Read Quechua Bolivia DC Bible Danielmantawan Belmantawan 1 Bible Online

Danielmantawan Belmantawan 1 - Quechua Bolivia DC Bible bible

Danielmantawan Belmantawan 1

¹Rey Astiages wañupusqanmanta, ripusqanmantataj ñaupa tatasnimpaman, Persia llajtayoj Ciro reyman tukorqa.

²Danielqa chaypacha allin qhawasqa karqa, reytaj payta munakoj tukuy amigosninmanta astawan.

³Babiloniospata kaporqa uj lanti Bel nisqa. Chay ídolo lantimanqa sapa diapaj qoj kanku sojta pachaj qanchis chunkayoj kilota trigo jak'umanta. Chantaqa, tawa chunka ovejasta, sojta litro vinotawan.

⁴Rey Astiagesqa k'umuykukoj chay idoloman, rejtaj sapa día yupaychakoj. Danieltaj Diosnillanta yupaychakoj.

⁵Uj kuti rey Astiagesqa Danielqa tapusqa: Imaraykutaj mana yupaychankichu Belta?, nispa. Danieltaj kutichikusqa: Noqaqa mana k'umuykukojchu kani runa makiwan ruwasqa lantiman, manachayqa kausakoj Diosllaman. payqa janaj pachata kay pachatawan ruwarqa, tukuy runastataj kamachin.

⁶Reytaj nisqa: Manachu Belqa kausakoj Dios? Manachu rikunki mashkhatachus mikhun, ujyantaj sapa día?

⁷Chayta uyarispa Danielqa asirikusqa. Nisqataj: Ama ch'aukiyachikuychu, reyníy, nispa. Chay lantej ukhonqa t'urulla. Jawamanta bronce. Mana ni jayk'aj mikhunchu nitaj ujyanchu.

⁸Reytaj phiñakusqa chayta uyarispa. Chantataj wajyachimusqa Belpa sacerdotesninta, nisqataj: Niwaychej pichus chay mikhunasta mikhun. Mana chayrí, wañunkichej, nispa.

⁹Sichus rikuchiwankichej Belpuni chayta mikhusqanta, Daniel wañuchisqa kanqa Belpaj sajrata parlasqanrayku. Danieltaj nisqa reyman: Nisqaykiman jina ruwakuchun, nispa.

¹⁰Belpa sacerdotesnenqa qanchis chunka karqanku, mana yupaspa warmisninkuta wawasninkutapis. Reytaj rerqa Danielwan khuska Belpa templonman.

¹¹Belpa sacerdotesnenqa nerqanku: Rikushanki. Noqaykoqa ripushaykuña, nispa. Qampuni, reyniyku, churaykullay mikhunatawan vinotawan. Chantaqa, punkuta wisq'aykunki, selloykiwantaj ch'ataykunki.

¹²Q'aya paqarin kutimojtiykitaj, rikunki chayqa Belqa mana tukusqanta imatachus kunan churanki chayta, chaypacha noqayku wañuyman risqayku. Mana chayrí, Daniel wañuchisqa kachun tumpawasqaykurayku.

¹³Mana ni ima dakuspalla kasharqanku sacerdotesqa, imaraykuchus mesa urapi ruwachisqanku uj pakasqa punkuta maynintachus sapa kuti yaykoj kasqanku temploman mikhoj.

¹⁴Sacerdotes ripusqankumantaña rey churasqa mikhunata Belpa ñaupaqenman. Chaykama Daniel kamachisqan nisqa ushphata t'akaranankuta tukuynejpi templo ukhupi. Reyqa sapallan chaypi kasharqa. Chaymanta, tukuyninku jawaman llojserqanku. Wisq'asqa punkutataj sellaykorqanku reypa sellonwan. Chayta ruwaspataj, riporqanku.

¹⁵Ch'isitaj sacerdotesqa, sapa kuti jina, yaykorqanku warmisnintin wawasnintin ima. Mikhorqankutaj ujyarqankutaj tukuy imata.

¹⁶Q'ayantin tutamanta reywan Danielwan temploman chayarqanku.

¹⁷Reytaj taporqa: Sello p'akisqachu, Daniel?, nispa. Danieltaj nisqa: Mana p'akisqachu, reyníy, nispa.

¹⁸Punkuta kichariytawantaj, rey qhawarqa mesaman. Qhawaspataj, sinch'ita qhaparerqa nispa: Bel, jatun kanki! Qanqa mana ch'aukiyankichu.

¹⁹Danieltaj asirikorqa, manataj munarqachu reyqa temploman yaykunanta. Chantaqa nerqa: Reyníy, rikuymá pampata. Niytaj pejkunajpatachus kay lastrosqa, nispa.

