Read Quechua Bolivia DC Bible EZEQUIEL 32 Bible Online

EZEQUIEL 32 - Quechua Bolivia DC Bible bible

EZEQUIEL 32

¹Chunka iskayniyoj wata kashajtin, chunka iskayniyoj killamanta ñaupaj kaj p'unchaypi, Señorqa parlamuwaspa niwarqa: Runa, Egiptoj reynimpajqa kay jina llakiy takinata takipuy: Llajtaspajqa uj uña leonman rijch'akunki. Mar qochapi kaj millay animalman rijch'akunki. Mayuykita ch'akicherqanki, chakisniykiwantaj yakuta qhonchuyacherqanki, yakutaqa cantosninman qhollchoqeyacherqanki.

³Señorqa kay jinata nin: Challwa jap'ina ch'ipayta pataykiman choqaykamusaj, chaywantaj ashkha runas chaupinmanta orqhomusonqanku.

⁴Chantá pampaman wijch'urpayaspa choqarpayasqayki. Tukuy p'isqosta pataykiman tiyaykuchimusaj, aychaykiwantaj tukuy campopi kaj millay animalesta sajsachisaj.

⁵Q'etayasqa aychaykita, lomasman, vallesman wijch'urasaj.

⁶Yawarniykiwan jallp'ata ch'aranchasaj, lomaskamataj wicharichisaj, yaku wayq'ostaj chay yawarniykiwan junt'aranqanku.

⁷Qanta wañurachispaqa janaj pachata laqhayachisaj. Qoyllurkunata laqhayachisaj. Intitapis phuyuykuchisaj, killataj manaña k'anchanqachu.

⁸Janaj pachapi k'anchajkunataqa qanrayku tukuyninta laqhayachisaj. Jallp'aykitapis laqhapi rikhurichisaj. Atiyniyoj Señor kaytaqa nin.

⁹Ashkha aylluspa sonqonkuta llakichisaj, mana rejsisqayki llajtaman, t'unasqa kasqaykita uyarichisaj chaypacha.

¹⁰Qannejta ashkha ayllusta jatun manchariywan t'ukushajta qhepachisaj, reyesninkutaj kharkatitenqanku ñaupaqenkupi espadayta oqharejtiy. Urmajtiykitaj tukuy runasñataj kausayninkumanta kharkatitenqanku.

¹¹Señorqa kay jinata nin: Babiloniaj reynimpa espadanqa pataykiman urmamonqa.

¹²Aswan atiyniyoj soldadospa espadannejta chay ashkha ayllusniyki wañurachisqas kanqanku. Paykunaqa mana pej atipay atinan llajtasmanta kanku. Egiptoj sajra kaynintaqa paykuna chinkachenqanku, chay ashkha soldadosnimpis tukuyninku chinkachisqas kanqanku.

¹³Ashkha yakus patapi michina uywasniykita wañurachisaj. Manaña runasqa, nitaj animalespis chay yakuta saruspa qhonchuyachenqankuchu.

¹⁴Chaypacha yakusta ch'uwayachisaj, mayusnimpitaj yakusta aceiteta jina correchisaj. Ajinata nin Señorqa.

¹⁵Egipto llajtata ch'in pampaman tukuchisaj, jallp'asnintataj mana runayojta, nitaj imayojta saqejtiy, chaypacha noqa Señor kasqayta yachanqanku.

¹⁶Kay takeyqa wañusqaspaj. Nacionesmanta kaj warmis kay takiytaqa takenqanku. Egipto llajtamanta, chantá ashkha runasninmantawan yuyarispa chaytaqa takiponqanku. Noqa Señormin kaytaqa nini.

¹⁷Chunka iskayniyoj wataña kashajtin, chunka iskayniyoj killamanta chunka phishqayoj p'unchaynimpi, Señorqa parlamuwaspa niwarqa:

¹⁸Runa, wañusqaspaj takinata takipuy Egiptopi tiyakoj ashkha runaspaj. Jallp'a ukhuman choqaykuy atiyniyoj nacionespi kaj nacionesmanta kaj warmistawan khuskata, maymanchus wañojkuna rinku chayman.

¹⁹Qanqa ujkunamanta aswan k'achituchu kanki? Mana Diospa ajllasqasnin juchasapaswan khuska ukhupachaman yaykuysikuy.

