Read Quechua Bolivia DC Bible EZEQUIEL 26 Bible Online

EZEQUIEL 26 - Quechua Bolivia DC Bible bible

EZEQUIEL 26

¹Chunka ujniyoj watapi, killamanta ñaupaj kaj p'unchaynimpi Señor parlamuwaspa niwarqa: Runa, Tiroqa Jerusalenmanta alqochakun, kay jinata nispa: Walejpacha, llajtakunaj qhatu ruwanankupaj yaykunan punkoqa phirisqaña. Noqamantaj mit'aqa chayamuwan. Noqamanñataj qhapajyay mit'aqa chayamuwan.

³Chayrayku, Señorqa kay jinata nin: Tiro llajta, noqa contraykipi kashani, ashkha llajtakunamanta runasta contraykipi jatarichimusaj, imaynatachus jatun qochamanta yaku qhollchoqeyay jatarimun ajinatapuni.

⁴Perqasniykita t'unaykonqanku, torresniykitataj urmarachenqanku. Chay pampamanta ñut'u jallp'antinta picharqosaj, llosq'a qaqata jina q'arallata saqesaj.

⁵Jatun qocha chaupipi qhepakonqa, challwa jap'ina ch'ipasta ch'akichinapaj jinalla kanqa. Noqa Señor chaytaqa nini. Llajtakunamanta jamuspa Tiro llajtayoj runasmanta tukuy kapuyninkuta qhechuranqanku.

⁶Chay muyuynin jallp'aspi tiyakushanku chaykunaqa espadawan wañurachisqas kanqanku. Chaypacha yachanqanku noqa Señor kasqayta.

⁷Imajtinchus kay jinata Señorqa nin: Wichaynejmanta, Babilonia rey Nabucodonosor Tiroj contrampi jatarichimusaj, payqa reyespa reynin, caballoswan, carretaswan, caballospi rejkunawan, ashkha soldadoswantaj ashkha llajtasmanta jamorqanku.

⁸Sinch'i jallp'api tiyakoj runasniykita espadawan wañurachenqanku. Uj perqata muyuyniykipi ruwanqa, torresta oqharenqanku muyuykusunampaj, armasqa soldadoswantaj contraykipi kachaykamusonqanku.

⁹Perqasniykita ariete nisqawan takamusonqanku, torresniykitataj barretaswan urmachenqanku.

¹⁰Babiloniamanta kaj reyqa ashkha caballoswan yaykumojtin jallp'a polvowan chinkaykuchisonqanku. Carretasnimpa sonayninwan, caballospa sonayninwan imaqa perqasniyki kharkatitenqa, contrariosniyki punkusniykita yaykumushajtin, t'unaykusqa llajtaj punkusninta jina.

¹¹Caballosnimpa phapatusninkuwan tukuynin callesniykita t'ultiykonqa. Aylluykitaqa espadawan wañurachenqanku. Perqasniykej sayantasninta thuñenqanku.

¹²Qhapaj kapuyniykita suwasonqanku, qhatunapaj kaj imasniykita qhechurasonqanku. Perqasniykita loqheykonqanku, k'acha wasisniykitataj thuñiykonqanku. Rumisniykita, kurkusniykita, thuñisqa perqasniykitawan, mar qochaman wijch'onqanku.

¹³Ajinamanta ch'inyachisaj takiykunasniykita, manataj arpaykej waqaynenqa uyarikonqañachu.

¹⁴Mana imayoj llusk'a chhankaman jina tukuchisqayki, challwa jap'ina ch'ipasta ch'akichinapaj jina cheqaman. Manataj ujtawan jayk'ajpis sayachisqachu kanki. Noqa Señormin chaytaqa parlani nin Señorqa.

¹⁵Señorqa Tiro llajtaman kay jinata nin: Mar qocha canto jallp'aspi tiyakoj llajtasqa, jatun sonaywan urmasqaykita uyarispaqa khatatenqanku. Nanachisqas qhaparikojtinku, qampi tiyakojkunata wañurachishajtinku ima.

¹⁶Mar qocha canto jallp'aspi kamachejkunaqa, tukuyninku tiyanankumanta uraykonqanku. Pata p'achasninkuta orqhokonqanku, k'acha awakipasqa p'achasninkutataj lluch'ukonqanku. Sinch'i manchariywantaj pampapi tiyarikonqanku chay jinata rikuspa, sapa rato kharkatispa qanmanta t'ukonqanku.

¹⁷Aya p'ampana takiyta takipusonqanku, kay jinata: Imaynata qan chinkachisqa karqanki, chay qocha cantopi llajtayoj runari, may mentasqa llajtari! Qanqa chaypi tiyakoj runasniykiwan, muyuyniykipi tiyakoj runasnin llajtasta, chay mar qocha cantopi kajkunata mayta manchacherqanki!

¹⁸Kunanqa, urmasqayki p'unchaypi, Mar qocha cantospi tiyakojkunaqa, manchachikuywan kharkatitinku. Kunanqa mana ujniyoj tukukusqaykimanta qocha chaupipi churusqa manchayta t'ukunku.

¹⁹Señorqa kay jinata nin: Ch'in llajtaman tukuchisqayki, ni pejpa tiyakunan llajtaman jinataj. Jatun qocha ukhumanta ashkha yakuta llojsichimusaj, manchay ashkha yakutaj chinkachisonqa.

²⁰Maypichus wañusqas kashanku chaykama chinkaykuchisqayki, ñaupa tiempopi kaj runastawan khuskata. Aswan jallp'a ukhumantaj choqaykusqayki wiñaypaj ch'inyachisqa llajtaman, wañusqakunawan khuskataj tiyakunki, manataj ujtawan jayk'ajpis qampi llajtaqa ruwakonqachu, kay pachapi kausajkunaj jallp'ampeqa.

²¹Manchachikunaman jina tukuchisqayki, manaña ujtawan rikhurimushajta ruwasqayki. Mask'asonqanku, manataj jayk'ajpis tarisonqankuchu. Ajinata nin Señorqa.