Read Quechua Bolivia DC Bible EZEQUIEL 28 Bible Online

EZEQUIEL 28 - Quechua Bolivia DC Bible bible

EZEQUIEL 28

¹Señorqa parlamuwaspa niwarqa: Runa, Tiro llajtaj reyninman kay jinata niy: Sonqoykipi jatunchakuspa nerqanki: Noqa uj dios kani, Diospa tiyanampi tiyarishani, mar qocha chaupipi, nispa. Chaywampis qanqa runalla kanki, manataj dioschu. Uj dios jina yachayniyoj kasqaykita yuyakunki.

³Danielmantapis aswan yachayniyoj kasqaykita yuyakunki. Tukuy pakaypi kaj imastapis yachasqaykita yuyakunki.

⁴Yachayniykiwan, k'uchi kayniykiwantaj ashkha kapuykunata tantakorqanki. Waqaychana cajaykipi qorita, qolqetapis junt'aykucherqanki.

⁵Jatun yachayniykiwan tratosta ruwaspa, kapuyniykita ashkhayacherqanki. Chay jina ashkha kapuyniykiraykutaj sonqoykipi jatunchakorqanki.

⁶Chaynejta Señorqa kay jinata nin: Diospa sonqon jina sonqoyoj kasqaykita yuyakusqaykirayku, contraykipi noqa waj llajtayoj runasta kachaykamusqayki nacionesmanta aswan kallpayoj sajra runasta, may k'achitu kasqaykej contrampi, sumaj yachayniyoj contrampitaj espadasta orqhonqanku, may jatun kayniykitataj pampaman tukuchenqanku.

⁸Uqhu pachaman chinkaykuchisonqanku. Mar qocha ukhupi imaynachus wañuna, chay kikinta wañunki.

⁹Wañuchisojpa ñaupaqempeqa, noqa dios kani nispa parlarinkichu? Qanqa runalla kanki, manataj dioschu wañuchisojpa ñaupaqempeqa.

¹⁰Waj llajtayojpa makisnimpeqa mana circuncidasqa runa jina wañunki. Noqa kaytaqa parlani, nin Señorqa.

¹¹Señorqa parlamuwaspa niwarqa: Runa, Tiro llajtaj reynimpajqa runa wañuypi takinata takipuy, niytaj: Señorqa kay jinata nisunki: Qanqa yachaqakunapaj jina mana ima pantayniyoj karqanki, junt'asqa yachayniyoj, tukuymanta aswan k'achataj.

¹³Edempi Diospa huertampi, tukuy laya k'acha rumismanta ruwasqa p'achawan p'achallisqa karqanki: Rubimanta, crisolitomanta, jademanta, topaciomanta, onicemanta, jaspemanta, zafiromanta, granatemanta, esmeraldamantawan. Walqasniykiwan, zarcillosniykiwan qorimanta karqanku. Ñaupaj bombitosniyki, chantá qenasniykipis qampaj wakichisqas karqanku mayk'ajchus ruwasqa karqanki chay p'unchaymantapacha.

¹⁴Noqa qanta Diospa santo lomanman jatun querubinta jina jark'ajta churarqayki. Nina rumi chaupipi puriykachaj kanki.

¹⁵Tukuy puriyniykipi mana pantayniyoj karqanki, ruwasqa karqanki chay p'unchaymantapacha, maypachachus sajra imas qampi rikhurerqa chaykama.

¹⁶Qhatusniykipi allin risusqanman jina, millay imaswan junt'aykuchikorqanki, juchallerqankitaj. Chaynejta lijrasniyoj jark'aj querubín, Diospa santo lomanmanta wijch'orqayki, k'anchaj rumis chaupimanta orqhorqayki.

¹⁷May k'achitu kasqaykirayku sonqoykipi jatunchakorqanki. May jatun k'anchayniykiwan yachayniykita, chhika millayman tukucherqanki. Noqataj jallp'aman wijch'umorqayki reykuna rikusunampaj p'enqaypi rikhurichispa.

¹⁸May chhikatapuni juchallerqanki. Qhatunasniykita mana cheqa kajman jina apaykachasqaykipitaj ch'ichichakorqanki. Chayrayku, noqa qanllamantataj ninata rikhuricherqani, chaytaj q'olaykusorqa. Jallp'a patapi ushphallata saqerparerqayki tukuy runaj rikunanta.

¹⁹Tukuy llajtasmanta pikunachus rikusunku chaykunaqa, rikususpa t'ukonqanku. Mancharinapaj jinapuni tukuchisqa kanki. Wiñaypajtaj chinkanki!

²⁰Señorqa parlamuwaspa niwarqa: Runa, Sidón llajtanejman qhawariy, paypa contrampitaj parlay: Atiyniyoj Señorqa kay jinata nisunki: Sidón llajta, contraykipi kashani. Qannejta noqaqa jatun kasqaytaqa rejsichikusaj. Maypachachus chay llajtaj contrampi juchachaykunata oqharispa cheqanchasaj, llimphu kasqaytataj rikuchisaj, chaypacharaj noqa Señor kasqaytaqa yachanqanku.

²³Onqoykunata chay llajtaman apachimusaj, callespitaj yawar mayu purirenqa. Llajta ukhupi wañuranqanku. Tukuynejmanta espadawan yaykumonqanku, wañurachenqankutaj, chaypacharaj noqa Señor kasqayta yachanqanku.

²⁴Ajinamanta Israel aylluyta khishka jina nanachejnin manaña kanqanku, nitaj muyuynimpi kaj llajtapis astawan payta qhesachaspa ñak'arichenqankuñachu. Chaypachataj Israel aylloqa yachanqa, noqa Señor kasqayta.

²⁵Señorqa kay jinata nin: Mayk'ajchus tukuy llajtaspi ch'eqerachisqamanta Israel aylluyta tantaykamusaj, chaypacha llajtakunaj rikunankuta llimphu kasqayta rejsichikusaj. Paykunataj kikin jallp'ankupi tiyakonqanku. Chay jallp'ataqa Jacob kamachiyman qorqani.

²⁶Chaypi paykunaqa mana ima llakiyniyoj tukuy sonqo tiyakonqanku. Wasista ruwakonqanku, uvas sach'asta plantakonqanku. Maypachachus Israel ayllumanta kapuyninkuta lluch'urajkunata, tukuyninta juchachaspa cheqanchasaj, chaypacharaj noqa Señor Dios kasqayta yachanqanku.