Read Quechua Bolivia DC Bible OSEAS 7 Bible Online

OSEAS 7 - Quechua Bolivia DC Bible bible

OSEAS 7

¹Maypachachus Israel aylluywan allin kaymanña yaykuyta munasharqani, maypachachus jampikapuyta munasharqani, jinallamanta Efraín jinataj Samariapis juchasninkuta, chay millay ruwasqasninkutapis sut'iman rikhuricherqanku; imaraykuchus tukuyninku llullas kanku, suwas jina wasisman yaykuykunku, kikin ñan patapi runasmantapis qhechuraj churakunku.

²Mana yachankuchu noqa qhawashasqayta chay tukuy sajra ruwasqasninkuta. Kunanqa chay kikin ruwasqasninku paykunaman muyuykun, chay tukuytaj rikuynimpi kashanku.

³Runasneyqa millay ruwasqasninwan llullerasninwantaj reykunasninta kurajkunasnintapis kusichishan.

⁴Tukuyninku qhenchas kanku; Uj horno jina kanku, uj enqhaj enqhayta saqerparinman, chaykamataj t'anta masaqa poqoykapunmanña ajinata.

⁵Maypachachus reyninchej pilluchakushajtenqa chay kurajkuna onqoykucherqanku vinoj k'ajayninwan. Paytaj makinta jaywarqa asipayasharqanku chaykunaman!

⁶Sonqonkuta qonku qhasimanta ch'ataykunasman, uj hornota jina; imaynatachus uj enqhajqa tukuy tutantinta puñurparin, q'ayantin paqarimpajtaj hornoqa k'ajarishajllapuni kanqa, ajinata.

⁷Arí, tukuy paykunamanta ruphaykushanku imaynatachus uj horno kamachejkunasninta q'olaykushanman jinata. Tukuy reykunasninku urmarqanku, manañataj ni ujpis kanchu qhaparikuwajkunaqa.

⁸Efraenqa waj aylluswantaj chhapuykukun. Efraenqa, imaynatachus uj tortata uj ladollanmanta ruphaykunman jinamin kashan.

⁹Mana rejsisqa runas kallpanta qhechurpayanku, paypa mana rikukusqallan. Chojchasnimpi yurajyaporqa mana reparakusqallan!

¹⁰Israelpa runaykachasqanqa paypa contrallampitaj sut'inchashan. Chaywampis paykunaqa mana kutirikorqankuchu nitaj Señor Diosninkuta mask'arqankuchu.

¹¹Efraenqa, uj paloma jina umphu, mana allin yuyayniyoj; Egiptomanta yanapata mañakun, chantarí Asiriamampis qayllaykullantaj.

¹²Maypachachus, jaqayman rejtinku, ch'ipayta paykunaj patanman mast'aykusaj, pata qhawaj p'isqosta jina urmarachisaj, jinatamin jap'irasaj juchasapas kasqankurayku.

¹³Ay paykunamanta, noqamanta t'aqakuwasqankurayku! Phirichikonqankuraj contrayta oqharikusqankurayku. Munani paykunata salvayta, jinapis paykunaqa contraypi llullasta parlanku.

¹⁴Qhaparqachanku camankupi kashaspa manataj sonqowanchu wajyakuwanku. Trigota jinataj vinota mañakuspa nanarachikunku. Contraypi oqharikorqanku!

¹⁵Noqa paykunata yachacherqani, makisninkupipis kallpata qorqani, paykunarí contraypi sajrasta yuyaychakorqanku.

¹⁶Lantikunaman kutiporqanku; uj wist'u arcoj wach'in waj ladollaman ripun ajinata, paykunapis waj ladollaman ripunku. Phiña palabraswan parlasqankurayku kurajkunasninku t'ojsinaswan t'ojsisqas wañonqanku, Egiptopitaj paykunamanta asiykukonqanku.