Read Quechua Bolivia DC Bible EZEQUIEL 39 Bible Online

EZEQUIEL 39 - Quechua Bolivia DC Bible bible

EZEQUIEL 39

¹Qan ari runa, Gogpa contrampi parlaspa niy: Señorqa kay jinata nin: Gog, noqa contraykipi kani. Qanqa Mesecpata, Tubalpatawan jatun kamachejninku kashanki.

²Noqa qanta t'unaykusqayki, pusarimusqayki, wichaynejmantataj wicharichimusqayki, chantá Israelpa lomasnin patasmantaj pusamusqayki.

³Lloq'e makiykipi kaj flecha k'uru k'aspiykita p'akerparisaj, flechasniykitataj paña makiykimanta pampaman urmachisaj.

⁴Israelpa alto lomasnin pataspi qan wañunki tukuynin soldadosniykiwan khuska, tukuy llajtasmanta kaj runas qanwan karqanku chaykunaqa urmallanqankutaj. Aychata mikhoj tukuy laya p'isqosman, chantá campopi kaj millay animalesmantaj mikhusunankupaj jaywasqayki.

⁵Qanqa ch'in pampaspi wañunki, imaraykuchus noqa kayta parlani, nin Señorqa.

⁶Magogman, mar qocha cantopi mana imamanta llakiyniyoj tiyakushanku chaykunamampis ninata kachaykamusaj. Chaypacha rejsiwanqanku noqa Señor kasqayta.

⁷Israel aylluy ukhupi santo sutiyta rejsichisaj, nitaj jayk'ajpis santo suteyqa ch'ichichasqachu kanqa. Waj jallp'aspi kaj runastaj noqa Señorqa llimphu kasqayta Israelpi yachanqanku.

⁸Chay tukuy imas qayllapiña, junt'akonqataj nin Señorqa. Kay p'unchaymanta parlarqaniña.

⁹Israelpa llajtasnimpi tiyakojkuna llojsimonqanku, ninata jap'ichispa armasninkuta enqhanqanku, juch'uy escudosta, jatuchaj escudosta, flechanapaj k'uru k'aspista, wañuchinapaj ruwasqa puntayoj k'aspista, fierro puntayoj k'aspista, lanzasta ima. Chay imastaqa qanchis wata junt'ata ninaman enqhanqanku.

¹⁰Chaywanqa manaña campomanta llant'ata pallamonqankuchu, ni montesmantapis ch'ejtamonqankuchu, manachayqa chay armasllata enqhakonqanku. Paykunamanta ñaupajpi imasninkutachus qhechurararqanku, chay runasmanta paykunañataj qhechuranqanku. Ñaupajpi paykunamanta kapuyninkuta suwarqanku, chaykunamantataj paykunañataj suwanqanku. Kaytaqa Señor nin.

¹¹Chay p'unchaykunapi Gogman uj cheqanta Israelpi qosaj chaypi ayanta p'ampanampaj, Abarim nisqa vallepi, chaytaj kashan qocha chimpapi. Chaytaj chayninta purejkunata jark'anqa. Chaynejpi Gogtaqa p'ampanqanku, tukuynin jatun tropa soldadosnintawan. Chay cheqatataj Gogpa vallen nispa sutichanqanku.

¹²Israel ayllumanta kaj runastaj, qanchis killa junt'ata p'ampashallanqankupuni jallp'ata llimphuchanankurayku.

¹³Tukuy runas ayasta p'ampaspa kanqanku chay p'unchaykunapi. Chay p'ampajkunapajtaj uj may jatun p'unchay kanqa, noqa jatun k'anchayniypi rikhurikusaj chaypacha, nin Señorqa.

¹⁴Chay qanchis killa pasasqanmantapis, uj t'aqa runasta kachanqanku, mana p'ampasqa ayasta tarispa p'ampamunankupaj, ajinamanta jallp'ata llimphuchanankupaj.

¹⁵Chay runasmanta mayqellampis wañusqa runaj tullusninta rikuspa, ladompi uj señalta churaykonqa, ayasta p'ampajkuna Gogpa vallempi p'ampaykamunankupaj.

¹⁶Chay llajtataqa sutichallanqankutaj soldadosniyoj nispa. Ajinata jallp'ataqa llimphuchanqanku.

¹⁷Runa, Señorqa kay jinata nisunki: Tukuy laya p'isqosman chantá campopi kaj tukuy millay animalesmampis kay jinata niy: Tukuynejmanta tantaykukuspa jamuychej, Israelpa lomasnimpi uj jatun ñak'arakuta ruwasaj, chaytaj qankunapaj kanqa, aychata mikhunkichej, yawartataj ujyankichej.

¹⁸Sinch'i runaspa aychankuta mikhunkichej, chay jallp'api kamachejkunaj yawarnintataj ujyankichej. Tukuy paykunaqa: carneros, corderos, chivos, waka toros ima, Basán jallp'api wirayasqas jina kanku.

¹⁹Wañurachipusqaykichej chaykunamantaqa wirata sajsanaykichejkama mikhunkichej. Yawartataj machanaykichejkama ujyankichej.

²⁰Señorqa kay jinata nin: Jatun mikhunata wakichipusqaykichej caballospa aychanmanta, sinch'i runaspa aychanmanta, maqanakoj runaspa aychanmantawan sajsanaykichejkama mikhunaykichejpaj.

²¹Ajinata, nacionespa ñaupaqempi jatun kayniyta rikuchisaj. Tukuy nacionespi kaj runas rikonqanku, paykunata imaynatachus cheqancharqani, jasut'erqanitaj chayta.

²²Chay p'unchaymantapacha ñaupajman Israel aylloqa noqa Señor Diosnin kasqayta yachanqa.

²³Waj jallp'asmanta kaj runas yachanqanku, israelita runasqa juchasninkurayku waj llajtasman presos apasqas kasqankuta. Contraypi sayarisqankurayku paykunata saqerasqayta, astawanqa enemigonkoj makinman jap'ichisqayta, espadawan wañurachisqas kasqankuta ima.

²⁴Millay purisqankuman jina, contraypi sayarisqankuman jinataj paykunata ajinata ruwarqani, manataj paykunataqa qhawariyllatapis munarqanichu.

²⁵Chayrayku Señorqa kay jinata nin: Kunanqa Jacobpa mirayninta kutirichimpusaj, Israel ayllumantaqa tukuyninkumanta khuyakusaj, santo sutiyta ama ch'ichichanankuta mana saqesajchu.

²⁶Paykunataj p'enqayta purisqankumanta qonqaponqanku, noqaj contrayta mana kasuwaspa sajra imasta ruwasqankuta qonqaponqanku, jallp'ankupi mana ima llakiyniyoj, manataj pi mancharichejniyoj tiyakonqanku.

²⁷Llajtas chaupimanta enemigosninkoj jallp'ankumanta orqhomuspa paykunata tantaykusaj, santo kasqaytataj ashkha nacionkunaj ñaupaqempi rikuchisaj chaypacha.

²⁸Waj llajtasman presochasqata apacherqani, chantá watejmanta paykunata jallp'ankupi tantaykusaj, ni mayqenninkutapis paykunamanta saqerparispa, chaypacha noqa Señor Diosninku kasqayta yachanqanku.

²⁹Manañataj ujtawampis israelita runasmanta uyayta pakaykukusajchu, imaraykuchus Espirituyta paykunaman jich'amusaj, nin Señorqa.