Read Quechua Bolivia DC Bible DANIEL 6 Bible Online

DANIEL 6 - Quechua Bolivia DC Bible bible

DANIEL 6

¹Rey Darioqa yuyanchakorqa, pachaj iskay chunkayoj kamachejkunata churayta reinompi tukuynej aylluspi qhawanankupaj.

²Paykunaj patampitaj churarqa kinsa kuraj qhawajkunata, chay kamachejkunaj ruwayninkuta allinta qhawanankupaj; chay jinamanta reypaj ama ima sajratapis rimanankupaj. Chay kinsa qhawajkunamanta ujnenqa Daniel karqa.

³Paytaj kinsantinmanta aswan kuraj karqa allin yachayninrayku. Chayrayku reyqa yuyaychakorqa nacionnintimpi pay yanapajnin kanampaj kamachiynimpi.

⁴Chay kuraj qhawajkuna, jinallataj kamachejkunapis chaypacha mask'arqanku, ch'ataykunankupaj jina Danielpa mana allin ruwasqasninta reinopi. Danielpitaj mana ima pantaynintapis tarerqankuchu, allin kausayniyoj runa kasqanrayku. Ajinamanta mana imatapis contrampi rikuchiyta aterqankuchu.

⁵Chaywampis yuyaychakullarqankupuni, nerqankutaj: Danielpeqa mana tarisunmanchu ima pantaynintapis ch'ataykunanchejpaj jina paypa contrampi, mana chayqa Diosnimpa kamachiyninta junt'asqanmanta ch'ataykusunman.

⁶Chay jina yuyaywan may qhawajkuna, kamachejkunawan parlanakorqanku, rey Darioman parlapayaj rinankupaj, ñaupaqenman chayaspataj nerqanku: Rey Darío, wiñay kausay qampaj kachun!

⁷Tukuynin kurajkuna, tukuynin kamachejkunataj tantakorqanku nacionnintinmanta, chaypitaj unanchakorqanku reymanta uj kamachiy llojsinanta, chanta tukuyman willarachisqa kananta. Chay kamachiytaj kay jina kachun: Kinsa chunka p'unchay junt'ata, ama pipis mañakuchunchu ni mayqen diosmanta, nitaj mayqen runamantapis, mana chayqa qanllamanta mañakuchun. Pichus mana kasukonqa chayqa, leonkunaj t'oqonman wijch'usqa kachun.

⁸Kunantaj kay kamachiy aswan atiyniyoj kanampajqa, rey jina sutiykita qelqaykuy, ama waj jinaman tukuchisqa kanampaj, medospa, chanta persaspa kamachiyninman jina, chaytaj mana chinkachisqa kayta atinchu.

⁹Rey Dariotaj sutinta qelqaykorqa chay papelpi.

¹⁰Danieltaj chay papelpi rey Darío sutinta qelqaykusqanta uyarispa, wasinman riporqa. Puñunan wasimpa ventanasninta kicharerqa, chay ventanastaj Jerusalenta qhawariypi karqanku, chaypi qonqorikorqa Diosmanta mañakunampaj, payta yupaychanampajtaj. Chay jinata ruwarqa kinsa kutita sapa p'unchay, yachasqa kasqanman jina.

¹¹Chaypacha chay runasqa tantaykukuspa Danielpa wasinman yaykorqanku, payta tariparqanku Diosninmanta mañakushajta yupaychashajtataj.

¹²Chay ratopacha paykuna rerqanku reyta watukoj, chay kamachiymantataj parlarej, nerqankutaj: Reyníy, qan willaracherqanki uj kamachiyta, chayman jinaqa, pillapis kay kinsa chunka p'unchaypi, waj diosmanta mañakunman, chayri, qanmanta mañakunantaqa wajmantataj mañakojtin, leonkunaj t'oqonman wijch'usqa kananta kamacherqanki, icharí? Ajinamin, nispa kuticherqa reyqa. Chay kamachiytaj junt'akunampuni tiyan, medospa kamachiyninman jina, persaspa kamachiyninman jinataj. Chayqa mana p'akisqa kayta atinchu.

