Read Quechua Bolivia DC Bible OSEAS 13 Bible Online

OSEAS 13 - Quechua Bolivia DC Bible bible

OSEAS 13

¹Maypachachus Efraimpa runasnin parlashajtinkoqa Israelmanta waj ayllukunataj respetowan qhawarqanku; Efrainrí, maypachachus Baalta yupaychasqanrayku juchallikuspa wañorqa.

²Kunan juchallapiraj kashanku! Qolqesninkuta unuyarichispa lantista ruwarikunku sapa munarispa, chay ruwajkunaspa munasqanman jina. Chaymanta ninku: Rikuchikusta jaywaychej! nispa; runastaj much'arinku chay waka uñasman rijch'akun lantista.

³Chayrayku paykuna kanqanku sut'iyaymanta phuyus jina, tuta tutamanta chhullaqa inti llojsimusqantawan chinkapuna ajinata, chantá imaynatachus pajata wayralla apakapun ajinataj, imaynatachus q'osñi chimeneamanta llojsipun ajinallataj.

⁴Señor nin: Noqa Señor Diosniyki kani Egiptopi kasqaykimantapacha: Ama pitapis Diosniykipaj jina rejsiychu manachayqa noqallata, noqallamin salvajniykeqa kani.

⁵Noqamin waqaycharqayki chay rupha q'oñi ch'in pampaspi.

⁶Pero maypachachus mikhunawan atipachikorqankichej chaypachaqa, sonqoykichej ukhupi mayta runaykachaspa noqata qonqarparipuwarqankichej.

⁷Chayrayku, león jina paykunawan kasaj, imaynatachus uj leopardo ñampi jap'inampaj wateqan ajinata.

⁸China jukumari imaynatachus uñasninta chinkachispa llojsin mask'aj, ajinata ñanninkuman llojsisaj, sonqonkutataj t'unata ruwasaj. Chay kikimpi uj león jina oqoykusaj, monte animal jinataj q'alata t'unasaj.

⁹Israel q'alata t'unasqayki manataj pipis jark'ayta atiwanqachu.

¹⁰Kunanrí, maypitaj reyniyki tukuy llajtasniykipi jark'akunasumpaj kashan? Maypitaj kashanku kurajkunasniykiri, paykunamantachus mañarqanki reyta kuraj kaj runasniykitapis chaykunari?

¹¹Noqa qanwan phiñasqa kaspa reykunasta qorqayki, jinataj qanwan phiñasqallataj chay reykunata qhechukaporqayki.

¹²Efraimpa sajra ruwasqasnenqa yuyasqa kashan, juchasnimpis rejsisqa qhepakun.

¹³Israelpaj chayamun nacechikunan rato, jinapis chay wawari may wampu kasqa, mana allinmanta nacekamunampaj jinallapis cheqanchakorqachu, mana nacekamuyta munaspa.

¹⁴Sepulturaj makinmantapis kacharichinaychu kanqa? Wañuymantapis orqhonaychu karqa? Maypitaj kashan, oh wañuy, chay wañuchej atiyniykiri? Manaña kay runaspaj khuyayneyqa kanqañachu!

¹⁵Qhora jinapis Israelqa t'ikarichun, inti llojsimuy wayra jamonqa chimpamanta sinch'ita phukumuspa, jinamantataj yaku qochasninkuta jinataj juturisninta ima tukuchispa ch'akirparichenqa. Enemigo qhechonqa paymanta k'acha imasnin waqaychasqasninta.

¹⁶Samaria llajtapis jasut'ita apanan tiyan Diospa contranta oqharikusqanrayku. Espadawan t'ojsisqas wañonqanku, wawasninkutaj ch'anqasqas kanqanku, wijsayoj warmisninkupis khallasqas kanqanku.