Read Quechua Bolivia DC Bible DANIEL 5 Bible Online

DANIEL 5 - Quechua Bolivia DC Bible bible

DANIEL 5

¹Babiloniapi kaj rey Belsasar, wajyakorqa nacionmanta, jatumpi kaj waranqa runakunata, uj jatun qochukuman, chaypi mikhushaspataj reyqa wajyachikamusqan runakunawan khuska ashkha vinota ujyarqanku.

²Vinowan anchata machaykuspa rey Belsasar kamacherqa payman vasosta apamunankuta, jatuchej qori vasosta, qolqe vasostawan, chay vasostaqa, paypa tatan Nabucodonosor, Jerusalempi kaj templomanta orqhospa apakapusqa.

³Chay vasosta apamorqanku. Chay vasospitaj ujyarqanku rey, chanta warmisninku, paywan tantakusqas karqanku chay waj warmikunapis, jinallataj chay qhochukuman wajyasqas karqanku chaykunawan ujyarqanku.

⁴Tukuynin ujyarqanku vinota, chanta lantisninkutataj yupaycharqanku. Chay lantisninkoqa qorimanta, qolqemanta, broncemanta, fierromanta, k'aspimanta, rumimanta ima ruwasqas karqanku.

⁵Chay rato uj runa maki rikhurimorqa, k'anchaypitaj dedonwan qelqayta qallarerqa, reypata palaciompa yuraj perqampi. Reytaj chay qelqaj makita rikuytawanqa, q'elluman tukorqa, chanta, manchachikuspa kharkatiterqa chakisninmanta umankama.

⁷Chay rato qhapariyta qallarerqa, wajyacherqataj Babiloniamanta yatirikunata, yachayniyojkunata, k'anchaj qoyllurkunamanta yachajkunata, paykunamantaj nerqa: Jaqaypi qelqasqa kashan chayta leejqa, willawajtaj chay qelqasqaqa imatachus niyta munasqanta chayqa, p'achallichisqa kanqa sumaj puka p'achawan, kunkanmantaj qori cadenawan churaykusqa kanqa, chanta kinsa kaj kamachejtaj reinoypi kanqa.

⁸Chay yachayniyojkuna, tukuyninku yaykorqanku wasiman, manataj mayqenninkupis chay qelqasqata yachayta aterqankuchu, imatachus niyta munasqanta reyman willanankupaj.

⁹Chanta rey Belsasar mayta manchachikorqa, uyantaj q'elluyarqa. Reinompi kasharqanku chay kurajkunarí mana yacharqankuchu imatachus ruwanankuta.

¹⁰Reypa mamanqa, wawan reypa qhaparisqanta, chanta mikhunankupaj wajyasqas karqanku chay kurajkunaj qhaparisqantawan uyarispa, maypichus mikhusharqanku chay wasiman yaykorqa, nerqataj: Reyníy, wiñaypaj kausay! Ama llakikuychu, amataj uyaykipis jinatapuni q'elluyachunchu.

¹¹Reinoykipi tiyan uj runa, santo Diospa espiritunwan pusaykachasqan. Tatayki rey kashajtin, chay runaqa rejsisqa karqa sut'i yuyayniyoj kasqanta, sumaj yuyayniyoj dioskuna jina yachayniyojtaj kasqantawan. Chayrayku tatayki Nabucodonosorqa payta churarqa, naciompi tukuy yachaysapakunata, yatirikunata, sumaj yachayniyojkunata, k'anchaj qoyllurkunamanta yachajkunatawan kamachinampaj.

¹²Pitachus reyqa suticharqa Beltsasar nisqata chay Danielpi, tukuy atiyniyoj espíritu karqa, tukuy imata rejsinampaj, mosqoykunapis imatachus niyta munasqanta yachanampajtaj. Chanta, mana yachay atina palabrasta sut'inchanampaj, pejtusqa imasta allichanampajtaj. Chayrayku reyqa Danielta kunan wajyachimuchun, paytaj sut'inchanqa chay perqapi qelqasqa palabras imatachus niyta munasqanta.

¹³Chanta Danielta pusarqanku reypa ñaupaqenman. Reytaj payta tapurerqa: Qanchu Daniel kanki, tatay Nabucodonosor rey kashaspa, Judeamanta jap'isqasta apachimorqa chay judiokunamanta ujnin kajqa?

¹⁴Dioskunaj espíritun qanwan kasqanta niwanku, sut'i yuyayniyoj kasqaykita, sumaj umayoj, may yachayniyojtaj kasqaykita.

