Read Quechua Bolivia DC Bible OSEAS 9 Bible Online

OSEAS 9 - Quechua Bolivia DC Bible bible

OSEAS 9

¹Ama kusikuychu Israel; ama kusikuywan phinkiriychu waj llajta jinaqa. Qanqa qhenchachakunki Diosniykita saqerpayaspa. Maypichus grano trillakun chay eraspi, qanman gustasunki chay qhenchachakusqaykimanta t'inkasta jap'ikuy.

²Israel aylloqa mana trigoyoj nitaj vinoyoj kanqa, mosoj vinon kajpis mana bastachu kanqa.

³Efraenqa Egiptoman kutiponqa, Asiriapitaj mikhonqa ch'ichi mikhunasta. Manaña Señorpa jallp'ampeqa tiyakonqachu.

⁴Mana ujyanqankuchu vinotapis Señorpa sutimpi nillataj rikuchikusninkutapis chaypi jaywanqankuchu. Mikhunanku t'antapis qorpacha t'anta jina kanqa, pischus mikhojkunapi khuchichasqas rikhurenqanku. Paykuna mikhuykonqanku chay t'antata, manataj Señorpa yupaychana wasinman apayta atenqankuchu.

⁵Imatataj qankuna ruwankichej chay fiesta p'unchaypi, yuyarinapaj nisqa chay Señorpa fiesta p'unchaynimpi?

⁶Paykunaqa chinkachisqas kanamanta ayqenku. Egiptotaj jap'ikaponqa, Menfispitaj p'ampasqas kanqanku. Qolqe jallch'anasninkupirí itapallu qhoraslla junt'aykonqanku, jarasninkupipis khishkaslla junt'aykonqanku.

⁷Chayamunkuña jasut'ina p'unchaykunaqa! Ña chayamunkuña ruwasqankuman jina pagana p'unchaykunaqa! Israelpis yachanqa chay p'unchaykuna chayamusqankuta! Qankuna ninkichej: Profetaqa wampu, yuyaychasqa runapis ancha uman muyusqa, nispa. Pero chay tukuyta ninkichej juchawan junt'as kasqaykichejrayku, jinataj jatun phiñakuywan junt'as kasqaykichejrayku.

⁸Dios churarqa profetanta Efrainta qhawanampaj, qankunatajrí chay purinanman tojllasta mast'arqankichej: Diospa yupaychana wasimpipis chejninkichej.

⁹Q'ala millay kausayman qonkaporqankichej chay Gabaaj tiemposnimpi jina. Chaywampis Señor yuyarikonqa tukuy juchasinkumanta jasut'enqataj chay juchasninkumanta.

¹⁰Señor nin: Maypachachus Israelta tarerqani chaypachaqa, kusikorqani, ch'in pampapi uvasta tarikuspa kusikunku jinata. Ñaupa tatasniykichejta noqaj rijch'ayniyman kawarqa, chay ñaupa poqoj higoskuna jina. Pero maypachachus Baal-peorman chayarqanku chaypachaqa, chay qhasi llulla dioskunasnillankuman sirvej churakorqanku, jinamanta q'ala millachikunasman tukorqanku chay mayqentachus munakusharqanku chay lantikunaman jina.

¹¹Efraimpaj may jatun kasqanqa uj phawaj p'isqo jina phawanqa. Mana astawan wawas nacekonqañachu, manaña wijsayoj onqoy warmis kanqañachu manaña astawan wawas nacenankupaj.

¹²Chaywampi wawasninkuta uywaspa kausachinkuman chayqa, noqa qhechukapuyman ni uj puchuyojta. Ay, imachus kay runasmanta kanman paykunamanta t'aqakapojteyqa.

¹³Rikuni, Efraenqa wawasninta imaynatachus ruwasqanta. Payqa chay uywa jap'ejkuna jina orqhomun wañuyman entregaykunallampaj.

¹⁴Qopullay, Señor, chay qonayki karqa chayta! Qoy, mana jayk'aj wawaswan wijsallikoj wijsasta ñuñusninkutapis mana lecheyojta!

¹⁵Señor nin: Gilgalpi tukuy kaj juchata ruwarqanku, chaypitaj chejnikuyta qallarerqani. Chay sajra ruwasqasninkuraykutaj wasiymanta paykunata wijch'usaj; manaña munakullasajpunichu, chay kuraj runasninkupis tukuyninku contraypi oqharikorqanku.

¹⁶Efraenqa nanasqasniyoj kashan; imaynatachus uj ch'aki saphisniyoj sach'a manaña poqonchu jinata. Wawasnin kajtimpis noqa tukuyta wañurachisaj.

¹⁷Kay aylloqa Diosniyta mana kasuyta munarqachu. Chayraykumin Diosneyqa paykunata qhesachallanqataj, tukuy llajtasnejta puriskiris jina purinankupaj.