Read Quechua Bolivia DC Bible EZEQUIEL 30 Bible Online

EZEQUIEL 30 - Quechua Bolivia DC Bible bible

EZEQUIEL 30

¹Señorqa parlamuwaspa kay jinata niwarqa: Runa, sutiypi paykunaman parlaspa niy: Kay jinata Señorqa nin: Qhaparispa waqaychej: Way, chay p'unchaymanta!

³Chay p'unchayqa qayllamushanña. Qayllapiñapuni Señorpa p'unchaynenqa kashan! Phuyusniyoj p'unchay kanqa. Llajtakunapaj chay p'unchayqa uj jasut'i jina kanqa!

⁴Egiptoj contrampi ch'ajwa jatarenqa. Kaypi ashkha runas wañurajtin, tiyapuyninta qhechurajtinku, Egiptota cimientonmantapacha urmachejtinku, Etiopiamanta kaj runas kharkatitenqanku.

⁵Chay ch'ajwapi espadawan wañurachisqallataj kanqanku, kay llajtasmanta kaj soldados: Etiopiamanta, Libiamanta, Lidiamanta, Cubmanta, waj llajtasmanta kajkuna ima. Waj llajtasmanta paykunaman tantaykamojkunapis wañullanqankutaj.

⁶Señorqa kay jinata nin: Egiptota yanapajkunaqa, ch'ajwapi wañuranqanku. Chay jatunchakoj sonqonqa urmanqa. Migdol nisqa jallp'amantapacha, Asuán nisqa jallp'akama chay ch'ajwapi espadaswan wañurachisqas kanqanku, nin Señorqa.

⁷Egipto jallp'aqa tukuy chinkachisqa nacionesmanta aswan ch'inyachisqa kanqa, llajtasnimpis tukuy thuñisqa llajtasmanta aswan thuñisqa kanqa.

⁸Maypachachus Egiptoman ninata kachaykusaj, tukuy yanapajkunasninta taj t'unaykusajpis, chaypacharaj noqa Señor kasqayta yachanqanku.

⁹Chay p'unchaypi buquespi willarajkunata kachasaj, Etiopía jallp'api mana ima llakiyniyoj tiyakoj runasman chay manchaymanta uyarichimunankupaj. Paykunapajpis imaynatachus Egipto llajtapaj manchay jasut'i chayamorqa, ajinallataj kanqa. Chay p'unchaytaj chayamushanñapuni.

¹⁰Señorqa kay jinata nin: Babiloniapi kaj rey Nabucodonosorpa makinnejta, Egiptoj qhapaj kapuynintaqa chinkachisaj.

¹¹Reyqa llajtata runasninwan t'unaykoj renqanku. Paykunataj tukuymanta aswan kallpasapa runas kanku. Espadasninkuwan egipcio runasta wañurachispa llajtataqa ayas junt'ata saqerpayanqanku.

¹²Nilo mayupitaj yakusta ch'akichisaj, jallp'ataqa sajra runasman qosaj, waj llajtasniyojnejta jallp'ataqa t'unaykuchisaj, tukuy kapuynintawan. Noqa Señor kaytaqa nini.

¹³Señorqa kay jinata nin: Menfis llajtaj qhasi mana kaj dioskunasninkuta tukuyninta t'unaykusaj. Egipto jallp'apeqa manaña astawan kamachejqa kanqañachu. Jallp'aqa manchachikuyllawan junt'asqa kanqanku.

¹⁴Patros llajtata chinkachisaj. Zoán llajtaman ninata kachaykusaj. Tebas llajtatataj jasut'isaj.

¹⁵Egiptota jark'aj Sin nisqa llajtamantaj, k'ajaj phiñakuyniyta urmachimusaj. Tebas llajtapi kaj ashkha runasta tukuyninta chinkachisaj.

¹⁶Egipto jallp'ata ninawan jap'iykuchisaj. Sin llajtaqa jatun nanaywan q'ewiykachakonqa. Tebas llajtataj t'unaykusqa kanqa, Menfis llajtapajrí llakiynin mana tukukuyniyoj kanqa.

¹⁷On nisqa llajtapi kaj waynas, jinallataj Bubastis llajtapi kaj waynaspis espadawan wañurachisqas kanqanku. Puchoj warmistataj presosta apakaponqanku.

¹⁸Egiptoj atiyninta p'akejtiy, atiyniyrayku wapuyayninta chinkachejtiytaj, Tafnes nisqa llajtapajqa chay p'unchaypi inti laqhayaykonqa. Egipto llajtatataj urphuykonqa, ranchosnimpi tiyakojkunatataj presochaspa apanqanku.

¹⁹Egiptopi tukuy imasta cheqanman churasaj. Chaypacha yachanqanku noqa Señor kasqayta.

²⁰Chunka ujniyoj wataña kashajtin, ñaupaj killamanta qanchis p'unchaynimpi Señor parlamuwaspa niwarqa: Runa, Egiptopi rey kashan chay faraompa makinta p'akini, manataj pipis jampiwan churaykuspa mayt'uykunchu, watejmanta kallpachakuspa espadata jap'inampaj.

²²Chayrayku, Señorqa kay jinata nin: Egiptoj rey faraompa contranta sayarini. Iskaynin makisninta p'akirasaj sano kajta, chantá p'akisqa karqa chaytawan. Ajinamanta espadata makinmanta kacharichisaj.

²³Egipto runastataj waj llajtasman ch'eqerachisaj waj jallp'asman wijch'uraspa.

²⁴Babiloniaj reynimpa makisnintarí atiyniyojman tukuchisaj, espadaytataj makinman jaywasaj. Faraompa makisnintarí p'akirasaj, paytaj contrariompa ñaupaqempi maytapuni nanaywan waqanqa.

²⁵Babiloniaj reynimpa makisnintaqa kallpachasaj. Faraompa makisnintataj p'akirasaj. Espadayta Babiloniaj reynimpa makinman churajtiy, paytaj Egipto jallp'aj contrampi oqharikojtiy yachanqanku noqa Señor kasqaytaqa.

²⁶Egipcio runasta waj llajtasman ch'eqerachisaj, waj jallp'amantaj wijch'usaj, chaypacharaj yachanqanku noqa Señor kasqayta.