Read Quechua Bolivia DC Bible EZEQUIEL 27 Bible Online

EZEQUIEL 27 - Quechua Bolivia DC Bible bible

EZEQUIEL 27

¹Señorqa parlamuwaspa niwarqa: Qanqa runa, Tiro llajtapajqa aya p'ampana takiyta takipuy, kay jinata: Mar qocha cantospi tiyakoj llajta, qocha chaupi churuspi tiyakojkuna, chay ashkha llajtaswantaj qhatusta ruwaj. Kunanqa Tiro llajta, Señorqa kay jinata nisunki: Qanmanta nerqanki: Noqa manchay k'acha kani, tukuy ima junt'asqataj.

⁴Kamachinaykeqa, mar qochaj chaupinkama chayan. Qanta ruwasojkunaqa may k'achatapuni ruwasorqanku.

⁵Senir nisqa orqomanta pino sach'asta k'utumuspa, tukuynin llajtasniykita ruwapusorqanku. Líbano nisqa orqomantataj, cedro sach'ata k'utumuspa mastil nisqa jatun k'aspita ruwapusorqanku.

⁶Basán nisqa jallp'amanta encina k'aspita apamuspa buque purichina palata ruwapusorqanku. Buquej techonta ruwapusorqanku, Chipre churusmanta pino k'aspita apamuspa, marfilwan k'askaykuchisqatataj ruwapusorqanku.

⁷Buque llanthuchaykitaj Egiptomanta apamusqa sumajnin linomanta ruwasqa karqa wiphaylayki kanampaj. Toldoykiri, Elisá nisqa churumanta apamusqa puka kulli telasmanta ruwasqa karqa.

⁸Buqueykita palaswan purichej, runasniykitaj Sidón llajtamanta, Arvad llajtamantawan karqanku. Tiro llajta, yachayniyoj runasniykeqa qanwan karqanku, paykunataj buqueykita apajniyki karqanku.

⁹Gebal llajtayoj machu runas qanwan karqanku, sumaj yachaywan, ima mana allin kajtimpis usqhayllata allichanankupaj. Mar qochapi kaj buquesta, jinallataj apaykachaj runaspis qanwan ranqheyarqanku.

¹⁰Persia llajtamanta, Lidia llajtamanta, Libia llajtamantawan runas soldadosniyki maqanakunaykipaj karqanku. Escudoswan monteraswantaj armaykusorqanku, chay armastaj jatumpaj qhawachisorqanku.

¹¹Arvad ayllumanta kajkunataj soldadosniykiwan khuska perqasniyki pataspi muyuykusqas kasharqanku, torresniykipitaj gamadeo runas kasharqanku, allinta qhawanankupaj. Perqasniykita escudosninkuwan muyuykucherqanku, chaykunataj aswan k'achaman tukuchisorqanku.

¹²Chay jina qhapajpuni kasqaykirayku, Tarsis llajtamanta kaj runas qanwan trocarqanku, qolqewan, fierrowan, titiwan, qoriwan ima qhatuna p'unchaykunaspi.

¹³Greciamanta kajkuna, Tubalmanta kajkuna, Mesecmanta kajkuna ima qanwan ranqheyallarqankutaj runasta, broncemanta ruwasqa imaswan pagasoj kanku.

¹⁴Bet-togar llajtamanta kajkunarí, caballosta, maqanakunaman rej caballosta, mulastawan qhatuykipi ranqheyaj kanku.

¹⁵Rodas nisqa llajtamanta kajkunaqa qanwan qhatoj kanku. Mar qocha churuspi llajtayojkunamanta ashkha runas qanmanta qhatojkunasta jap'ej kanku. Paykunataj pagasoj kanku marfilta, ebanotawan.

¹⁶Edóm llajtamanta kajkuna qanwan qhatuta ruwallajtaj kanku. Mikhunas ashkha poqopusorqa, chay mikhunasniykiwan trocanankupaj paykuna apamoj kanku: Granate rumista, puka tiñisqa telasta, awakipasqa p'achasta, chantapis may sumachaj linomanta kaj telasta, coral nisqa rumistawan.

¹⁷Judá ayllu, jinallataj Israel jallp'amanta kajkunapis qanwan ranqheyaj kanku. Paykunaqa Minit nisqa trigota pagasunankupaj apamoj kanku. Chantá apamullajtaj kanku pastelesta, misk'ita, aceiteta, k'acha q'apaj jampistawan.

