Read Quechua Bolivia DC Bible JOEL 3 Bible Online

JOEL 3 - Quechua Bolivia DC Bible bible

JOEL 3

¹Nin Señorqa: Chay p'unchaykuna chayamonqa chaypachaqa, Judapi kaj runasta, Jerusalempi kajkunata preso kayninkumanta orqhosaj. Jinamanta kausayninkuta uj jinaman tukuchisaj.

²Tukuy nacionesmanta runasta tantaykusaj, chanta Josafat Valleman paykunata apasaj. Chaypitaj noqa paykunamanta cuentata mañasaj, imatachus Israel aylluywan ruwasqankumanta. Paykunaqa israelitasta mundontinman ch'eqeracherqanku, chanta jallp'ayta partinakorqanku.

³Suertesta choqayllawan runasniyta partinakorqanku. Qhari wawasta, warmi wawastataj venderqanku, chay qolqewanrí vinota ranterqanku, wakintataj qhencha warmispi gastarqanku.

⁴Qankunarí, imata munankichej noqawanri, Tiropi tiyakoj runas, Sidompi tiyakoj runas, jinataj Filisteapi tiyakoj runaspis? Vengakuytachu munankichej noqawan? Munashankichejchu imallatapis qosunaykichejta? Pisimantawan qopusqaykichej imachus qankunapaj atikusqanta, purisqaykichejman jina!

⁵Qankunaqa qolqeyta qoriytapis suwawarqankichej, temploykichejmantaj k'acha qhapaj imasniyta apakaporqankichej.

⁶Judapi tiyakoj runasta karusman aparqankichej, jinallataj Jerusalempi tiyakoj runastapis. Griego runasmantaj venderqankichej kamachis jina kanankupaj.

⁷Kunanqa noqa paykunata orqhomusaj, maymanchus venderqankichej chaymanta. Qankunatañataj kikillantataj ñak'arichisqaykichej.

⁸Qhari wawasniykichejta, warmi wawasniykichejtataj judiosman vendesaj, paykunataj sabeo sutiyoj llajtayojkunaman vendenankupaj, chay karu llajtayoj runasman. Noqa Señormin kaytaqa nini.

⁹Kayta willaraychej naciones ukhupi: Cheqan maqanakuy kananta niychej! Kallpayoj runasta wajyaychej! Jamuchunku maqanakojkuna, ñaupajmantaj thaskichunku!

¹⁰Azadonesninkumanta espadasta ruwakuchunku. Hocesninkumantataj lanzasta ruwakuchunku. Pisi kallpayojkunataj nichunku: Kallpasapa kani!, nispa.

¹¹Tukuyniykichej qankuna, qayllapi kaj naciones, usqhayllata jamuychej, tantaykukuychejtaj! Llamp'u sonqoyoj runapis maqanakojman tukuchun!

¹²Nacionesqa wakichikuychej. Josafat nisqa valleman riychej. Chaypimin Señor juzganqa, muyuyninmanta kaj tukuynin nacionesta.

¹³Imaraykuchus paykunaqa chhika sajras kanku. Poqosqa trigosta jina paykunata ruthuychej. Chajra oqhariy tiempoqa chayamunña. Uvasta jina paykunata p'allchiraychej, vinota ruwanapaj wakisqañamin kashan.

¹⁴Decidikuna Vallepeqa, manchay ashkhapuni kashanku. Señorpa p'unchaynenqa qayllamushanña.

¹⁵Inteqa, jinallataj killapis laqhayanku. Estrellaspa lliphipiyninkupis chinkapushan.

¹⁶Maypachachus Señorqa uyarichimonqa jatun qhapariyninta, Jerusalempi Sión orqomantapacha chaypachaqa, janaj pacha, jinallataj jallp'apis kharkatiyta qallarinku. Chaywampis Señorqa waqaychajnin jark'ajnintaj kanqa israelita runaspaj, paykuna ayllun kasqanrayku.

¹⁷Chaypachamá qankuna yachankichej, noqa Señor Diosniykichej, tiyakusqayta noqaj t'aqasqa Sión orqopi. Jerusalemtaj noqapaj t'aqasqa llajta kanqa. Manataj jayk'ajpis waj llajtayojkuna atipanqankuchu.

¹⁸Chay p'unchaypi vinowan lechewanqa, orqospi, lomaspiwan ima, yakus jinapuni correnqanku. Judá llajtapitaj tukuynin juch'uy mayuspis, ashkha yakusniyoj kanqanku. Temploymantarí yaku juturi kichakonqa, chaywantaj Sitim Valle qarpakonqa.

¹⁹Egipto llajta t'unasqa kanqa. Edom llajtataj ch'in pampaman tukuchisqa kanqa, imaraykuchus maqanakoj yaykorqanku Judapi tiyakojkunaman. Jallp'ankupitaj mana juchayojkunajpata yawarninta jich'arqanku.

²⁰Chay jinata wañuchisqankurayku, noqa paykunata wañurachisaj. Juchayojtarí mana perdonasajchu. Judapi jinallataj Jerusalempipis, runas tiyakonqankupuni wiñaypaj wiñaynintinkama. Noqa, Señortaj, Sión orqopi tiyakusaj.