Read Quechua Bolivia DC Bible DANIEL 11 Bible Online

DANIEL 11 - Quechua Bolivia DC Bible bible

DANIEL 11

¹Noqapis paytaqa kallpacharqani, yanaparqanitaj, Media nisqa llajtayoj rey Darío ñaupaj watapi kamachishajtin.

²Kunantaj cheqa kajta rejsichisqayki: Kinsa reykunawanraj Persiapi kamachenqanku. Chaykunamanta qhepata tawa kaj rey kamachenqa. Paytaj aswan qhapaj kanqa, chay ñaupaj kinsa reykunamantaqa. Maypachatajchus qhapaj kasqanwan atiyta tarenqa, chaypacha tukuyninta oqharichenqa Grecia reinoj contrampi.

³Chay qhepatataj manchayta maqanakoj rey rikhurenqa, jatun nacionta kamachenqa, munasqantataj ruwanqa.

⁴Pay sayarejtinkamataj, jatun nacionnin t'ustisqa kanqa, tawamantaj t'aqasqa kanqa. Chay reypa atiynenqa mirayninman mana qosqachu kanqa, manataj jatun nacionnimpis chhika atiyniyojchu kanqa ñaupajta jinaqa. Chaypajqa paymanta qhechusqaña kanqa, wajkunataj kamachenqanku paypa cuentanmanta.

⁵Uraynejpi kaj reyqa may atiyniyoj kanqa. Soldadosta kamachinankupaj churasqasninmanta ujnin kajtaj aswan atiyniyoj kanqa chay reymantaqa, jatun nacionta kamachejmantaj tukonqa.

⁶Wakin watas tukukuyta, iskayninku uj tratota ruwanqanku: Uray ladopi kaj reyqa warmi wawanta qonqa casarakunampaj wichay ladopi kaj reyman, iskaynin naciones ch'ajwaykunaman ama yuykanankupaj. Chay yuyaychakusqantaj qhasiman tukonqa, imaraykuchus chay warmi, qhari wawampis, qosampis, jinallataj uywasqasnimpis wañurachisqas kanqanku.

⁷Chay tukuywampis, kikin ayllunmanta ujnin kaj sayaykonqa, wichaymanta kaj soldadoswan maqanakunampaj, sumaj jark'asqa tiyakunanta jap'ikaponqa, atipanqataj.

⁸Astawampis, apakaponqa Egiptoman dioskunasninkuta, metalmanta ruwasqa lantisninkuta, qorimanta, qolqemanta ruwasqa valorniyoj imastawan. Unay watasta iskaynin naciones mana ch'ajwaspalla kanqanku.

⁹Chay qhepatataj wichaynejpi kaj reyqa, uraynejpi kaj nacionman yaykonqa. Chaymantataj kikin llajtanman kutiriponqa.

¹⁰Wichaypi kaj reypa wawasnintaj ch'ajwapaj wakichikonqanku, ashkha tropa soldadostataj tantaykuchenqanku. Paykunamanta ujnin kajtaj tropasninwan khuska ch'ajwata ruwaj yaykonqa uraypi kaj nacionman, uj phullchiraj mayu jina tukuyninta t'unaykuspa. Chaymanta ujtawan maqanakullanqataj, reypa sumaj jark'asqa wasinman chayanankama.

¹¹Wichaymanta kaj reytaj yaykuspa, uraypi kaj reyta manchayta phiñarichenqa. Chay uraypi kaj reytaj ashkha chejnikoj soldadospa contranta maqanakoj llojsenqa, chanta tukuynintataj atipaykonqa.

¹²Chay jinata atipasqanrayku mayta payqa jatunchakonqa, chanta may ashkha runastawanraj wañurachenqa, atiynintaj mana unaypajchu kanqa.

¹³Wichaymanta kaj reyqa ujtawan ashkha soldadosta tantaykonqa, ñaupaj kajmantapis aswan ashkhata. Chanta qhepa watasmantaj ujtawan maqanakoj yaykullanqataj, sumaj wakichisqa ashkha soldadoswan.

¹⁴Chaypachaqa, uraypi kaj reypa contranta ashkhas sayarenqanku. Israelitasmantataj wakin runas ch'ajwachej runakuna oqharikonqanku, mosqoypi jina willasqata junt'ayta munaspa, manataj atenqankuchu.

¹⁵Wichaymanta kaj rey jamonqa, llajtaj muyuynimpitaj pakakuna perqasta ruwarachenqa. Uraymanta kaj reyqa mana imanaytapis atenqachu, nitaj aswan atiyniyoj kaj soldadosnimpis jark'ayta atenqankuchu.