¹⁸Damasco llajtayojkunataj tukuy poqochisqaykita tukuy qanmanta rantisoj kanku. Chay imasmanta Helbón llajtamanta kaj vinowan, Saharmanta yuraj millmawantaj pagasoj kanku.

¹⁹Chantá, Dan nisqa llajtamanta, pantaypi purej Javá nisqa llajtamantawan kajkuna qhatunasniyki p'unchaykunapi jamorqanku, sumachaj ruwasqa fierrosta, mirra surusqata, q'apaj cañatawan apamoj kanku, qhatuna imasniykitawan trocanankupaj.

²⁰Dedanmanta kajkunaqa llank'anapaj monturasta qanman ranqheyaj kanku.

²¹Arabia llajtamanta kajkuna, chantá Cedarpi kaj kurajkuna rantisojkunasniyki karqanku. Paykunataj pagasoj kanku corderoswan, carneroswan, chivoswan ima.

²²Sabá ayllumanta kajkuna, Raama ayllumanta kajkunapiwan ranqheros karqanku. Paykunaqa qanmanta rantisoj kanku: Pagasojtaj kanku may k'acha q'apaj jampista, qorita, tukuy laya k'acha rumistawan.

²³Haranmanta kaj runas, Canemanta, Edenmanta kaj runaspiwan qanwan ranqheyallajtaj kanku. Jinataj, Sabamanta, Asiriamanta, chantá tukuynin Mediamanta kaj runas qanwan ranqheyanankupaj tratota ruwarqanku.

²⁴Paykunaqa vendesoj kanku may sumachajnin telasta, azulman tiñisqa awakipasqa mast'asta, tukuy laya coloresmanta ruwasqa qhatanasta, sumaj p'acha jallch'ana cedro maderamanta ruwasqa kajasta, sumaj simp'asqa imaswan k'achanchasqasta vendesoj apamusoj kanku.

²⁵Tarsismanta kaj buques qhepampi qhepampi tukuy qhatunasta apampusorqanku. Chay tukuywanqa mar qochapi uj jatun buque jina karqanki tukuy laya ashkha imaswan junt'a.

²⁶Buque apajkunasniykeqa ukhu mar qochasnejta apasorqanku, chaypitaj inti llojsimuynejmanta wayra wayramuspa t'unaykusorqa.

²⁷Ashkha kapuyniyki, qhatu ruwanasniyki, tukuy ruwasqasniyki, mar qochapi purej runasniyki, buquesta apaykachaj runasniyki, buquej k'allkasninta ñuphaj runasniyki, qhatunasniykita allin yachaywan qhawajkuna. Ch'ajwapi maqanakoj runasniyki, tukuy qanwan purejkuna ima, chinkanayki p'unchay chayamojtin, mar qocha ukhuman ch'ultiykukonqanku.

²⁸Mar qochapi purej runasniykej qhapariyninkuta uyarispa mar qochaj cantosnin kharkatitenqanku.

²⁹Buquesta manejajkuna, buquesninkumanta pampaman uraykonqanku. Jinallataj remowan buquesta apaykachajkunasnintin tukuyninku pampaman phinkiranqanku.

³⁰Qannejta jatunmanta qhaparenqanku, jik'un jik'untataj waqanqanku. Umasninkuman ñut'u jallp'aswan qhallikonqanku, ushphaspitaj sunt'enqanku.

³¹Qannejta chujchasninkutapis q'arallata k'uturachikonqanku. Qhashqa pachata churakonqanku. Sonqo nanayta jatunmanta qhawarispa waqanqanku.

³²Qannejta aya p'ampana takiyta takenqanku. Llakiywantaj nenqanku: Pitaj rijch'akunman karqa, mar qochapi chinkachisqa Tiro nisqa llajtamanri?

³³Maypachachus tukuy ima qhatunasniyki chayamojtin, ashkha llajtasman sajsachej kanki. Ashkha kapuyniykiwan, qhatunasniykiwantaj, kay jallp'api kaj reyesta qhapajyacherqanki.

³⁴Mar qocha qantaqa phirisunki, tukuy ima qhatunasniyki, qanwan kaj runaspis qanwan khuska mar qocha ukhuman chinkaykunku.

³⁵Mar qocha cantopi tukuy tiyakoj runas qanmanta t'ukonqanku. Reyninkupis manchariywan kharkatitenqanku. Uyankutaj waj jinaman tukonqa.

³⁶Waj llajtaspi qhatojkunataj chay rijch'ajta rikususpa asipayasonqanku. Manchay jatunta mancharinapaj jina kanki. Manaña ujtawan rikhurimuyniyoj chinkapunki.