Read Quechua Bolivia DC Bible EZEQUIEL 48 Bible Online

EZEQUIEL 48 - Quechua Bolivia DC Bible bible

EZEQUIEL 48

¹Aylluspa sutisninku kaykuna kanku: Wichay cantomantapacha qallarispa, Hetlonninta, Hamatninta, Hazar-enanninta yaykuna kashan chayninta, Damascomanta, Hamatmantawan uray ladonejpi Dan ayllojta chayaqen kanqa, inti llojsimuy ladomantapacha inti yaykuy ladokama.

²Dampa ladompi, inti llojsimuy ladomantapacha mar qocha ladomanqa Aserpa chayaqen kanqa.

³Aserpa jallp'ampa ladompitaj inti llojsimuy ladomantapacha, mar qochakama Neftalejpa chayaqen kanqa.

⁴Neftaléj jallp'ampa ladompitaj, inti llojsimuy ladomantapacha, mar qocha ladokamataj, Manasespa chayaqen kanqa.

⁵Manasespa jallp'ampa ladompitaj inti llojsimuy ladomantapacha mar qocha ladokama, Efraimpa chayaqen kanqa.

⁶Efraimpa jallp'ampa ladompitaj, inti llojsimuymantapacha mar qochakama Rubempa chayaqen kanqa.

⁷Rubempa jallp'ampa ladompitaj inti llojsimuy ladomantapacha mar qocha ladokama, Judajpa chayaqen kanqa.

⁸Judajpa jallp'ampa ladonmantapachataj, inti llojsimuy ladomantapacha mar qocha ladokama jallp'a puchonqa. Chaytaj anchonman kanqa iskay legua khuskanniyoj, sayt'unmampis kikillantaj midikonqa. Chay jallp'aqa, ujkuna jinallataj midisqa kanqa, inti llojsimuy ladomantapacha mar qocha ladokama. Diosta yupaychana wasitaj chay jallp'a chaupipi kanqa.

⁹Señorpaj t'aqankichej chay jallp'aqa iskay legua khuskanniyoj sayt'unman kanqa. Anchonmantaj iskay legua kanqa.

¹⁰Kay jallp'a chaupipitaj, sacerdotesllapaj t'aqasqa jallp'a kanqa. Chaytaj wichay ladomanta uraynejman midikonqa iskay legua khuskanniyoj. Inti llojsimuy ladomanta inti yaykuy ladoman uj leguayoj kanqa. Chay chaupipitaj Señorpa wasin kanqa.

¹¹Kay tukuy jallp'aqa, Sadocpa mirayninmanta kaj sacerdotespaj t'aqasqa kanqa. Paykunaqa kamachisqasniyta ruwarqanku, mana ñanniymantaqa pantarqankuchu Israelpa wawasnin pantashajtinkoqa levitas jina.

¹²Chayrayku chay sacerdotesqa Señorpaj t'aqasqa jallp'api jallp'ayoj kanqanku levitaspa jallp'ankoj ladompi.

¹³Levitaspa jallp'ankupis sacerdotespa jallp'ankoj ladompi kanqa. Chay jallp'ataj chunka iskayniyoj leguas khuskanniyoj sayt'unman kanqa, anchonmantaj uj leguayoj. Señorpaj t'aqasqa kaj jallp'aqa tukuynin iskay legua khuskanniyoj kanqa, anchonmantaj iskay legua.

¹⁴Kay jallp'aqa tukuynejmanta aswan sumajnin kaj kanqa. Manapuni uj chhikallantapis vendeyta atenqankuchu, chayri chhalayta, chayri waj runaman pasachiytapis, imaraykuchus Señorman qosqamin.

¹⁵Puchoj jallp'ataj khuskan leguayoj sayt'unman kanqa, anchonmantaj khuskan leguallataj kanqa, chaytaj mana t'aqasqa jallp'achu. Chaypi runaqa kausakuyta atillan, uywasta michiytapis. Chay jallp'a chaupinnejpitaj uj llajta ruwasqa kanqa.

¹⁶Medidasnenqa kay jina kanqa: Wichay ladoman iskay waranqa iskay pachaj phishqa chunkayoj metrosniyoj kanqa. Uray ladoman kanqa iskay waranqa iskay pachaj phishqa chunkayoj metros, inti llojsimuy ladoman, iskay waranqa iskay pachaj phishqa chunkayoj. Inti yaykuy ladomantaj, iskay waranqa iskay pachaj phishqa chunka metrosniyoj kanqa.

¹⁷Llajtaj muyuynimpi jallp'ataj uywasta michinapaj kanqa. Chay jallp'astaj, pachaj iskay chunka phishqayoj metrosniyoj wichay ladoman kanqa. Uray ladomantaj pachaj iskay chunka phishqayoj metrosniyoj kanqa. Inti llojsimuy ladomantaj pachaj iskay chunka phishqayoj metrosniyoj kanqa. Inti yaykuy ladomantaj pachaj iskay chunka phishqayoj metrosniyoj kanqa.