¹⁶Atipajkunaqa, atipasqasta munayninta ruwanqanku, nitaj pipis contrampi sayaykoj kanqachu, k'acha nisqa kaj jallp'amantaj tiyaykonqa, purisqampi tarisqanta t'unaykuspa.

¹⁷Astawantaj wakichikonqa, uraypi kaj tukuynin jallp'ata jap'ikapunampaj. Chaypajtaj chay reywan uj tratota ruwanqa, ujnin warmi wawanta chay reywan casarachenqa, reinonta t'unaykunanrayku. Chay yuyaychakusqantaj qhasi mana kajman tukonqa.

¹⁸Chanta maqanakonqa qocha qayllaspi llajtakunaj contranta, ashkhastaj chay llajtasmantaqa makimpi urmanqanku. Chanta uj atiyniyoj kamachejtaj kay p'enqayta chinkachenqa, wichaypi kaj reytawan p'enqaypi rikhurichispa.

¹⁹Chaymantapacha reyqa llajtampi kaj sumaj jark'achisqa wasisninman kutiponqa. Chanta misk'aspa wañonqa, manataj jayk'ajpis paymanta uyarikonqañachu.

²⁰Cuentanmanta waj rey sayarenqa, paytaj kachanqa impuestosta mañamojta reinonta qhapajyachinampaj. Pisi p'unchaykunamantataj payta wañuchenqanku, mana ch'ajwapichu, nitaj maqanakuypichu.

²¹Paypa cuentanmantataj uj millay runa sayarenqa, paytaj mana reypaj jina qhawasqachu kanqa. Chaytaj sajra yuyayninta mana sut'inchaspalla ch'aukiyaywan rey kanampaj sat'ikonqa.

²²Contrampi sayaykoj atiyniyojkunata tukuyninta t'unaykonqa. Jinallatataj tratota ruwaj atiyniyoj kamachejtapis.

²³Ch'aukiyallanqataj paywan tratota ruwajkunatapis, chanta pisi runawan kashaspapis atipanqa.

²⁴Mana pejpa yuyasqallan aswan sumaj jallp'asman yaykonqa. Payqa ruwanqa ni mayqen ñaupa tatasnimpi ruwasqanta. Ch'ajwapi qhechusqa k'acha imastataj paywan kajkunaman rak'iranqa. Chaymantataj yuyaychakonqa sumaj jark'achisqa llajtaswan maqanakoj yaykunampaj, chaytaj pisi p'unchaykunallapaj kanqa.

²⁵Atiynimpi kallpacharikuspa umachakonqa, uraypi kaj reypa contranta, ashkha soldadosninwan rispa maqanakunampaj. Uraypi kaj reytaj kutichikuspa, maqanakuyman yaykonqa, may atiyniyoj ashkha soldadosninwan khuska. Manataj sayayta atenqachu, imaraykuchus kikin soldadosnillanmantataj reypa contrampi rikhurenqanku.

²⁶Rey wajyarqa paywan mikhunankupaj chaykunallataj, payta t'unaykonqanku. Soldadosnintaj atipasqas kanqanku, paykunamantataj ashkhas wañurachisqas kanqanku.

²⁷Chaypacha iskayninku reyes, mana allin kajta ruwanakuyta munaspalla, khuska tiyarikonqanku mikhunankupaj. Chaypitaj llullata purajmanta ninakonqanku. Manataj mayqenninkupis yuyasqankuta junt'anqankuchu. Manaraj chaypajqa horachu kanqa.

²⁸Wichaymanta kaj rey llajtanman kutiriponqa, ashkha imasta aparisqa. Llimphu trato ruwasqaj contran sayarenqa. Yuyaychakusqanta junt'anqa, chaymanta llajtanman kutiriponqa.

²⁹Señalasqa rato chayamojtintaj, reyqa ujtawan soldadosninwan puririllanqataj, uraypi kaj reypa contrampi. Kay maqanakuypitaj, mana ñaupajta jina atipayta atenqachu.

³⁰Inti yaykuynejmanta tropas barcospi jamuspa, paypa contrampi yaykuykamonqanku. Wichaymanta kaj reypa soldadosnintaj, manchachiywan ayqenqanku. Wichaymanta kaj reyqa, llimphu tratoj contrampi phiñakonqa, kutirimonqataj llimphu tratomanta karunchakonqanku chaykunaman atienekuspa.

