Read Quechua Bolivia DC Bible DANIEL 1 Bible Online

DANIEL 1 - Quechua Bolivia DC Bible bible

DANIEL 1

¹Judá ayllupi kinsa wataña Joacim rey kashajtin, Babiloniaj reynin Nabucodonosor chayamorqa Jerusalenman, soldadosninwantaj chay llajtata muyuykorqa.

²Señor saqerqa Nabucodonosor rey Joacimta jap'iykunanta, Diospa templompi kaj imasta kuraj parteta apakapunantataj. Nabucodonosorqa presosta Babiloniaman aparqa, Diospa templonmanta orqhorqa chay imastarí, dioskunasnimpa waqaychasninmantaj churarqa.

³Aswampis palaciopi sirvejkunamanta kurajnin Azpenasta kamacherqa, israelita runamanta, jinallataj rey ayllumantapis, chanta qhapaj ayllumanta ima pusamunanta, allin kaj waynasta, mana ima onqoyniyojkunata. Paykunaqa tukuy imapi sumaj yachayniyojkuna, respetoyojkuna, k'uchistaj kananku karqa. Chantapis tukuy ima yachaypi sumaj reparayniyojkuna, reypa palaciompi sirvinankupajtaj sumaj wakichisqas kananku karqa. Chaypi paykunaqa yachachisqas kananku karqa caldeokunaj parlayninkuta leenasninkutawan.

⁵Rey Nabucodonosor kamachillarqataj, chay waynasmanqa sapa día qonankuta rey mikhorqa chay mikhunasmanta, pay ujyaj chay vinomantawan; yachachinankutataj kinsa wata junt'ata. Chanta reypa palaciompi sirvinankuta.

⁶Chay judío waynakuna ukhupitaj kasharqanku: Daniel, Ananías, Misael, Azarías ima.

⁷Palaciopi sirvejkunaj kurajninkutaj paykunata waj sutiswan suticharqa: Danieltaqa Beltsasar nisqata, Ananiastarí Sadrac nisqata, Misaelta Misac nisqata, Azariastataj Abed-nego nisqata.

⁸Danieltaj umachakorqa, reypa mikhunanwan ujyananwantaj mana ch'ichichakuyta. Palaciopi sirvejkunaj kurajninmanta mañakorqa, reypa wakichisqa mikhunamantaqa ama payman mikhuchinankuta.

⁹Dios yanaparqa, chayrayku sirvejkunajpata kurajninkoqa, Danielta allimpaj qhawarqa.

¹⁰Chaywampis pay kuticherqa: Señorniy reyta manchachikuni, imaraykuchus pay niwarqa mikhunanmanta qankuna mikhunaykichejta, ujyananmantataj ujyanaykichejta. Sichus ujkuna waynasmanta aswan tulluyasqasta pay rikusonqachej chayqa, qankunamin juchayoj kankichej, noqata reyqa wañuyman juchachanawampajqa.

¹¹Chaypacha Daniel parlarqa mayordomowan. Paytaqa palaciopi sirvejkunajpata kurajninku churasqa qhawanampaj Danielta, Ananiasta, Misaelta, Azariastawan, nerqataj:

¹²Kayta mañakuyki: Imaynatachus riwasqayku chayta rikunaykipaj qorillawayku chunka p'unchay junt'api mikhunaykupaj granosta, chanta q'omerkunallatawan. Ujyanaykupajtaj yakullata qowayku.

¹³Chay tiempo junt'akojtintaj qhawariwasqayku noqaykuta. Reypa mikhunanmanta mikhonqanku paypa ujyanamantataj ujyanqanku chay waynakunata qhawarillankichejtaj. Chaymanta noqaykuwanqa rikusqaykiman jina ruway.

¹⁴Mayordomotaj Danielpa chay mañakusqanta uyarerqa. Chunka p'unchay junt'ata paykunawan ajinata ruwarqa.

¹⁵Chunka p'unchay pasasqanmantawan, paykuna karqanku aswan sanos, aswan sinch'istaj, palaciopi reypa mikhunanmanta mikhojkuna tukuynin waynasmanta nisqaqa.

¹⁶Ajinata ari, mayordomoqa kutichikaporqa chay waynas mikhunanku karqa chay mikhunasta, ujyananku karqa chay vinotawan, q'omerkuna mikhunasllata yakullatawan paykunaman jaywarqa.

¹⁷Kay tawa waynasmantaj Dios qorqa sumaj yachaysapa umata, tukuy laya librosmanta yachayta, tukuy sumaj yachaytataj. Chantapis Daniel yachallarqataj rikuykunata, mosqoykunatawan sut'inchayta.

¹⁸Rey señalarqa uj tiempota chay waynasqa ñaupaqenman pusasqas kanankuta. Chay tiempo junt'akojtinña, palaciopi sirvejkunaj kurajnin paykunata pusarqa reypa ñaupaqenman.

¹⁹Reytaj paykunawan parlaspa, tukuynin chay waynas ukhupi mana tarerqachu ujllatapis, Danielmanta, Ananiasmanta, Misaelmanta, Azariasmantawan aswan yachayniyojtaqa. Chayrayku reyta sirvinankupaj paykuna qhepakorqanku.

²⁰Tukuy ima yachaymanta, rejsiymantawan rey paykunata tapojtin, chunka kutiwan jina yachayniyoj paykuna karqanku, reinompi kaj chay tukuynin yachaysapa, runasninmanta, yatirisninmantawan ima.

²¹Danieltaj chay llajtapi qhepakorqa, rey Ciro uj watata rey kayninta junt'anankama.