Read Quechua Bolivia DC Bible EZEQUIEL 40 Bible Online

EZEQUIEL 40 - Quechua Bolivia DC Bible bible

EZEQUIEL 40

¹Iskay chunka phishqayoj watasña presochasqas kasqaykumanta chay wata qallariypi ñaupaj killamanta chunka p'unchaynimpi, Jerusalenta jap'isqankumantataj chunka tawayoj wataña kashajtin, chay kikin p'unchaypi Señorpa makimpi karqani, chantá chay llajtaman pusawarqa.

²Diosqa mosqoypi jina Israelpa jallp'anman pusamuwarqa. Chay loma patapitaj uray ladonejpi uj jatun llajtaman rijch'akoj karqa.

³Maymanchus Señor pusawarqa, chaypitaj uj qharita rikorqani. Chay qharitaj broncemanta ruwasqaman rijch'akorqa. Makimpi linomanta ruwasqa q'aytuta jap'isharqa, uj medinapaj uj soqosotawan, ajinata punkupi sayasharqa.

⁴Chay qharitaj parlamuwaspa niwarqa: Runa, ñawisniykiwan qhawariy, ningrisniykiwantaj allinta uyariy, tukuy yuyayniykitataj imastachus nisqayki chay tukuypi churay, imaraykuchus chay tukuy imasta noqa rikuchisunaypaj kayman Dios pusamusorqa. Israel ayllumanqa tukuy ima rikusqaykita willay.

⁵Diosta yupaychana wasej jawanqa perqawan muyuykusqa karqa. Chay qhari jap'isharqa chay soqosoqa kinsa metroyoj karqa. Chay perqata miderqa. Phatunmanqa kinsa metroyoj karqa, patamampis kinsa metroyojllataj.

⁶Chantá inti llojsimuynej punkuman rerqa, patillasninta llojsispa punku k'aspita kinsa metroyojta phatunman miderqa.

⁷Punku yaykunapi puraj ladopi wasis karqanku chaykunataj sayt'unman kinsa metroyoj karqanku, anchonmampis kikillantaj. Ujnin wasimanta ujninmantaj iskay metro khuskanniyoj karqa. Chantá, patio ukhuman yaykuna chaypi uj punku karqa Diosta yupaychana wasiman qhawarisqa. Chay punku sayantastaj sapa uj rakhunman kinsa metrosniyoj karqanku.

⁸Ajinallataj ukhuman yaykuna punkoqa kinsa metroyoj karqa.

⁹Chay qhareqa midillarqataj Diosta yupaychana wasiman yaykuna punkuta tawa metroyojta. Kallarqataj iskay sayantas. Kaykunataj uj metro rakhunman karqa, chantaqa ukhu ladonmanta chay punku karqa.

¹⁰Inti llojsimuy lado punkupi, sapa ladoman kinsa wasisniyoj karqa, chaykunataj uj rejlla karqanku. Sayantasnimpi kikillantaj karqanku.

¹¹Chantá chay qhareqa midillarqataj yaykuna punkuta: Kinrayninman phishqa metros karqa, yaykunataj sojta metros khuskanniyoj.

¹²Sapa uj wasej ñaupaqempi uj juch'uy perqata khuskan metrosniyoj sapa ladoman karqa. Chay wasistaj sapa ujninku kinrayman kinsa metrosniyoj karqa, sayt'unmampis jinallataj.

¹³Chantá yaykuna kaj punkuta tukuyninta miderqa, ujnin techomanta ujnin techoman, iskay chunka iskayniyoj metros khuskanniyoj karqa.

¹⁴Sayantasta midillarqataj patiopi kajkunata tukuyninta kinsa chunka metrosniyojta, jinallataj punkupi muyuykusqa kajkunatapis.

¹⁵Sayt'unmantaj chay punkoqa jawamanta ukhunkama iskay chunka phishqayoj metros karqa.

