Read Quechua Bolivia DC Bible OSEAS 10 Bible Online

OSEAS 10 - Quechua Bolivia DC Bible bible

OSEAS 10

¹Israelqa, uj uva sach'a jina poqoywan junt'a kashan; pero aswan ashkhata poqochisqankoqa aswan ashkha altaresta jatarichinankupaj karqa; jallp'ankupis aswan k'achitu karqa; astawan k'acha t'aqasqa rumista ruwanankupaj karqa.

²Israelpata sonqonqa iskayman t'aqasqa kashan, kunantaj juchasninrayku paganqa. Chay altaresninta Señor phirenqa, chay t'aqasqanku k'acha rumistataj q'alata urmaykuchenqa.

³Kay ayllu kunan nerqa: Mana tiyapuwanchu reyniyku, mana tukuy sonqowan Señorta yupaychasqaykurayku. Chaywampis, reyrí, imatataj ruwayta atinman noqanchejraykuri?

⁴Paykunaqa parlanku, parlallankupuni, falsosta prometenku tratosninkumampis sutinkuta qelqaykunku; juicionqa wañuchikoj qhora jina kanqa chay campo chajras surk'usnejpi wiñarin jinata.

⁵Samariamanta runakunaqa kharkatitinku; waqanku chay Bet-avempi waka uñata chinkachisqankumanta. Chaymantamá tukuy llajta, sacerdotesnintin jik'un jik'unta waqashanku, chay alabasqa kashan chinkasqanrayku.

⁶Chaywampis, kikin waka uña lanti Asiriaman apasqa kanqa chay jatun reyman jaywakapunankupaj. Jinamanta Efraenqa p'enqasqa rikhurenqa. Israelpis p'enqasqa rikhurenqa chay lantimanta.

⁷Imaynatachus uj k'aspi yakuwan apaykusqa, jinata Samariamanta reypis chinkarichisqa kanqa.

⁸Juchasapaspa lanti wasinku t'unasqas kanqanku, maypichus Israel ayllu juchallej chaykuna. Chay altaresninku pataspitaj qhepus khishkaspis wiñanqanku, runastaj orqosta nenqanku: Pakaykuwayku!, nispa; chhankastataj nenqanku: Pataykuman urmaykuwayku!, nispa.

⁹Señor nin: Israelqa mana saqenchu juchalliyta, maypachachus Gabaapi juchallerqa chaymantapacha. Juchallampipuni kashan! Chayraykumari guerrapis Gabaapi chay sajra runasman chayanqa.

¹⁰Kay ayllutaqa jasut'isaj munasaj chayqa, nacionespis contrampi tantaykukorqanku maypachachus jatun juchasninkumanta noqa jasut'ejtiy.

¹¹Efraenqa, imaynatachus uj mansa waka p'uti granota trillaywan gustachikun jina karqa. Noqa churani yugota chay k'acha kunkitanman carrota aysanampaj, Judatajrí aradota aysanqa, Jacobtaj aysanqa rastrillota.

¹²Paykunaman nerqani: Allin cheqa kajta tarpuychej, munakuy cosechata oqhariychej. Wakichiychej jallp'ata watejmanta tarpunaykichejpaj, imaraykuchus Señorta mask'ana tiempoña, pay jamunankama apamuspa qankunaman salvacionmanta parata.

¹³Qankunaqa tarporqankichej juchallata, oqharerqankichejpis sajra kajllata, mikhorqankichejtaj llulla poqoykunasllata. Guerrapaj t'aqasqa kaj carrosniykipi, jinataj chay may chhika guerrapi maqanakojkunaykipitaj confiakusqaykirayku,

¹⁴runasniyki ukhupi ch'ajwas oqharikonqa chay pakakuna wasisniykichejpis q'ala pampachasqa kanqa, imaynatachus rey Salmán chay maqanaku p'unchaypi pampacharqa maypachachus mamata wawasnintinta ch'anqarqanku jinata.

¹⁵Ajinallatataj qankunatapis qhatirisonqachej, Betelpi tiyakojkuna may jatunta juchallisqaykichejrayku. Israelpa reynin wañonqa sut'iyayllamantaraj!