Read Quechua Bolivia DC Bible EZEQUIEL 22 Bible Online

EZEQUIEL 22 - Quechua Bolivia DC Bible bible

EZEQUIEL 22

¹Señorqa parlamuwarqa niwarqataj: Runa, manachu runa wañuchi llajtataqa cheqanchanki? Manachu millay juchawan ch'ichichakusqanta sut'iman rikhurichinki?

³Sutiypi paytaqa ninki: Señorqa kay jinata nin: Runa masiykita wañuchej llajta, qhasi mana kaj dioskunatataj ch'ichichakunaykipaj ruwakunki, chay p'unchayqa qampaj chayamonqaña.

⁴Runasta wañuchisqasniykiwan juchayoj rikhurinki, dioskunata ruwakuspataj ch'ichichakunki. Ajinamanta qanqa jasut'ina p'unchayta qayllachimunki, tukukunayki tiempotaj chayamunña. Runaswan noqa p'enqachisqayki, tukuy nacionespi tiyakoj runastaj asipayasonqanku.

⁵Qayllapi kajkuna, jinallataj karuspi kajkunapis qanmanta asikonqanku, millay kausayniykimanta, dioskunasniykiraykutaj mentasqa ayllu.

⁶Israelpi kuraj runas, sapa ujninku atisqankuta runasta wañuchinapaj kallpachakunku.

⁷Kay llajtapeqa, tatasninkuta, mamasninkutapis mana kasuta ruwankuchu. Waj llajtamanta jamoj runasta ñak'arichinku. Wajcha wawasmanta, viuda warmismantataj lluch'unku.

⁸Ajllakusqay cheqasta, chantá samakunay punchayniytapis mana kasuta ruwarqankichu.

⁹Kay llajtapi llullata parlaj runas kajtinku, wakin runas wañuchisqas karqanku. Lomaspi dioskunaman jaywasqa imasmanta mikhumoj rerqanku, millay imastataj ruwanku.

¹⁰Tatasninkoj warminwan qhenchachakorqanku. Warminku killa yawarnimpi kashajtimpis paywan puñorqanku.

¹¹Sapa ujninku runa masimpa warminwan qhenchakorqanku. Manachayqa qhachunninwan millayta qhenchachakorqanku, manachayrí kikin tatampa wawanwan qhenchachakorqanku.

¹²Wakin qampi tiyakojkunamanta qolqeta lluk'ichikunku waj runasta wañuchinampaj. Qolqeta mañarinku mirayniyojta orqhonankupaj. Runa masisninkuta ch'aukiyanku, ñak'arichinkutaj. Noqamantataj qonqakaporqanku. Noqa Señormin kaytaqa nini.

¹³Noqa makiyta thalarakuni, may phiñasqataj kashani chay jinata suwakusqaykimanta, qan ukhupi runasta wañurachisqaykimantawan.

¹⁴Noqa contraykita jatarisaj chaypachaqa, sonqoyki wapuchakuwanqachu? Makisniykipis kallpayojllapunichu kanqanku? Noqa Señormin chayta nini, junt'asajpunitaj.

¹⁵Tukuy nacionesman ch'eqerachisqayki, tukuy jallp'asman wijch'usqayki, tukuynin juchasniykimantataj llimphuchasqayki.

¹⁶Waj jallp'aspi tiyakoj runaspa ñaupaqempi qan kikiyki p'enqayta rikhurichikunki, chaywantaj yachanki noqa Señor kasqayta.

¹⁷Señor parlamuwaspa niwarqa: Runa, Israel aylloqa imaynatachus cobreta, estañota, fierrota, qorita, chayri qolqetapis k'ajarishaj nina hornoman churaykojtinku tukuy ch'ichisnin ushphaman tukusqa qhepakun, chay jina mana allinman noqapajqa.

¹⁹Chayrayku Señorqa kay jinata nin: tukuyniykichej q'opaman jina tukunkichej, chayrayku Jerusalén llajta chaupiman tantaykusqaykichej.

²⁰Imaynatachus uj runaqa qolqeta, bronceta, fierrota, qorita ima tantaykuspa hornoman churaykun, ninawantaj enqaykun chay imasta unuyachinampaj, ajinata noqa manchay phiñakuyniywan, k'ajaj phiñakuyniypitaj tantaykusqaykichej, chaypitaj unuyachisqaykichej.

²¹Noqa tantaykusqaykichej, chanta k'ajaj phiñakuyniyta qankuna pataman apachimusqaykichej, chay llajta chaupipitaj unuyankichej.

²²Imaynatachus hornopi unuyan, ajinata qankunata unuyachisqaykichej llajta chaupipi. Chaywan yachankichej noqaj Señor phiñakuyniyta qankunaman urmachimusqayta.

²³Señor parlamuwarqa niwarqataj: Runa, Jerusalenman niy: Qanqa mana llimphuy jallp'achu kanki, ay phiñakuy p'unchaypitaj parawan mana ch'ajchusqachu kanki.

²⁵Chay llajtapi kamachejkunataj, phiñakuywan qhaparej onzas jina kanku, jap'isqankuta llik'inoqanku, runasta jallp'ankupi mikhuranku. Qolqe waqaychasninkuta, kapuyninkutawan suwanku. Ashkha warmistataj viudasta saqeranku.

²⁶Kay llajtaj sacerdotesnenqa yachachiykunasniyta p'akinku. Ajllakusqasniy cheqasta ch'ichichanku. Imachus llimphu kajta, imachus ch'ichi kajtapis mana reparankuchu. Manataj wajkunaman yachachinkuchu imachus allin kajta, nillataj mana allin kajtapis. Samakuna p'unchaykunasniymanta mana dakunkuchu, nitaj jatunchawankuchu.

²⁷Kay llajtapi kurajkunaqa atojkuna jina jap'isqankuta t'unanku, yawarta jich'anku, runasta wañuchinku kapuyninkuta suwaspa qhapajyanankupaj.

²⁸Profetasninkutaj imachus cheqan kajta pakashanku, imaynatachus uj perqata yesowan yurajchanku ajinata, mana kajta paykunaman parlaspa, ajina rikhuriwan nispa, llulla imasta yachachispataj. Kay jinata Señorqa parlawan ninku, chaypajqa mana imatapis noqaqa parlanichu.

²⁹Llajta runasqa mayta sajrayanku, suwankutaj. Wajcha runasta mana kapuyniyojkunatapis munasqankuta ruwanku. Waj llajtamanta kajkunatapis mana allinta ruwaspa ñak'arichinku.

³⁰Chay runas ukhupi noqa mask'arqani pillapis kay llajtaj allinninta sayarinanta ñaupaqeypi noqamanta kay llajtarayku mañapunampaj, ajinamanta kay llajtata ama chinkachinampaj, manataj ujllatapis tarerqanichu.

³¹Chayrayku paykunaj patankuman jasut'iyta urmachimorqani. Nina k'ajaj phiñakuyniywantaj paykunata tukucherqani, paykuna sajra kausaypi purisqasninkuman jina. Noqa Señormin chayta nini.