Read Quechua Bolivia DC Bible EZEQUIEL 8 Bible Online

EZEQUIEL 8 - Quechua Bolivia DC Bible bible

EZEQUIEL 8

¹Sojta watamanta sojta kaj killampi, phishqa p'unchay kashajtin, wasiypi tiyasharqani, Judamanta kaj kurajkunapis noqawan khuska tiyarishallarqankutaj. Chaypacha Señorqa makinta patayman churaykamuwarqa.

²Qhawarispataj, uj runata jina rikorqani, chaytaj chakanmanta uraman ninaman rijch'akorqa, chakanmanta patamantaj llusk'uchasqa bronce jina lliphipisharqa.

³Chay runaman rijch'akojtaj makinta aysarimuspa chujchaymanta aysariwarqa. Chanta Diospa atiynin jallp'amanta pataman oqhariwarqa. Diosqa mosqoypi jina Jerusalenman pusawarqa, llajtaman yaykuna ukhu punkunejman churawarqa wichaynejman. Chaypi tarikun Señorta phiñachej lanteqa.

⁴Chaypi Israelpa Señornimpa k'anchaynin kasharqa, mayu cantopi rikorqani chay jinallataj.

⁵Chantá niwarqa: Runa, wichaynejman qhawariy, nispa. Noqataj wichaynejta qhawarerqani, punku yaykuna cheqapitaj altarpa punkun chaypi Señorta phiñachej lantita rikorqani.

⁶Chaymanta niwarqa: Rikunkichu Israel runakunaj millay ruwasqasninkuta? Chaykunaqa ajllakusqay llimphu wasiymanta karunchachiwanku. Kaymanta aswan millay imastaraj rikunki, nispa.

⁷Chaymanta patioman yaykuna cheqaman pusawarqa. Perqapitaj uj jusk'uta rikorqani.

⁸Chantá niwarqa: Runa, kunanqa perqata astawan jusk'uykuy. Noqataj chay jusk'uta astawan jatuncharqani. Chantá waj punkutaj rikhuriwarqa.

⁹Chantá niwarqa: Yaykuy, chaypi rikunki millachikunapaj jina sajra imasta ruwashanku chayta.

¹⁰Noqataj yaykuspa qhawarerqani perqaj tukuy muyuyninta. Chaypi rikorqani katarisman rijch'akoj pintasqasta, waj ch'ichi animalesman rijch'akojkunatawan. Jinallataj Israel aylloj tukuy laya lantisninkuta rikorqani.

¹¹Chay lantispa ñaupaqempitaj Israelpa ayllunmanta qanchis chunka kurajkuna kasharqanku. Safampa wawan Jaazanías ima paykunawan kasharqa. Chantá sapa ujninku incienso q'osñichinayoj karqanku, incienso q'osñitaj phuyu jina llojsisharqa.

¹²Niwarqataj: Runa, rikunkichu israelitaspa kurajkunasnin imastachus ruwashanku chayta, sapa ujninku kashanku pintasqa lantinkoj ch'ujllampi chayta? Paykuna yuyanku paykunata noqa mana rikushasqayta, kay naciontataj saqeshasqayta.

¹³Chaymanta, niwarqa: May sajra imastawanraj ruwajta rikunki.

¹⁴Chantá Señorta yupaychana wasej punkunkama pusawarqa, chaytaj wichay punku karqa. Chaypitaj wakin warmis, Tamus nisqa diosman waqasharqanku.

¹⁵Nillawarqataj: Runaj wawan, kayta rikunkichu? Aswan mana allin imasta ruwashajtaraj rikunki.

¹⁶Chantá Señorta yupaychana wasi patio ukhuman pusaykuwarqa. Punku yaykuna altar chaupipi iskay chunka phishqayoj runas Señorpa tiyakunan wasiman wasanchakuspa, inti llojsimuy ladoman qhawarisqas, pampaman k'umuykuspa intita yupaychasharqanku.

¹⁷Chantá, Señorqa niwarqa: Runa, rikunkichu? Judá aylloqa kaypi chay jina millay imasta ruwasqasninwan mana contentakunchu. Kay nacionman juchaswan junt'achinku. Astawan astawan phiñachishawanku, senqankumantaj sach'a laphista churakunku.

¹⁸Noqapis paykunapaj phiñakusaj. Paykunamantaqa mana khuyakusajchu ni uj pisillatapis, manataj perdonasajchu. Jatunmanta qhaparispapis wajyakuwachunku, paykunataqa manapuni uyarisajchu.