³¹Paypa soldadosnin Diosta yupaychana wasita ch'ichichanqanku, jinallataj sinch'i ruwasqa pakakuna wasistapis ch'ichichanqanku. Diosman sapa p'unchay jaywana kajtapis chinkachenqanku. Aswampis uj millay lantita churanqanku.

³²Reyqa misk'i palabrasllawan, Diospa trato ruwasqanta p'akejkunata, payta qhatejkunaman tukucherqa. Diosta munakojkunataj cheqampi sayanqanku, maychus kajtataj ruwaspa.

³³Llajtapi kaj yachayniyojkunaqa, ashkha runasta yachaykuchenqanku. Chay yachayniyojkunatataj wakinta ruphachenqanku, wakinmantataj tiyapuyninta suwanqanku, wakinkunataj apasqas kanqanku. Pisi tiempollata ajina kanqa.

³⁴Chejnejkunaj makimpi urmanqanku chaypachaqa, uj pisita yanaparisqas kanqanku, ashkhastaj paykunawan ujchakonqanku allinninkuta ruwaj jinalla.

³⁵Yachayniyojkunamanta wakin qhatiykachisqasllataj kanqanku. Ajina ñak'ariywan, paykunaqa llimphuchasqas, sumajyachisqas, yurajyachisqastaj kanankupaj, tukukuypaj wakichisqa rato chayamunankama.

³⁶Wichaynejpi kaj reyqa tukuy ima munasqanta ruwanqa. Jatunchakuynenqa maypuni kanqa. Tukuy dioskunajpata kurajnin kasqanta creekonqa. Cheqa Diospa contrantataj manchay sajrata parlanqa. Tukuy imataj paypajqa allin renqa, Dios paypaj jasut'ita apachimunankama. Diosqa imaynatachus ruwanan karqa chaytaqa junt'anqapuni.

³⁷Kay reyqa ñaupa tatasnimpa diosninkuta mana kasuta ruwanqachu, ni warmispa munasqa diosninkuta, nillataj waj dioskunatapis kasonqachu. Paylla tukuyninkoj kurajninku kasqanta creekonqa.

³⁸Aswanqa, sinch'i ruwasqa pakakuna wasipi kaj diosta yupaychanqa. Ñaupa tatasninku manapuni yupaycharqankuchu chay diosta yupaychanqa. Jaywanqataj qorita, qolqeta, k'acha rumista, ashkha valorniyoj imastawan.

³⁹Pakakunapaj sinch'i ruwasqa wasista waqaychanampajqa jap'enqa, waj llajtamanta kaj lantita yupaychaj runasta. Chay reyta yupaychajkunamantaj jatumpi qhawachenqa, jatuchej kamachejkuna kanankupajtaj paykunata churanqa. Jallp'atapis paykunamanta, t'inkata jina rak'iranqa.

⁴⁰Maypachachus tukukuy rato chayamonqa chaypachaqa, uraynejpi kaj rey jatarenqa, wichaynejpi kaj reypa contrampi. Kay kajtaj llojsispa, kaymanta jinalla tukuy atiywan yaykonqa, uraypi kaj reypa contrampi, carretaswan, caballería tropaswan, ashkha barcoswan ima. Jallp'asman yaykuspa junt'aykonqanku, chanta pasakaponqankutaj.

⁴¹K'acha nisqa jallp'amampis yaykonqa, manchay ashkha runastataj wañurachenqa. Edompi tiyakoj runasta, jinallataj Moabpi tiyakoj runastapis mana wañurachenqankuchu, nillataj Amompi tiyakoj runastapis.

⁴²Waj llajtasmampis yaykullanqataj, ni Egipto llajtallapis librakonqachu.

⁴³Egiptomantaqa, waqaychasqa qorita, qolqeta, tukuy k'acha imastataj apakaponqa. Chanta Libiapi kajkunapaj, Etiopiapi kajkunapajpis kikillantaj kanqa.

⁴⁴Inti llojsimuynejmanta, wichaynejmantawan willaykuna chayamonqanku. Chayta uyarispa wichaypi kaj reyqa mancharisqa qhepakonqa. Chaymanta may phiñasqa llojsenqa, ashkhasta wañurachiyta yuyaspa.

⁴⁵Reyqa toldosninta sayachenqa mar qochawan, k'acha nisqa jallp'awan chay chaupipi. Chay pachampitj wañuynin chayamonqa, manataj pipis payta yanaparej kanqachu.