²⁰Reytaj: Rikushani chaki lastrosta. Qharispata, warmispata, wawaspata sina, nispa.

²¹Chaymantataj reyqa may phiñasqa presochachisqa sacerdotesta, warmisnintinta, wawasnintinta ima. Paykuna reyman rikucherqanku chay pakasqa punkuta, mesa patapi kasharqa chayta, maynintachus yaykoj kasqanku temploman mikhuykoj.

²²Reytaj nerqa tukuy chaykunaqa wañuchisqas kanankuta. Qorqataj idolota Danielman. Paytaj t'unarparicherqa chay idolota, templotataj urmacherqa.

²³Kasqa nin uj jatun katari mayqentachus Babilonia llajtayoj runasqa yupaychaj kasqanku.

²⁴Reyqa Danielman nisqa: Niwajchu kay diosqa mana kausakoj dios kasqanta?, nispa. Paytaqa yupaychanayki tiyan.

²⁵Danieltaj kutichikusqa: Noqaqa Señor Diosniyta yupaychani, paylla kausakoj Dios kasqanrayku, nispa.

²⁶Nisqataj: Reyniy, licenciaykiwan chay kataritaqa wañuchiyman. Mana espadawanchu wañuchisaj nitaj k'aspiwanchu. Reytaj: Licenciata qoyki, nispa nisqa.

²⁷Chaymantataj Danielqa mask'asqa alquitranta, wirata, chujchastawan. Tukuy chaykunata t'impuchisqa. Chantaqa, tukuy chaywanqa uj qoluta ruwasqa. Chay qolutaqa katarej siminman sat'iykusqa. Katareqa mikhukapusqa. Oqoytawantaj ujta phatarparisqa. Chantaqa Daniel nisqa: Kaytaqa qankuna yupaychaj kankichej!

²⁸Babilonia runasqa kayta yachaspa anchata phiñakusqanku, oqharikusqankutaj reypa contranta. Nisqankutaj: Reyqa judioman tukun, nispa. Nillasqankutaj: Payqa Belta t'unacherqa, katarita wañucherqa, sacerdotestapis.

²⁹Chantaqa reypaman risqanku nisqankutaj: Danielta qowayku. Mana chayrí qanta wañuchisqayku ayllusniykitapis.

³⁰Rikuspa reyqa munasqankutapuni imallatapis ruwayta, qollarqa Danielta paykunaman.

³¹Runastaj Danielta wijch'umorqanku uj pozoman. Chay pozo ukhupi leonesqa junt'ita kasqa. Chay ukhupi Danielqa sojta día junt'ata kakusqa.

³²Chay pozopi qanchis leones kasqa. Chay leonesmanqa qoj kasqanku mikhunankupaj iskay runa ayasta iskay ovejastawan. Chay diataj mana ni imata jaywasqankuchu, Danielta mikhuykunankupaj.

³³Chay kikin tiempollapitaj Judeapi tiyakoj uj profeta Habacuc sutiyoj. Chay Habacucqa qoqawita wakichisharqa apanampaj llank'ajkunaman. T'antastapis churasqa uj kanastaman.

³⁴Chantaqa, Diospa angelnin rikhurimuspa nisqa: Chay qoqawitaqa Danielman apanki. Payqa Babiloniapi kashan uj pozo ukhupi, leones chaupipi, nispa.

³⁵Habacucrí kutichikusqa: Wiraqochi, Babiloniata mana ni jayk'aj rikorqanichu. Ni yachanipischu maypichus chay pozoqa, nispa.

³⁶Chantaqa Diospa angelnin payta chujchasninmanta jap'ispa, wayra phukuywan Babiloniakama pusasqa sayarichisqataj pozoj qayllampi.

³⁷Chaymantataj: Daniel, Daniel, nispa Habacuc qhaparisqa. Señor apachimusorqa kay qoqawita. Jap'ikuy, nispa nisqa.

³⁸Danieltaj nisqa: Diosníy, qanqa noqamanta yuyarikunki. Mana saqerparinkichu munakusojkunata.

³⁹Daniel mikhushajtinraj Señorpa angelnin usqhayllata Habacucta llajtanman pusakaporqa.

⁴⁰Qanchis diamantawan reyqa risqa waqaj Daniel wañupusqanmanta. Pozoman chayaspataj uraman qhawasqa, chaypitaj rikusqa Danielta tiyakushajta.

⁴¹Chantaqa rey sinch'ita qhaparisqa: Jatunmin kanki, Danielpa Diosnin. Qan sapallayki Dios kanki, nispa.

⁴²Reytaj nerqa orqhomunankuta Danielta. Wijch'uchimorqataj pozoman pikunachus munasharqanku Danielta wañuchiyta chaykunata. Chaypachallapitaj leonesqa paykunata mikhuykorqanku rey rikushajtin.