Read Quechua Bolivia DC Bible EZEQUIEL 43 Bible Online

EZEQUIEL 43 - Quechua Bolivia DC Bible bible

EZEQUIEL 43

¹Chaymantataj inti llojsimuy punku cheqaman pusawarqa.

²Rikorqani inti llojsimuy ladomanta Señorpa k'anchaynin jamushajta. Uj jatun sonay uyarikorqa jatun mayoj sonaynin jina, jallp'ataj lliphiperqa chay k'anchaywan.

³Chay mosqoypi jina rikusqayqa Jerusalenmanta t'unaykunampaj Señor jamojta rikorqani. Ajina karqa Quebar nisqa mayu cantopi rikorqani chay kikillantaj. Chayta rikuspataj pampakama k'umuykorqani.

⁴Señorpa k'anchaynintaj, inti llojsimuyninnejta punkunta Diosta yupaychana wasiman yaykorqa.

⁵Espíritu oqhariwaspa uqhu patioman pusaykuwarqa. Chaypi rikorqani Señorpa k'anchaynin Diosta yupaychana wasiman junt'aykusqata.

⁶Runa, noqa qayllapi sayashajtin, Diosta yupaychana wasimantapacha parlamojta uyarerqani, niwarqataj: Runa, kaymin tiyakunayqa, chakisniypa sarunampis. Kaypitaj Israelpa wawasninwan khuska wiñaypaj tiyakusaj. Israel aylloqa, manataj ujtawan jayk'ajpis santo sutiytaqa ch'ichichanqachu, nillataj reyesninkupis. Imaynatachus reyesninku wañojtinku, paykunaj lantinta ruwaj kanku chay jinataqa manaña ruwanqankuchu.

⁸Diosta yupaychana wasiman k'askasqata ruwakorqanku. Uj perqallawan t'aqaspa Diosta yupaychana wasita paykunaj wasinkutawan ruwarqanku, millay juchasta ruwaspataj sutiyta ch'ichicharqanku. Chayrayku may phiñakuyniypi paykunata wañuracherqani.

⁹Kunanqa, qhenchachakuy juchasninkuta, wañusqa reyesninkoj lantisnintapis karuman wijch'uchunku. Paykunawan khuskataj wiñaypaj tiyakusaj.

¹⁰Qantaj runa, Israel aylluman kay Diosta yupaychana wasita rikuchiy, juchasninkumanta p'enqakuchunku, Diosta yupaychana wasej medidantataj qhawarichunku.

¹¹Sichus millay purisqankumanta p'enqakonqanku chayqa allinta paykunaman rejsichiy, imayna ruwasqachus Diosta yupaychana waseqa chayta, imaschus chaypi tiyan chaykunata, llojsina punkusta, yaykunastapis, tukuyninku imayna ruwasqaschus kanku chay tukuyta. Rikuchillaytaj imaynatachus chay Diosta yupaychana wasipi tukuy imatapis ruwanankuta, chayman jina paykuna ruwanankupaj, imachus junt'ana kajta waqaychaspa. Qelqaykuytaj tukuy kamachiykunata paykuna junt'ayta atinankupaj.

¹²Diosta yupaychana wasej leynenqa kay jinamin: Diosta yupaychana wasej muyuynimpi loma patapi tukuy jallp'aqa ajllakusqay cheqa kanqa.

¹³Altarqa kay jina medidayoj karqa ñaupa medidaman jina. Altarpa muyuynimpi uj larq'a karqa, chaytaj khuskan metro ukhu karqa, anchonmantaj khuskan metro karqa. Chay larq'ataj jawa muyuynimpi lomachasqa karqa. Chaytaj iskay chunka centimetrosniyoj ukhunman karqa. Altarpa pampanqa kay jina karqa: Larq'a ukhumantapacha patakama iskay metros karqa. Pampa k'uchunamantapacha sayaynenqa iskay metrosniyoj karqa, anchonmantaj khuskan metroyoj karqa.

¹⁵Altarpa sayaynenqa iskay metrosniyoj pataman karqa, chay altar patapitaj tawa wajras karqa.

¹⁶Altarpa sapa ladosnin sojta metrosniyoj karqa.

¹⁷Chay altar patataj sapa ladonman qanchis metrosniyoj karqa. Muyuynimpi larq'as karqa chaytaj anchonman khuskan metroyoj karqa, puntasnin lomachasqataj iskay chunka phishqayoj centimetrosniyoj anchonman karqa. Altarman wicharina patillastaj inti llojsimuy ladopi karqa.

¹⁸Señortaj niwarqa: Señorqa kay jinata nin: Altar ruwasqa kanqa chaypachaqa kay ruwanas junt'akonqa: Uywa wañuchisqas chay altar patapi ruphachisqa kanqa, chay uywaj yawarninwantaj altar patasman ch'ajchus kanqa.

¹⁹Levita sacerdotesman, mayqenkunachus Sadocpa mirayninmanta kanku, kayta ninki: Paykunaqa noqaman qayllamuwachunku, nin Atiyniyoj Señorqa. Uj waka uñata paykunaman qonki juchankumanta jaywakunankupaj. Noqa Señor chaytaqa nini.

²⁰Yawarta jap'ispa altar patapi kaj tawantin wajras patanman ch'ajchuykunki, kikillantataj tawantin esquinasninman, cantompi oqharisqa muyuyninmanwan. Ajinata altartaqa llimphuchanki.

²¹Chantá juchamanta wañuchisqa waka uñata oqharispa, kamachisqaman jina Diosa yupaychana wasimanta jawanejman orqhospa ninapi ruphachinki.

²²Q'ayantintaj sumajnin kajta mana iman imanasqa chivota juchasrayku jaywanki, ajinata sacerdotesqa llimphuchanqanku, imaynatachus waka uñawan ruwarqanku ajinallatataj.

²³Kay llimphuchana ruwayta tukuspaqa mana iman imanasqa waka uñata, carnerotawan jap'inki.

²⁴Kaykunata Señorman jaywanki, sacerdotestaj chay uywa ñak'asqaman kachinchanqanku, chantá ruphachispa Señorman jaywanqanku.

²⁵Qanchis p'unchay junt'ata sapa p'unchay uj chivota jucharayku ñak'anqanku. Jinallatataj ñak'anqanku waka uñata, uj mana iman imanasqa karnerotawan.

²⁶Sacerdotesqa qanchis p'unchay junt'ata altarta may llimphu kanampaj llimphuchanqanku.

²⁷Chay p'unchaykunata junt'aspataj, pusaj kaj p'unchaymanta jaqaymanqa, sacerdotes chay altar patapi uywasta wañuchiytawan ninapi ruphachispa Diosman jaywanqanku, jinallataj allinyakuy jaywanatapis. Chaypacha noqa tukuy sonqo qankunawan allinyakusaj. Noqa Señormin kaytaqa nini.