¹⁶Chay wasistaj k'ullku ventanasniyoj karqanku, jinallataj punkuspis yaykuna cheqamanta ukhunejman tukuy muyuynimpi. Corredores nisqa cheqaspis kikillantaj karqa. Ventanasqa ukhunejpi, muyuynimpi ima kikillantaj karqa. Sapa sach'apitaj palma sach'a ruwasqas karqa.

¹⁷Chaymanta jawa patioman pusawarqa. Chaypi wasis karqanku, tukuy ukhu pampantaj rumiwan mast'asqa karqa. Chay patiopeqa muyuynimpi kinsa chunka wasis karqa.

¹⁸Punkus ladospi churasqa rumi mast'asqaqa, aswan uranejpi karqa chayqa, yaykuna chay punku uranejpi sinrulla churasqa karqa, chaytaj anchonman, sayt'unmampis uj rejlla karqa.

¹⁹Midillarqataj anchonman ura punku chimpanmantapacha, ukhu patioj jawa punkunkama, phishqa chunka metro midikorqa, inti llojsimuy ladoman, wichay ladomampis.

²⁰Jawa patioj patanej punkumanta midillarqataj sayt'unman, jinallataj anchonmampis.

²¹Chay punkupeqa sapa ladopi kinsa wasis karqa. Sayantasnin, chantá corredornimpis ñaupaj punkojta jinallataj karqa, Sayt'unman iskay chunka metrosniyoj, anchonmantaj chunka iskayniyoj metros khuskanniyoj.

²²Ventanasnin corredornimpis, palma sach'a ruwasqasnimpis, inti llojsimuynejpi punkojta jinallataj midikorqa, chaymanqa qanchis patillasta wicharina karqa. Ñaupaqenkupitaj corredornin karqa.

²³Ukhu patiopi uj punku karqa wichaynejman qhawarisqa, jinallataj inti llojsimuynejpipis. Uj punkumanta ujnin punkukama runaqa miderqa phishqa chunka metrosta.

²⁴Chaymanta runa pusawarqa uranejman, chaypi punku kallarqataj. Sayantasnin corredorkunasnimpis chay ujkunajta jinallataj medidan karqa.

²⁵Muyuynimpi ventanasnin karqa ujkuna jinallataj. Sayt'unman miderqa iskay chunka phishqayoj metros, anchonmantaj chunka iskayniyoj metros khuskanniyoj.

²⁶Qanchis patillasta wicharina karqa, ñaupaqempitaj patioyoj karqa. Sayantasnimpirí puraj uyampi palma ruwasqa sach'asniyoj karqa.

²⁷Ukhupi kaj patioqa uranejman punkuyojllataj karqa. Uray punkoqa, punkumanta uj punkuman, phishqa chunka metrosniyoj karqa.

²⁸Punkunta pusaykuwaspa ukhu kaj patioman pusawarqa. Chantá chay uray kaj punkuta midejtin, chay ujkuna chhikallantaj karqa.

²⁹Wasi sayantasnin, arcosnimpis uj rejlla karqanku, chay ujkuna chhikachajllataj. Muyuynimpi karqa ventananwan, corredornimpiwan. Chaykunataj sayt'unman midikorqa iskay chunka phishqayoj metros, anchunmantaj chunka iskayniyoj metros khuskanniyoj.

³⁰

³¹Corredornenqa jawa patioman qhawarisqa karqa, sayantasnimpis palma sach'a ruwasqasniyoj karqa. Chay punkunmantaj pusaj patillasta wicharina karqa.

³²Chantá pusallawarqataj ukhupi kaj patioman, inti llojsimuynejpi kaj punkunman. Yaykuna punkunta miderqa, chaypis chay ujkuna jinallataj.

³³Wasisninku, sayantasninku, corredoresninkupis chay ujkuna chhikachajllataj karqa. Muyuynimpi ventanasniyoj, zaguanniyoj ima karqa. Yaykuna chay punkutaj sayt'unman iskay chunka metrosniyoj karqa, anchunmantaj chunka iskayniyoj metros khuskanniyoj karqa.