²⁰Espadaswan wañurachisqaswan khuska urmanqanku. Espadaqa wakisqaña kashan. Paykunawan khuska ashkha runaspis ripullanqankutaj.

²¹Seol nisqa jallp'a ukhumanta, jatun atiyniyojkunaman parlasqanku, payta yanapajkunawan, paykunaqa ukhu pachaman yaykorqanku, Diosta mana creejkuna, wañurachisqas karqanku chaykunawan kakunampaj.

²²Asiria llajtaqa chaypi kashan, soldadosninwan ima. Muyuyninkupitaj sepulturasninku kashan. Tukuyninku ch'ajwapi wañurachisqas karqanku.

²³Ukhu pachapi aswan ukhu kajman churasqas karqanku. Soldadosninkutaj muyuyninkupi kashanku, tukuy paykunaqa ch'ajwapi espadawan wañuchisqas karqanku. Paykuna waj tiempospeqa kausayniyoj runas ukhupi manchachej kanku.

²⁴Elam nisqa ayllupis chaypi p'ampasqa kashan, tukuy soldadosnintaj muyuynimpi. Tukuyninku espadawan wañurachisqas karqanku. Tukuyninku paykunaqa mana circuncidasqas, aswan ukhu kajman yaykonqanku, imaraykuchus paykunaqa kausajkunaj jallp'asninkupi runasta manchacherqanku. Kunantaj p'enqaypi rikhurinku wañojkunaj chaupinkupi.

²⁵Elampajqa wañusqa soldadosnimpa chaupimpi puñunata wakichiporqanku, sepulturampa muyuynimpitaj tukuy soldadosnin p'ampasqas karqanku. Tukuy paykunaqa mana circuncidasqaschu espadawan wañurachisqas karqanku. Paykunaqa kausajkunata manchacherqanku. Kunantaj paykunaqa p'enqayta ukhu pachapi wañusqakunaj chaupimpi pisipaj qhawasqas kashanku. Paykunaqa wañusqaspa chaupimpi churasqas karqanku.

²⁶Mesec aylluwan, Tubal nisqa aylluwan chayllapitaj kashanku. Tukuy soldadosnimpis chay muyuynimpi p'ampasqas kashanku. Tukuyninku paykunaqa mana circuncidasqas karqanku, espadawan wañurachisqastaj karqanku, imaraykuchus paykunaqa waj tiempopi kausajkunata manchacherqanku jallp'asninkupi.

²⁷Mana paykunaqa ñaupajta wapu maqanakojkunawanchu p'ampasqas kashanku, armasninkuwan, espadasninkuwantaj umanku uraman churaykukuspa p'ampakorqanku chaykunawan khuskachu p'ampasqas karqanku. Juchasninkoqa tullunkoj patampi kanqanku, imaraykuchus paykunaqa atiyniyojkunamanta aswan atiyniyoj kaspa, kausajkunaj jallp'ankupi kaspa manchacherqanku.

²⁸Egipto llajta, qanqa chaypi kanayki tiyan, mana circuncidasqas chaupimpi t'unasqa, espadaswan wañurachisqaswan khuska p'ampasqa kanayki tiyan.

²⁹Edom llajtapis chaypi kashan, reyesninkuwan kamachejkunasninkuwan ima, atiyniyoj kasqankuwampis espadawan wañurachisqaswan p'ampasqas karqanku. Paykunaqa mana circuncidasqaswan winkonqanku, ukhu pachaman yaykojkunawan khuska.

³⁰Wichaynejmanta atiyniyojkuna kamachejkuna karqanku tukuyninku Sidón ayllupi kaj runas, paykuna manchayta runasta manchachej kanku, kunantaj wañojkunawan khuska p'enqaymanta junt'a jallp'a ukhuman p'ampasqas kanku. Espadawan wañurachisqas karqanku chay mana circuncidasqa runaswan, ukhu pachaman yaykunaku, chaykunawan khuskachakuspataj t'ukuypi tarikunku.

³¹Faraonqa runasninta wañusqasta rikuspa kusikonqa. Faraonqa tukuy soldadosninwan ima, ch'ajwapi wañuchisqas karqanku. Noqa Señormin kaytaqa nini.

³²Noqamin jallp'a patapi kausaj runasta manchacherqani. Chantá faraompis, mana circuncidasqa runas wañurachisqas karqanku chaykunawan p'ampasqas kanqanku. Noqa Señormin kaytaqa nini.