Read Quechua Bolivia DC Bible EZEQUIEL 3 Bible Online

EZEQUIEL 3 - Quechua Bolivia DC Bible bible

EZEQUIEL 3

¹Chanta niwarqa: Qanqa runa, kay qelqasqa librota mikhuykuy. Chantá riytawan Israel aylluman parlamuypacha.

²Simiyta kicharerqani, chay qelqasqa librotataj mikhuykuchiwarqa.

³Chaymantaqa niwarqa: Kunanqa kay jaywasusqay qelqasqa librota oqoykuy, chaywan wijsaykiman junt'aykuchiy. Noqa mikhuykorqani. Simiypeqa may misk'i karqa.

⁴Chaymanta niwarqa: Rispa Israel aylluman chay palabrasniyta willamuy.

⁵Mana, mana rejsisqa parlayniyoj ayllumanchu kachashayki, nitaj mana unanchay atina parlayniyojmanchu. Manachayqa Israel aylluman kachashayki.

⁶Mana ashkha nacionesmanchu, mana atinapaj jina parlayniyojkunamanchu kachashayki, nitaj unanchayta mana atinaykipaj jinamanchu. Chaykunamanchus kachaykiman chaypis uyarisunkuman.

⁷Chaywampis Israel aylloqa mana uyarisuyta munanqankuchu, imaraykuchus noqata mana kasuyta munawankuchu. Israel aylloqa tukuyninku mana k'umuykoj rumi sonqos kanku.

⁸Noqataj paykunata jina thuru sonqoyojman tukuchisqayki, k'ullukoj uyamantaj tukuchisqayki.

⁹Diamante rumita jina sinch'ita ruwasqayki, chhanka rumimantapis aswan churkitaraj. Ama paykunata manchachikuychu, nitaj manchachikuychu phiña uya qhawarimusojtinkupis, aswan mana kasukoj kajtinkupis.

¹⁰Chantapis nillawarqataj: Runa, allinta uyariway tukuy ima nisusqayta, sonqoykipi sumajta jap'iy.

¹¹Rispa llajta masisniykita watukamuy, jap'irachikuspa apasqas kanku chaykunata. Paykunaman willay, niytaj: Kay jinata Señorqa nin: Uyarisuchunkupis amapis, nispa.

¹²Chaymanta Diospa atiynin oqhariwarqa, chaymantapacha uj parlamojta uyarerqani, jatunmanta sonajtata, chaytaj nerqa: Señorpa jatun kaynenqa mayllapipis tarikojtin yupaychasqa kachun.

¹³Chay sonaytaqa ruwarqanku kausajkunaj lijrasninku ujkuna ujkunawan tinkunakojtinku, paykunawan kasharqanku chay ruedaspiwan. Chay sonaytaj, jallp'a ikhakuy jina karqa.

¹⁴Diospa atiynin jap'iwaspa jaqaymanta orqhowarqa, noqataj may llakisqa waqaspataj riporqani. Chaywampis Señorqa sinch'ita makinwan jap'iwarqa.

¹⁵Tel Abibman Quebar mayoj cantosninkama chayarqani. Chaypitaj jap'iraspa apasqa Israelmanta kajkuna tiyakorqanku. Chaypi paykunawan qanchis p'unchay junt'ata karqani, mana yachaspa imatachus ruwanayta, nitaj imatachus parlanayta.

¹⁶Qanchis p'unchay tukukuypi Señorqa parlamuwarqa, niwarqataj: Runa, noqa qanta churayki Israel aylluta qhawanaykipaj. Noqa ima willaytachá parlamusqayki, chayta noqamanta paykunaman willanki, noqaj sutiypi k'amispa, reparachispataj.

¹⁸Maypachachus noqa juchasapaman niyman: Cheqamanta wañunki nispa, qantaj mana k'amiwajchu, nitaj parlawajchu sajra kausayninmanta reparachispa, payqa chay juchanrayku wañonqa, noqataj paypa kausayninmanta cuentata mañasqayki.

¹⁹Sichus qan k'aminki sajra kausayninmanta reparachispa, paytaj juchanmanta mana kutirimonqachu, nitaj sajra puriynintapis saqenqachu chayqa, pay juchanrayku wañonqa, qantaj kausayniykita salvanki.

²⁰Sichus uj cheqa kaj runa cheqan kausayninta saqespa sajra imasta ruwanman, noqataj urmanampaj misk'anata paypaj churayman, juchanmanta reparachispa mana k'amisqaykirayku wañonqa. Noqataj mana yuyarisajchu allin imasta ruwasqasnintaqa, juchampi wañonqa. Chaywampis wañusqanmanta cuentata mañasqayki.

²¹Cheqanta kausashaj runatachus reparachispa k'amiykunki ama juchallikunanta; manataj pay juchallinmanchu chayqa kausallanqapuni, imaraykuchus reparachisqaykita kasukorqa, qantaj kausayniykita salvanki.

²²Chay pachampi Señorqa makinta churaykamuwarqa, niwarqataj: Sayarikuy, mayu cantoman llojsiy, chaypi parlasqayki.

²³Jatariytawan mayu cantoman llojserqani, chaypitaj Señorpa k'anchayninta rikorqani, Quebar nisqa mayu cantopi rikorqani chay jinallatataj. Uyayta pampaman chayachinaykama k'umuykorqani.

²⁴Chanta Diospa atiynenqa yaykuwaspa sinch'ita sayachiwarqa. Chaypachataj Señor parlawarqa, kay jinata: Riy wasiykiman, wisq'aykakamuy.

²⁵Qantaqa, runa, waskhawan wataykusonqanku, ajinamanta mana llojsiyta atinkichu paykunawan kanaykipaj, astawampis noqa qalluykita pata kaj simiykiman k'askaykuchisqayki, mana parlajman tukuchisqayki. Manataj paykunata k'amiyta atinkiñachu, imaraykuchus mana kasukoj k'ullu runas kanku.

²⁷Chaywampis, imatachus parlayta munasqayki chaypacha parlayniykita kutichipusqayki, chantá noqaj nisqayta paykunaman willanaykipaj kay jinata: Señorqa nin: Uyariyta munajqa, uyarichun, mana uyariyta munajqa, amapis uyarichunchu, imaraykuchus mana kasukoj ayllu kanku.