chayqa, sapa ujniykichej lantisniykichejpa qhepanta ripuychej, paykunata yupaychamuychej. Ama llimphu sutiytaqa ch'ichichaychejchu rikuchikusniykichejta jaywaspa, nitaj lantisniykichejta yupaychaspapis.

⁴⁰Señorqa kay jinata nin: Ajllakusqay orqopi, Israelpa jatun lomampi tukuynin Israel aylloqa yupaychawanqa. Chaypi noqa tukuy sonqowan jap'ikapusqaykichej. Chayllapitaj qankunamanta mañasqaykichej rikuchikusniykichejta jaywanawaykichejta, ñaupajta poqojkunata apamunawaykichejta, imastachus qonawaykichejpaj t'aqankichej chaykunatawan.

⁴¹Sumaj q'apaj inciensota jina jap'ikapusqaykichej ch'eqerasqa kashankichej chay jallp'asmanta, llajtasmantawan orqhomuspa tantaykusqaykichej, chantapis qankunanejta llimphu kasqayta, tukuy jallp'aspi kaj runasman rikuchisaj.

⁴²Noqa Señor kasqayta yachankichej, maypachachus ñaupa tatasniykichejman jallp'ata qonaypaj jurarqani, chay jallp'aman pusaykusqaykichej chaypacha.

⁴³Chaypitaj yuyarikunkichej tukuy mana allinta purisqaykichejmanta, sajra imasta ruwaspa ch'ichichakusqaykichejmantawan. Qankuna kikiykichejtataj millachikunkichej tukuy juchasniykichejmanta.

⁴⁴Israel ayllúy, sutiy jatumpi qhawasqa kananrayku, mana sajra purisqaykichejman jinachu, nitaj aswan millay juchasta ruwasqaykichejman jinapis qankunawan ruwasaj. Chaypacha noqa Señor kasqayta rejsiwankichej. Noqa Señormin kaytaqa nini.

⁴⁵Señorqa parlamuwaspa niwarqa: Runa, uraynejman kutirikuy, chay ladoman qhawarispataj manchayta parlay, Néguev orqoj contrampi, imachus jamunanmanta sut'inchay.

⁴⁶

⁴⁷Néguev orqomantaj ninki: Uyariy Señorpa parlasusqanta: Señorqa kay jinata nin: Noqa qampi uj ninata jap'ichisaj, chaytaj ruphaykonqa, qampi kashanku chay tukuynin q'omer sach'asta, ch'aki sach'astawan. Chay nina larwaj mana thasnonqachu. Qampi tiyakushanku chay tukuynin runaspa uyantataj ruphaykonqa, uraynejpi kajkunamanta qallarispa wichaynejman.

⁴⁸Chaytaqa tukuynin runas rikonqanku, noqa Señor chayta jap'ichisqayta, ninataj manapuni thasnukonqachu.

⁴⁹Noqataj kutichispa nerqani: Way Señor! Runasqa noqamanta ninku mana pejpa unanchay atinan imasllata parlasqayta.