Read Quechua Bolivia DC Bible EZEQUIEL 47 Bible Online

EZEQUIEL 47 - Quechua Bolivia DC Bible bible

EZEQUIEL 47

¹Runaqa Diosta yupaychana wasiman punku yaykunaman kutiykuchiwarqa. Chaypi rikorqani punku uramanta yakus llojsishajta. Inti llojsiynejmantaj yakoqa risharqa, Diosta yupaychana wasej paña ladonnejta, altarpa uray ladontataj.

²Chaymanta Diosta yupaychana wasimanta jawaman orqhowarqa, wichay lado punku kaj ñannintataj pusawarqa. Muyurichiwarqataj jawa ñannejta, inti llojsimuy punkukama. Rikorqanitaj punkoj paña ladonnejmanta yakus llojsimushajta.

³Chay qhareqa inti llojsimuy ladoman llojserqa, midinampaj uj q'aytuta oqharikuspa. Chantaqa phishqa pachaj metrosta miderqa. yakuta chimpachiwarqa chay yakutaj chaki moqoykama chayawarqa.

⁴Chaymanta uj phishqa pachaj metrostawan miderqa, yakuta pasachillawarqataj, kay kutipeqa qonqorniykama yakoqa chayawarqa. Phishqa pachaj metrostawan miderqa. Chantá ujtawan yakuta pasachillawarqataj. Kay kutipi yakoqa chakaykama chayawarqa.

⁵Uj phishqa pachajtawan miderqa, kay kutipitaj uj jatun mayuña karqa, manaña yakuta chimpayta aterqanichu. Ukhu yakuyoj mayumanña tukupusqa, mana chimpay atina, wayt'aspalla chimpanapaj jinaña karqa.

⁶Chaypacha niwarqa: Runa, kayta rikunkichu? Chaymanta mayu cantonta kutirichiwarqa.

⁷Kutichishaspataj mayoj puraj cantompi ashkha sach'asta rikorqani.

⁸Chaypacha niwarqa: Kay yakusqa llojsishan, inti llojsimuynej cheqaman, Arabá nisqaman uraykonqa, wañusqa mar qochamantaj yaykonqa. Chayman chayajtintaj yakoqa misk'iyanqa.

⁹Mayllamampis kay iskay mayus yaykojtinku tukuy laya animales chay yakuspi kausanqanku. Ashkha challwastaj kanqanku. Mayllamampis kay yakus chayaspaqa millu yakusta misk'iman tukuchenqa, mayllamampis kay yaku chayanqa chaypi kausay kanqa.

¹⁰Engadi nisqamantapacha, En-englaim nisqakama challwa jap'ejkuna sayanqanku, chaynejpitaj challwa jap'ina ch'ipasninkuta mast'aspa ch'akichikonqanku. Chaynejpitaj may ashkha, tukuy laya challwas kanqanku, Mediterráneo nisqa mar qochapi kanku chay kikin challwas.

¹¹Qhochi pampasninku juch'uy qochasninkupis mana jampisqaschu kanqanku, manachayqa k'ara yakuslla chaykunapi kanqa, kachita orqhonallapaj allin kanqa.

¹²Frutasta poqoj tukuy laya sach'as chay mayuspa puraj ladosnimpi wiñanqanku. Chay sach'aspa laphisninku mana urmanqankuchu, poqoyninkutaj mana jayk'ajpis pisiyanqachu. Sapa killa poqoyta apanqanku, imaraykuchus Diosta yupaychana wasimanta llojsej yakuwan qarpasqas kanqanku. Poqoyninkoqa mikhunapaj allin kanqa, laphisnintaj jampipaj allin kanqa.

¹³Señorqa kay jinata nin: Israelpa chunka iskayniyoj ayllusninman chayaqenkupaj jallp'aqa t'aqasqa kanqa, kay jina mojonasqastaj kanqanku: Josemanqa iskay t'aqa jallp'as qosqa kanqa.

¹⁴Noqa jurarqani kay jallp'ata ñaupa tatasniykichejman qonaypaj. Kay jallp'ataqa sapa ujman chayaqempaj rak'irapuy. Kay jallp'aqa chayaqeyki kanqa.

¹⁵Wichay ladoman kay jallp'aj mojonesnenqa kay jina kanqa: Mediterráneo nisqa mar qochamanta qallarispa, Hetlon nisqa llajtanejta, chantá Zedadpi kaj llajtakunaj ñanninmanta kanqa.

¹⁶Berutaninta, Sibrainninta ima, chay llajtastaj kanku Hamat nisqa jallp'awan tinkuypi. Chaymanta rillampuni Hazar-aticón nisqanejta, chaytaj Haurán nisqa mojonwan tinkun.

¹⁷Ajina mojonasqa kanqa wichaynejmanqa, Mediterráneo nisqa mar qochamanta qallarispa, Hazar-enán nisqakama. Damasco nisqa jallp'aqa Hamat nisqa jallp'awan wichay ladopi tarikonqa.

¹⁸Inti llojsimuy ladopi kaj mojonestaj, kay jina kanqa: Haurán nisqa jallp'aj, Damasco jallp'aj chaupinta llojsenqa, Galaad jallp'ata, Israel jallp'atawan Jordán mayu t'aqanqa, inti llojsimuy ladopi kaj mar qochakama.

¹⁹Uray lado mojonestaj qallarikonqa Tamar nisqamanta, Meriba Gades nisqa yakuskama. Cadesmantapachataj wayq'onnejta, jatun mar qochakama renqa, chaytaj Mediterráneo nisqa mar qocha.

²⁰Inti yaykuy ladopi Mediterráneo mar qocha mojonqa kanqa, Hamatman yaykuna chimpankama.

²¹Kaymin chay jallp'aqa Israel ayllu ukhupi rak'irasqa kanqa chayqa.

²²Chayaqesta jap'ikunaykichejpaj chay jallp'a pataman suertesta choqankichej, jinallataj qankunawan khuska tiyakunku chay waj llajtasniyojkunapajpis. Qankuna ukhupi wawasniyoj kanku chaykunapaj ima. Paykunata Israelpa wawasninkupis kankuman jinata rejsikapunkichej. Qankunawan khuska suerteta choqanqanku Israelpa ayllusninwan khuska paykunapis chayaqenkuta jap'inankupaj.

²³Mayqen ayllupichá waj llajtayoj tiyakonqa, chaypi jallp'ata chayaqenkupaj qonkichej, nin Señorqa.