³⁴Corredornenqa jawa pationejman qhawarisqa karqa. Sayantasnintaj puraj umampi palma ruwasqa sach'asniyoj karqa. Chay punkumantaj pusaj patillas wicharina karqa.

³⁵Chaymanta chay runaqa, wichaynejpi punkumanñataj pusawarqa. Chay yaykuna punkuta miderqa, chaytaj chay wakin punkus chhikallantaj karqa.

³⁶Wasisnin, sayantasnin, corredornin, ventanasnin ima muyuynimpi chay wakin punkus jinallataj karqanku. Chay yaykuna punkoqa, sayt'unman iskay chunka phishqayoj metros karqa, anchunmantaj chunka iskayniyoj metros khuskanniyoj karqa.

³⁷Corredorqa jawa patioman qhawarisqa karqa, sayantasnin puraj umampi palma ruwasqa sach'asniyoj karqa. Chay punkumantaj pusaj patillasta wicharina karqa.

³⁸Uj wasi kallarqataj yaykuna punkuman k'askasqa. Chaypi uywasta wañuchispa mayllaj kanku Diosman jaywanankupaj.

³⁹Punku yaykuna corredorpi tawa mesas karqanku. Sapa ladopi iskaykama churasqa karqanku. Chay mesas patapi wañuchej kanku, uywasta ruphachispa Diosman jaywanankupaj, jucharayku wañuchispa jaywanata.

⁴⁰Wichaynejpi corredor punku yaykuna jawapi, iskay mesas sapa ladopi karqanku.

⁴¹Puraj ladopi tawa mesaskama karqa. Tukuynimpi pusaj mesas karqa. Chay mesas patapi uywasta ñak'aj kanku.

⁴²Ruphachispa Diosman jaywana uywasta wañuchinapaj karqa chay tawa mesasqa rumimanta ruwasqas karqanku. Qanchis chunka phishqayoj centímetros sayt'unan karqa, anchonmantaj qanchis chunka phishqayoj centimetrosniyoj, phatunmantaj phishqa chunka centimetrosniyoj karqa. Chay mesas pataman churaj kanku uywa ñak'ana imasta.

⁴³Wasi ukhu muyuynimpitaj ukhu ladoman q'ewisqa ganchos karqa sojta centimetrosniyoj. Chaykunapi uywasta ñak'ana imastaqa churaj kanku, ruphachispa jaywana uywastataj mesas pataman churaj kanku.

⁴⁴Ukhu patio punku jawapi iskay wasis karqanku. Ujqa wichay ladoman qhawarina punkupi karqa, chay wasej punkonqa uray lado qhawarisqa karqa. Uj wasitaj inti llojsimuy punku ladopi karqa, chayri wichay lado qhawarisqa karqa.

⁴⁵Runa niwarqa: Kay uray ladoman qhawarisqa waseqa, Diosta yupaychana wasita qhawaj sacerdotespata.

⁴⁶Wichay ladoman punkuyoj wasitaj altarta qhawaj sacerdotespata karqa. Paykunataj Sadocpa wawasnin karqanku. Levéj wawasninmanta kajkunalla Señorta sirvinankupaj wajyasqas karqanku.

⁴⁷Chay runa ukhu patiota miderqa, sayt'unman phishqa chunka metrosniyoj karqa, anchonmantaj phishqa chunka metrosniyojllataj. Altartaj Diosta yupaychana wasej ñaupaqempi kasharqa.

⁴⁸Runaqa Diosta yupaychana wasi punkuman pusawarqa, punkupi kaj sayantasta miderqa. Sapa ujtaj iskay metros khuskanniyoj rakhunman karqanku. Punkonqa anchonman qanchis metrosniyoj karqa, puraj lado perqantaj uj metro khuskanniyoj karqa.

⁴⁹Punkonqa sayt'unman chunka metrosniyoj karqa, sayt'unmantaj sojta metrosniyoj. Chay punkuman chunka patillasta wicharina karqa. Sapa sayanta qayllapi waj sayanta kallarqataj.