Read Quechua Bolivia DC Bible EZEQUIEL 31 Bible Online

EZEQUIEL 31 - Quechua Bolivia DC Bible bible

EZEQUIEL 31

¹Chunka ujniyoj watapi, kinsa kaj killanmanta ñaupaj kaj p'unchaynimpi, Señor parlamuwaspa niwarqa: Runa, Egiptoj reynin faraonman, jinataj tukuynin runasninman ima, kay jinata niy: Imamantaj jatun atiyniyoj kasqayki rijch'akunmanri?

³Ciprés sach'aman, chayri Libanopi kaj cedro sach'aman rijch'akunki, may k'acha ramasniyoj k'iski laqhesniyoj sumajta llanthushaj; chay jina jatun puntanqa phuyuskama chayan.

⁴Yakustaj wiñacherqanku, muyuynimpitaj yaku mayus correrqanku, yakusnintaj tukuy chay cheqapi kaj sach'asta qarparqa.

⁵Chay jina ashkha yakuyoj kaspa, chay montepi sach'asmanta aswan jatun wiñarqa, ramasnintaj thansayarqanku, tukuynejmantaj may jatuchaj wiñarqanku.

⁶Ramasnimpi tukuy laya p'isqos thapachakorqanku. Chay sach'aj urampi tukuy laya millay campo animales wachakorqanku. Llanthumpitaj manchay ashkha runas tiyakorqanku.

⁷Manchay sumaj sach'a karqa, jatuntaj sumaj ramasniyojtaj, saphisnin ashkha yakus qayllapi kasqanrayku,

⁸Diospa huertampeqa mana mayqen cedro sach'apis payman rijch'akorqachu. Mana mayqen pino sach'apis chay jina ramasniyojqa karqachu. Manapuni mayqen castaño sach'apis chay jina ashkha laqheraraqa karqachu. Diospa huertampeqa manapuni mayqen sach'api chay jina sumajpuneqa karqachu.

⁹Noqa chay jina sumajta ashkha ramasniyojta ruwarqani. Edempi kaj tukuy sach'as, Diospa huertampeqa paywan jap'inakorqanku.

¹⁰Chaynejta Señorqa kay jinata nin: Chay sach'aqa chay jina jatuntapuni wiñaspa, puntampis phuyuskama taripajtin, sonqompi jatun kasqanrayku anchatapuni jatunchakorqa.

¹¹Chayrayku noqa qhesachaniña. Aswampis waj llajtaspa kamachejnimpa makisninman jaywaykusaj, paytaj sajra ruwasqasninman jina paywan ruwanqa.

¹²Waj llajtasniyoj sajra runas payta k'utonqanku, wijch'urpayanqankutaj. Ramasnintaj p'akirasqamanta tukuy lomaspi, vallespi, wayq'ospi, chay jallp'apeqa tukuynejpi wijch'usqas kanqanku. Tukuy llajtastaj llanthumpi tiyakojkunaqa saqerpayaspa riponqanku.

¹³Chay urmasqa sach'api tukuy laya p'isqos tiyakonqanku. Tukuy laya millay animalestaj ramasnimpi winkonqanku.

¹⁴Chay jinamanta, ama ni mayqen sach'apis may jina yaku qayllapi kashaspapis, chay jinatapuni jatunta wiñaspa, nitaj puntan phuyuskama chayaspa, nitaj yakuwan qarpasqa kaj tukuy sach'as jatun kasqampi atienekunankupaj. Tukuyninku wañunankupaj juchachasqas kanku jallp'a ukhuman, maypichus tukuy runaspa wawasnin kashanku chaykunawan tantakunankupaj, ukhupachaman yaykushanku chaykunawan khuska.

¹⁵Señorqa kay jinata nin: Seol nisqa ukhu pachaman chay sach'a uraykorqa, chay p'unchaypi ukhu mar qochata yakuyojta llakiyta ch'akicherqani. Mayusninta sayaykuchispa ashkha yakusninta jark'aykorqani, chaymantataj Líbano orqota tutayaykucherqani, campopitaj tukuy sach'asta ch'akiykucherqani.

¹⁶Chay sach'ata urmacherqani, Seol nisqa ukhupachaman kachaykorqani wañorqanku chaykunawan khuska kanampaj. Chaypacha nacionespa kaj runas kharkatiterqanku. Edempi kaj tukuy ajllasqa sach'as, chantá Líbano orqopi aswan allin kajkuna, jinallataj yakuwan sumajta qarpasqa sach'aspis ukhupachapi kusikorqanku.

¹⁷Chay sach'aspis, llanthumpi naciones ukhupi tiyakojkunapis paywan khuska Seol nisqa ukhupachaman yaykullarqankutaj, espadawan wañurachisqas karqanku chaykunawan khuska.

¹⁸Edén huertapi kaj sach'amantaqa ni mayqen sach'apis qanman rijch'akorqachu, chay jina k'acha qhallallashaj jatun kasqaykiwanqa. Chaywampis Edempi kaj tukuy sach'aswan khuska ukhupachaman yaykunayki tiyan. Cheqa Diosta mana rejsejkunawan winkunki, ch'ajwapi espadawan wañurachisqaswan khuska. Chay sach'aqa faraonman, runasninmanwan ninakun. Noqa Señor chaytaqa nini.