Read Quechua Bolivia DC Bible AMÓS 1 Bible Online

AMÓS 1 - Quechua Bolivia DC Bible bible

AMÓS 1

¹Amospa willaynin. Payqa Tecoa llajtamanta karqa, ovejasta michej runa, Diosmantataj jap'eqarqa imatachus Israelman niyta munasqanta, jallp'a ikhakuymanta iskay wata ñaupajta, Judapi Uzías rey kashajtin. Joaspa wawan Jeroboamtaj Israelpi rey kasharqa.

²Nerqataj: Sión orqomanta Señor musphayta qhaparimojtin, chantá Jerusalenmantawan chaypacha, ch'iki jallp'as ch'akiponqa, Carmelo orqo puntaspis astawan ch'akenqa.

³Ajinata nin Señorqa: Damascomanta kaj runasqa ashkha sajra imaspi juchallinku, chayrayku paykunata jasut'isajpuni; imaraykuchus Galaadmanta kajkunata fierro trilloswan trillarqanku.

⁴Chayrayku Hazaelpa wasinman ninata jap'iykuchisaj, chay ninataj q'olaykonqa Ben-Hadadpa palaciosninta.

⁵Damasco llajta punkusta kallpawan kicharisaj, phiritataj ruwasaj Bicatavempi mandayta, jinallataj Bet-edempi kamachejtapis. Siriostaj Kirman presos apasqas kanqanku. Nispa nin Señorqa.

⁶Ajinata nin Señorqa: Gazamanta runas ashkha sajra imaspi juchallinku, chaynejta jasut'isajpuni; imaraykuchus llajtantinta apaspa Edonman presosta pusakaporqanku.

⁷Chayrayku Gaza llajtaj perqasninman ninata jap'iykuchisaj, chay ninataj palaciosninkuta q'olaranqa.

⁸Phirita ruwasaj Asdodpi kamachejta, jinallataj Ascalompi kamachejtapis chinkachisaj. Tukuy atiyniywan Ecrompa contrampi kachaykukusaj, jinamanta tukuynin filisteos wañoranqanku. Ajinatamin nin Señorqa.

⁹Ajinata nin Señorqa: Tiromanta runasqa ashkha sajra imasta ruwaspa juchallinku, chayrayku paykunata jasut'isajpuni; paykunaqa tukuy aylluntinta Edomman vendeykunku wata runasta jina, chay aylluwantaj uj tratota ruwarqanku hermanos jina kanankupaj.

¹⁰Chayrayku Tiro llajtaj perqasninman ninata jap'iykuchisaj, chay ninataj palaciosninkuta q'olaykonqa.

¹¹Ajinata nin Señorqa: Edonmanta runasqa ashkha sajra imasta ruwaspa juchallinku, chayrayku paykunata jasut'isajpuni; paykunaqa makinkupi espada oqharisqa hermanosninku israelitasta mana khuyakuspa qhatiykacharqanku. Paykunaqa phiñakuspa munayninkuta ruwarqanku, phiñakuyninkoqa mana thasnukoj karqa.

¹²Chayrayku Temanman ninata jap'iykuchisaj, chay ninataj Bosraj palaciosninta q'olaykonqa.

¹³Ajinata nin Señorqa: Amonmanta runasqa ashkha sajra imasta ruwaspa juchallikunku, chayrayku paykunata jasut'isajpuni; paykunaqa jallp'asninkuta jatunyachiyta munaspa Galaadmanta kaj onqoj warmispa wijsasninkuta khicharerqanku.

¹⁴Chayrayku Rabá llajtaj perqasninman ninata jap'iykuchisaj. Chay ninataj q'olaykonqa palaciosninkuta, may maqanakuy ch'ajwa ukhupi, may qhaparikuy llakiy p'unchaypitaj ukhupi.

¹⁵Reyninkutaj ch'in pampaman ayqenqa tukuy sumachaj runasninwan. Ajinatamin nin Señorqa.