¹⁸Señorman t'aqasqa kashan chay jallp'aj ladompi puchoj jallp'astaj, inti llojsimuy ladoman sayt'unman uj leguayoj midisqa kanqa. Inti yaykuy ladomantaj uj leguallataj. Kay jallp'astaj llank'asqa kanqa. Poqoyninrí llajtapi ruwajkunaj mikhunankupaj kanqa.

¹⁹Llajtapi llank'ajkunataj Israelpa tukuynin ayllunmanta kanqanku.

²⁰Tukuynin chay t'aqasqa jallp'awan Señorpa wasimpaj llajtapaj t'aqasqa jallp'amanqa tawantin ladosnin iskay legua khuskanniyoj kanqa.

²¹Señorpaj t'aqasqa jallp'amanta, runaspaj t'aqasqa jallp'amantawan puraj ladoman puchoj jallp'aqa kuraj kamachejpaj kanqa. Chaytaj iskay legua khuskanniyoj anchonman kanqa inti llojsimuy mojonkama. Inti yaykuynejmantaj iskay legua khuskanniyoj mar qochakama kanqa. Chaykunaj ñaupaqempi kuraj kamachejpa chayaqe jallp'an kanqa. Chaupipitajrí Señorpaj t'aqasqa jallp'aqa Diosta yupaychana wasipajwan kanqa. Chantá levitaspaj, llajtapajwan t'aqasqa jallp'a chaypi kanqa.

²²Chay jinamanta rejsisqa kanqa, levitaspa, chantá runaspa jallp'ankumantapacha, kuraj kamachej chayaqe jallp'an kanqa. Chaytaj Judáj jallp'anwan, Benjamimpa jallp'anwan chaupipi kanqa.

²³Ujkuna aylluspa chayaqe jallp'ankoqa kay jina kanqa: Inti llojsimuy ladomanta mar qocha ladokama, Benjamimpa jallp'an kanqa.

²⁴Paypa jallp'anman tinkusqataj Simeompata kanqa, inti llojsimuymantapacha mar qocha ladokama.

²⁵Paypa jallp'anman tinkusqataj Isacarpata kanqa, inti llojsimuymantapacha mar qocha ladokama.

²⁶Isacarpa jallp'anman tinkusqataj, inti llojsimuymantapacha mar qocha ladokama Zabulompata kanqa.

²⁷Zabulompa jallp'anwan tinkusqataj Gadpa jallp'an kanqa, inti llojsimuy ladomantapacha mar qochakama.

²⁸Gadpa jallp'anwan tinkuymantataj uray ladoman mojonqa renqa Tamar nisqamantapacha, Meriba-cades nisqapi kaj yakunejta, chantá Egipto mayunejta jatun mar qochakama.

²⁹Kay jallp'ataqa Israelpa ayllusninkuman chayaqe jallp'ankupaj rak'irankichej, imaynatachus nini chayman jina paykuna jallp'ata jap'enqanku. Noqa Señormin kaytaqa nini.

³⁰Llajtaj punkusnenqa kaykuna kanku: Wichay ladoman perqaqa iskay waranqa iskay pachaj phishqa chunkayoj metrosniyoj kanqa.

³¹Llajtaj punkusnintaj Israelpa ayllusnimpa sutisninwan sutichasqas kanqa. Wichay ladoman kinsa punkus kanqanku: Rubén punku, ujtaj Judá punku, ujtaj Leví punku.

³²Inti llojsimuy lado perqataj iskay waranqa iskay pachaj phishqa chunka metrosniyoj kanqa, kinsa punkusniyojtaj, chaytaj kaykuna kanku: José punku, iskay kaj punkutaj Benjamín punku, kinsa kajtaj Dan punku.

³³Uray lado perqataj kay jina kanqa. Iskay waranqa iskay pachaj phishqa chunkayoj metrosniyoj kanqa. Kinsa punkusnintaj kaykuna kanku: Uj punkoqa Simeón punku, ujtaj Isacar punku, ujtajri Zabulón punku.

³⁴Inti yaykuy lado perqataj iskay waranqa iskay pachaj phishqa chunkayoj metrosniyoj kanqa. Kinsa punkusnenqa kaykuna kanqa: Uj punkoqa Gad punku, uj punkutaj Aser punku, uj punkutajrí Neftalí punku.

³⁵Llajta perqaqa tukuy muyuynin midikonqa, isq'on waranqa metros. Llajtaj sutenqa chay p'unchaymantapacha sutichasqa kanqa: Señor kaypi kashan, nispa.