Read Quechua Bolivia DC Bible EZEQUIEL 37 Bible Online

EZEQUIEL 37 - Quechua Bolivia DC Bible bible

EZEQUIEL 37

¹Señorqa makinwan llankharimuwarqa, Señorpa Espirituntaj uj valleman pusawarqa. Chay valletaj tulluswan junt'a karqa.

²Tukuy ladosman pusaykachawarqa chay tullus qayllasta. Tukuy pampaspi ashkha tulluswan junt'a karqa, chay tullustaj manchay ch'akisqas karqanku.

³Señorqa tapuriwarqa: Runa, kay tullusqa watejmanta kausayniyojman tukunkumanchu?, nispa. Noqataj nerqani: Señor, qan yachanki chaytaqa, nispa.

⁴Chaypachataj Señorqa niwarqa: Sutiypi chay tullusman willaray, niytaj: Ch'akisqa tullus, Señorpa palabranta uyariychej.

⁵Señorqa tullusman kay jinata nin: Noqa kausay samayta kausarinaykichejpaj churasqaykichej.

⁶Ankusta churaykusqaykichej, aychawantaj junt'arachisqaykichej, chantá qarachasqaykichej, chaymantaj kausay samayta churasqaykichej, chay jinamanta watejmanta kausankichej. Chaypacha yachankichej noqa Señor kasqayta.

⁷Señorpa kamachiwasqanman jina tullusman willararqani. Willashaspataj uj sonayta uyarerqani: Chaytaj jallp'a ikhakuy karqa. Tullusrí tantaykukorqanku sapa uj tullusninkuwankama.

⁸Chay tullustaj ankuchakorqanku, aychachakorqanku, qharachakorqankutaj, chaywampis mana kausay samayniyojrajchu kasharqanku.

⁹Chaypacha Señorqa niwarqa: Sutiypi kausay samayman niy: Señorqa kay jinata nin: Kausay samay, tawantin ladosmanta jamuy, wañusqasman kausayta samaykuy, kausanqankutaj.

¹⁰Kamachiwasqanwan jina parlarqani. Paykunamantaj kausay samay yaykorqa, chantá kausarerqanku, sayarerqankutaj. May ashkhapuni karqanku, manchay ashkha soldados jina.

¹¹Chaymanta Señorqa niwarqa: Runa, kay tukuy tullusqa Israel ayllu kashan. Paykunaqa kay jinata parlanakuspa purinku: Tullusninchejqa ch'akisqa kanku, suyayninchejtaj chinkapun, tukuyninchej t'unaykusqas kanchej, nispa.

¹²Chayrayku paykunaman kay jinata willaray: Israel ayllúy, noqa aya p'ampanaykichejta kicharisaj, chay sepulturamanta orqhomusqaykichej, chantá Israel jallp'aman pusamusqaykichej.

¹³Ayllúy, noqa aya p'ampanasniykita kicharispa chaymanta orqhomusqaykichej, chaypacharaj yachankichej noqa Señor kasqayta.

¹⁴Kausay samayniyta qankunaman qosqaykichej, kausankichejtaj, jallp'aykichejpitaj samachisqaykichej. Yachankichejtaj noqa Señor parlarqani chayta junt'asqayta, nin Señorqa.

¹⁵Señor parlamuwaspa niwarqa: Runa, uj k'aspita oqharispa chaypi qelqay kay jinata: Kayqa Judá ayllupaj, chantá payman tantakamorqanku chay israelitaspajwan. Chantá waj k'aspita oqharispataj chaypi qelqanki, Joseqa Efraimpa k'aspin, tukuynin Israel ayllu paywan tukuy paywan tantakamojkunawan.

¹⁷Chantá tantaykuy ujkuna ujkunata ujlla kanankupaj. Ajinamanta ujlla makiykipi kanqanku.

¹⁸Llajta masisniykichej tapurisojtinku: Manachu willawasqayku, imatataj kaywan yachachiyta munawaykuri?, nispa chayqa, paykunaman kutichiy: Señorqa kay jinata nin: Joséj k'aspinta jap'isaj, chaytaj Efraimpa makisnimpi kashan. Chantá jap'illasajtaj Israelpa ayllusnin payman ujchasqas kashanku chaykunata. Chaymanta Judáj k'aspinwan ujllaman tantaykuspa uj k'aspillaman tukuchisaj, makiypeqa ujlla kanqanku.

²⁰Iskay k'aspipi qelqaranki chay k'aspitataj paykunaj rikunanta jap'inki.

²¹Paykunaman ninkichej: Atiyniyoj Señorqa kay jinata nin: Israelpa wawasnintaqa, maymanchus rerqanku chay llajtasmanta orqhomusaj, tukuynejmanta tantaykamusaj, jallp'ankumantaj kutirichimusaj.

²²Kay jallp'apitaj paykunata uj nacionllaman Israelpa lomasninman tukuchisaj. Uj reyniyojlla kanqanku. Mana jayk'ajpis ujtawan iskay llajtaschu kanqanku, nitaj iskayman t'aqakuspapis sapa ujpis waj kamachejniyojchu kanqanku.

²³Manañataj qhasi mana kaj dioskunapi ch'ichichakonqankuchu, ni millay puriyninkupi, nitaj sajra ruwayninkupipis, chaykunanejta juchallikorqanku. Noqa paykunata llimphuchasaj. Ajinamanta aylluy kanqanku, noqataj paykunaj Diosninku kasaj.

²⁴David kamachiy paykunaj reyninku kanqa, uj k'acha michejniyojlla tukuninku kanqanku. Leyesniyta kasonqanku, kamachisqasniytataj ruwaspa junt'anqanku.

²⁵Kamachiy Jacobman qorqani chay jallp'api tiyakonqanku, ñaupa tatasninku tiyakorqanku chaypi. Chay jallp'api paykuna wiñaypaj tiyakonqanku, wawasninku, paykunaj mirayninku ima. Kamachiy Davidtaj paykunaj kuraj kamachejninku kanqa wiñaypaj wiñaynintinkama.

²⁶Paykunawan uj sonqo tiyakuy tratota ruwasaj, mana jayk'aj tukukojta. Paykunata ashkhaman mirachisaj, sumajtataj tiyaykuchisaj. Paykuna chaupipi Diosta yupaychana, ajllakusqay wasiyta wiñaypaj sayachisaj.

²⁷Paykunawan khuska tiyakusaj. Noqa paykunaj Diosninku kasaj, paykunataj aylluy kanqanku.

²⁸Paykuna chaupipi Diosta yupaychana wasiyta churaspa wiñaypaj tiyakojtiy, waj jallp'asmanta kaj runas yachanqanku, Israel aylluta noqa Señor, noqapaj ajllakusqayta.