Read Quechua Bolivia DC Bible EZEQUIEL 34 Bible Online

EZEQUIEL 34 - Quechua Bolivia DC Bible bible

EZEQUIEL 34

¹Señorqa parlamuwarqa, niwarqataj: Runa, Israelpi michejkunaj contranta parlay, niytaj paykunata: Atiyniyoj Señorqa kay jinata nin: Way, qanmanta Israel aylluta michejkuna. Qankunaj allinnillaykichejta qhawakunkichej! Manachu michejkunaqa ovejasta michinanku tiyan?

³Qankunaqa lecheta ujyankichej, millmamantataj p'achasta ruwakunkichej. Sumaj wira ovejastataj ñak'aspa mikhunkichej, oveja tropatataj mana qhawankichejchu.

⁴Tulluyajkunata mana kallpachankichejchu, onqosqastapis mana jampinkichejchu. Chakin p'akisqastapis mana trapowan mayt'uykunkichejchu. T'aqarakojkunata mana tropaman kutirichimunkichejchu, nitaj chinkasqastapis mask'amunkichejchu. Astawampis oveja tropataqa munayniykichejman jina ñak'arichispa sinch'iwan sajra sonqowantaj qhatiykacharqankichej.

⁵Ovejasneyqa mana michejniyoj rikhurerqanku, ch'eqerakorqankutaj. Campospi kaj millay khurustaj mikhurarqanku.

⁶Ovejasneyqa tukuy lomasnejpi jatuchaj orqosnejpi chinkasqas purerqanku, tukuynejpi ch'eqerasqas karqanku, manataj pipis paykunamanta llakirikojkuna karqankuchu, nitaj mask'amojkunapis.

⁷Chayrayku, michejkuna Señorpa palabranta allinta uyariychej: Noqa Señorqa kausayniyrayku jurani: Ovejasniytaqa campopi kaj tukuy laya khurus jap'ispa mikhuykorqanku mana michejniyoj kasqankurayku. Michejkunasneyqa ovejasniyta mana mask'amorqankuchu. Michejkunaqa paykunalla allin mikhusqas kanallankumanta dakorqanku, ovejasniytataj mana michipuwarqankuchu.

⁹Chayrayku michejkuna Señorpa palabrasninta uyariychej: Atiyniyoj Señorqa kay jinata nin: Noqa michejkunaj contrampi sayarini, ovejasniytaqa paykunaj makisninkumanta mañakapusaj. Manañataj astawan ovejasniyta michenqankuñachu, amaña paykuna kikillankuta allimpi qhawakunankupaj. Ovejasniyta paykunaj siminkumanta qhechurakapusaj, manañataj ovejasniyta mikhonqankuchu.

¹¹Atiyniyoj Señorqa kay jinata nin: Noqa kikiy ovejasniyta mask'aj risaj, michikapusajtaj.

¹²Imaynatachus uj michejqa ch'eqerasqa ovejasnin chaupipi rikhurispa rejsirakapun, ajinata noqapis ovejasniyta rejsirakapusaj. Mayqen cheqamanchus phuyusqa p'unchaypi ch'eqerakaporqanku chaykunamanta tarikampusaj.

¹³Waj llajtasmanta orqhomuspa ujllaman tantaykuspataj kikin jallp'ankuman qhatikapusaj. Israel lomaspi michisaj, tukuy wayq'osnimpi, runaj tiyakunanku chay tukuy jallp'aspi ima.

¹⁴Israelpa pata lomasnimpi sumachaj pastosta mikhuchimusaj. Chaynejpi puñukonqanku, may sumachaj pastostataj mikhukonqanku.

¹⁵Noqa ovejasniytaqa michikusaj, noqallataj puñuchikusaj, nin Señorqa.

¹⁶Chinkasqasta noqa mask'amusaj. Ch'eqerasqasta tropanman kutirichimusaj. Chakin p'akisqata trapowan mayt'uykusaj. Tulluyajkunata kallpacharisaj. Kallpayojkunata, wira kajkunatataj allinnimpaj qhawasaj. Maychus kajta noqa qhawasaj.

¹⁷Qankuna ovejasneyqa allinta uyariwaychej, Señorqa kay jinata nin: Noqa cheqanchasaj sapa uj ovejata. Jinallataj toro ovejasta, chivostapis cheqanchasaj.

¹⁸Pisichu karqa sumachaj pastosta mikhusqaykichejqa, puchojtataj chakisniykichejwan sarusqaykichejqa? Ch'uwa yakusta ujyaytawan chakisniykichejwan chay yakusta qhonchuyachisqaykichejqa mana allinchu karqa.

¹⁹Ovejasneyqa sarusqaykichej pastosta mikhunku, chakisniykichejwan qhonchuyachisqaykichej yakusta ujyanku.

²⁰Chayrayku Señorqa kay jinata nisunkichej: Tulluyasqa ovejastawan, wirayasqa ovejastawan cheqanchasaj.

²¹Qankunaqa tulluyasqa ovejasta tanqaspa karunchacherqankichej. Wajraspataj tullu ovejasta jawaman ayqecherqankichej.

²²Noqataj ovejasniyta salvasaj, manañataj jayk'ajpis suwanqankuñachu. Ovejapurata cheqanchasaj.

²³Noqa David kamachiyta kutirichimusaj, payta ovejasniyta michinampaj churasaj. Pay ovejasniymanqa sumaj pastosta mikhuchipuwanqa, sumajtataj qhawanqa.

²⁴Noqa Señor Diosnin kasaj, David kamachiytaj jatun kamachejnin kanqa, Noqa Señormin kaytaqa nini.

²⁵Sonqo tiyaykuchej tratota paykunawan ruwasaj, jallp'amantaqa tukuy millay khurusta wijch'usaj, ovejasniy mana ima llakiyniyoj ch'in pampaspi tiyakunankupaj. Orqospitaj mana ima llakiyniyoj puñukonqanku.

²⁶Ovejasniytaqa santo lomaypa muyuyninman churasaj, tukuy ima junt'asqasta tiyachisaj. Tiempompi parachimusaj, chay parataj paykunaj allinnimpaj kanqa.

²⁷Campospi kaj sach'asqa sumajta poqonqanku. Jallp'astaj sumaj poqoyta qonqanku. Ajinamanta ovejasneyqa kikin jallp'ankupi mana ima llakiyniyoj kausanqanku. Noqa aylluyta kacharichisaj, pikunachus ñak'aricherqanku chaykunaj makisninmanta, chaypacharaj noqa Señor kasqayta yachanqanku.

²⁸Waj llajtayojkunaqa manaña ujtawan paykunata presochanqankuchu, nillataj campospi kaj millay khuruspis paykunata mikhonqankuchu. Astawanqa mana ima llakiyniyoj, nitaj piwan mancharichisqas tiyakonqanku.

²⁹Tukuymanta aswan sumajta poqoj chajrasta churapusaj, manataj ujtawan yarqhaywan chay jallp'apeqa tukukonqankuchu, nitaj waj llajtayojkunapis paykunataqa astawan asipayanqankuchu.

³⁰Chaynejta yachanqanku noqa Señor Diosninku paykunawan kasqayta, Israeltaj aylluy kasqanta, nin Señorqa.

³¹Qankunaqa ovejasniy kankichej, sumaj pastosniyoj jallp'api kaj tropa ovejasniy. Noqataj Diosniykichej kani, nin Señorqa.