Read Quechua Bolivia DC Bible OSEAS 12 Bible Online

OSEAS 12 - Quechua Bolivia DC Bible bible

OSEAS 12

¹Efraenqa wayrallata upispa kausan: Tukuy p'unchaynintinta inti llojsimuy wayraj qhepanta ripun. Llullerasninta yapashallampuni, millay phiñaywan ruwaykunasnintapis, Asiriawan tratosta ruwarikun, aceite t'inkastataj Egiptoman aparichin.

²Señor pleitota oqharin Israelwan. Jacobpa ayllunta jasut'enqa chay jinata ruwasqanmanta, chantá pagaponqa chay ruwasqanman jina.

³Jacob manaraj nacekushaspa hermanompa jap'inanta qhechorqa, ña runaña kaspañari Dioswan maqanakorqa.

⁴Angelwan maqanakorqa atipaykorqataj; waqarqa, mañakorqataj payta khuyakunanta. Dios tinkorqa paywan Betelpi, chayllapitaj paywan parlarqa.

⁵Señor Tukuy Atiyniyoj Dios: Señormin sutenqa!

⁶Ajinaqa ari, Israel kutirikuy Diosniykiman; ruwasqasniyki kachun munakuypi cheqa kajpitaj, Diosniykipitaj confiakullaypuni.

⁷Señor nin: Canaanqa falso pesanata makimpi jap'ishan, imaraykuchus runasta ch'aukeyay aytaqa gustan.

⁸Efraenqa nin: Qhapajyaykuni, allin kaj qhatiriwan, jinapis ni pi ch'atanawan kanqachu chay gananciasniyta llullakuspa tarisqaymanta!

⁹Noqa Señor Diosniyki kani, Egiptopi kasqaykimantapacha. Watejmanta carpas urapi tiyanaykita ruwasaj, chay ch'in pampaspi tinkorqanchej chay p'unchaykunaspi jina.

¹⁰Noqa parlarqani profetasman, astawanqa mosqoykunapi k'iskimanta parlarqani, paykunajtataj kikinchachina ruwaykunasta churarqani.

¹¹Galaadpi tiyan kay pacha dioskunasninku; pero chaykunaqa qhasi mana kaj dioskunalla kanku. Gilgalpiri torosmanta rikuchikusninkuta jaywanku. Chay altarkunasninkupi, campo surk'uspi rumi qollus jina kanku.

¹²Jacob ayqerqa Arampa camposninman, chaypitaj warminta tarinampaj ovejas michejmanta kanan karqa.

¹³Señor orqhomorqa Egiptomanta Israel ayllunta uj profetanejta. Paykunata waqaycharqa uj profetanejta!

¹⁴Efraimpa runasnenqa, may llakiyta Señorta phiñaykuchinku; chayraykumari Señor pagachikonqa chay sajrasta ruwasqasninkumantapis, paykunaman kikin juchata ruwasqasninkutataj urmaykuchenqa.