¹³Danielqa mana ima respetotapis rikuchishanchu ñaupaqeykipi, nitaj kasuta ruwashanchu chay kamachiyta willarachisqaykimanta. Payqa jallp'ankumanta wijch'uchikamoj judiokunamanta ujninmin. Paytaqa rikuyku uj p'unchaypi kinsa kutita Diosninmanta mañakushajta.

¹⁴Kayta uyarispa reyqa mayta llakikorqa, imaynamantapis Danieltaqa kacharachiytapuni munarqa. Inti yaykunankama, tukuy imata ruwarqa payta salvananrayku.

¹⁵Chay runakunataj uj kutitawan reyman jamuspa nillarqankutaj: Qan, reyqa, allinta yachanki, medospa, chanta persaspa kamachiyninkuman jinaqa, mana ima jark'asqa kajpis, nitaj reypa firmasqan ima kamachiypis p'akisqa kayta atinchu.

¹⁶Chanta reyqa kamacherqa Danielta pusamunankuta, leonespa t'oqonmantaj payta choqaykunankuta. Manaraj chay wañuypaj juchachasqan junt'akushajtin, reyqa Danielta nerqa: Sumajtapuni sirvishanki chay Diosniyki qanta salvasuchun.

¹⁷Daniel ñapis leonespa t'oqompi kasqantawan, uj rumita aparqamorqanku, chaywantaj leonespa t'oqonta kirpaykorqanku. Reytaj paypa sellonwan sellarqa, jinallataj tukuy kurajkunaj sellonwampis, Danielpaj wakichisqa karqa chay kamacheyqa kikimpuni junt'akunampaj.

¹⁸Chanta reyqa palacionman riporqa, mana mikhusqalla puñunanman yaykuporqa, manataj imawampis kusirikorqachu pay yachasqa kasqanman jina. Aswampis, chay tutantin mana puñuyta aterqachu.

¹⁹Sut'iyamojtinkama sayarerqa, usqhaytataj correrqa leonespa t'oqonman.

²⁰Qayllaykuspataj reyqa Danielqa wajyarqa may llakisqa, nerqataj: Daniel, kausaj Diospa sirvejnin, mana sayk'uspa sirvinki chay Diosniyki salvasuyta aterqachu leonesmantaqa?

²¹Danieltaj kuticherqa: Reyneyqa wiñaypaj kausachun!

²²Diosniymin angelninta kachamorqa, paytaj leonespa siminkuta wisq'aykurarqa, mana imananawankupaj, imaraykuchus Dios yachan mana ima juchayoj runa kasqayta, yachallantaj mana ima sajratapis ruwasqayta contraykitaqa, reyníy.

²³Chanta reyqa mayta kusikorqa, kamacherqataj t'oqomanta Danieltaqa orqhompunankuta. Orqhomuspataj, mana ima nanachisqatapis paypi tarerqankuchu, imaraykuchus Diosnimpi confiakorqa.

²⁴Chay qhepata reypa kamachisqanman jina, Danielpa contranta ch'ataykoj runasta pusamorqanku, warmisninkuwan, wawasninkuwan ima, chanta leonespa t'oqonman wijch'uykurasqas karqanku. Manaraj ukhukama chayashajtinkutaj, leonesqa ñapis phinkiramuspa jap'iytawankama paykunataqa t'unaykusqanku.

²⁵Chanta rey Darioqa, qelqarqa tukuy nacionespi kaj runakunaman, tukuy llajtasman, kay pachapi kaj tukuy parlayniyojkunamantaj, kay jinata nispa: Munani qankuna sonqo tiyasqas kakunaykichejta, tukuy imapitaj allin risunaykichejta.

²⁶Kaytataj kamachini, tukuynin reinoypi, Danielpa Diosnintaqa respetachunku, payllamantaj k'umuykuchunku. Paymin kausaj Diosqa. Payllapuni wiñaypaj wiñaynintinkama. Reinonqa mana jayk'ajpis t'unasqachu kanqa, nitaj atiynimpis tukukonqachu.

²⁷Paymin salvajqa, kacharichejtaj. T'ukuna k'acha imasta rikuchin, janaj pachapi, jinallataj kay pachapipis. Paymin Danielta salvarqa leonespa sillusninmantaqa.

²⁸Danieltaj kurajllapuni karqa, rey Darío kamachishajtin, jinallataj Persiamanta rey Ciro kamachishajtimpis.