¹⁵Kunanqa, nacionnintimpi aswan yachayniyojkuna kaypi kasharqanku, perqapi qelqasqa palabrasta leenankupaj chanta willanawankupaj chay palabras imatachus niyta munasqanta. Paykunataj chay palabrastaqa mana yachallankupischu.

¹⁶Chay tukuywampis uyarini qan sut'inchaj kasqaykita mana yachay atina imasta, mana allichay atina imastataj allichaj kasqaykita. Kunanqa, sichus qan atinki chay palabrasta leeyta chayqa, imatachus niyta munasqantataj willawanki chaypachaqa, sumaj puka p'achawan p'achallichisqayki, kunkaykimantaj qori cadenata churasuchunku, reinoypitaj kinsa kaj kamachej kanki.

¹⁷Chaymanta Daniel kuticherqa: Qowayta munashanki chaykunaqa qanllapaj kachunku, palacioykipi churanawaykimantataj wajta churay. Noqa sut'inchapusqayki imatachus niyta munasqanta, perqapi qelqasqa kashan chay palabrasqa.

¹⁸Tukuy Atiyniyoj Dios, Nabucodonosor tataykiman qorqa reinota, jatun atiyta, gloriata, jatumpaj qhawasqa kayta ima.

¹⁹Payman atiyta qosqanrayku, tukuy ayllusmanta, nacionkunamanta, tukuy laya parlayniyoj runakuna payman k'umuykorqanku, kharkatiterqankutaj paypa ñaupaqempi. Paytaj wañucherqa chayri, kausananta saqerqa pitachus munasqanta. Wakinta jatuncharqa, wakintataj k'umuykachacherqa.

²⁰Maypachatajchus sonqompi jatunchakorqa, sajrayarqataj wapuchakuspa chaypacha, rey kasqampi atiynin, jatun kasqampis paymanta qhechusqa karqa.

²¹Runakunamanta karunchasqa karqa, uj uywaman jinataj tukorqa, k'ita burroswan khuska kausarqa. Wakas jina qhorata mikhorqa, chhullastaj payta joq'orqa, rejsinankama patapi kaj Dioslla atiyniyoj kasqanta kamachej runakunaj patampi, kamachejkunata churasqantataj pitachus munasqanta.

²²Belsasar, qantaj Nabucodonosorpa wawan kashaspa, allinta yachashaspataj imakunachus payman jamusqankuta, mana llamp'u sonqoyojchu kausarqanki.

²³Aswampis, janaj pachapi kaj Señorpa contrampi asiykukorqanki, kamacherqankitaj templomanta vasosta orqhomunankuta, chay vasospitaj vinota ujyarqankichej wajyarakorqanki chaykunawan khuska, yupaychankitaj waj dioskunata, qorimanta, qolqemanta, broncemanta, fierromanta, k'aspimanta, rumimanta ima ruwasqa dioskunata. Chay dioskunaqa mana rikunkuchu, mana uyarinkuchu, nitaj imatapis yachankuchu. Manataj jayk'ajpis Diostaqa yupaychankichu, paypa makimpi kausayniyki kashan, tukuy ima ruwanaykipis paymanta kashan.

²⁴Chayraykumá pay apachimorqa makita chay palabrasta qelqanampaj, MENE, MENE, TEKEL, PARSIN.

²⁶Chay palabrastaj kay jinata niyta munanku: MENE: Niyta munan, Diosqa yupan rey kanayki kashan chay p'unchaykunata, rikuchisunkitaj mayk'ajchus rey kanayki tukukunan kasqanta.

²⁷TEKEL: Niyta munan, balanzapi aysasqa karqanki, may pisitaj kanki.

²⁸PARSIN: Niyta munan, reinoyki p'akisqa kanqa, medosman, chanta, persasman ima entregasqa kanqa.

²⁹Chaymanta rey Belsasar kamacherqa, Danielman puka p'achata churaykunankuta, kunkanmantaj qori cadenata churaykunankuta. Chanta willaracherqataj tukuyman, chay ratomantapacha Danielqa, kinsa kaj kamachej kananta reinompi.

³⁰Chay ch'isimpacha caldeokunaj Belsasar reyninkuta wañucherqanku. Mediamanta rey Dariotaj reinota jap'ikaporqa. Dariotaj chaypachaqa sojta chunka iskayniyoj watayoj kasharqa.