Read Quechua Bolivia DC Bible AMÓS 5 Bible Online

AMÓS 5 - Quechua Bolivia DC Bible bible

AMÓS 5

¹Israelitas uyariychej kay palabrasniyta, qankunaj contraykichejpi llakiy takisqayta.

²Chhika k'acha llimphu Israel urmapun, manaña ujtawan sayariyta atinampaj. Kikin pampapi wijch'usqa qhepakun, mana pipis kanchu aysarej.

³Israelitasmanqa ajinatamin nin Señor Diosqa: Sichus uj llajta waranqa runasta maqanakuman kachanman chayqa, kutimunmantaj pachajllaña. Sichus uj llajta pachaj runasta maqanakuman kachanman, kutimunmantaj chunkallaña.

⁴Israelitasmanqa ajinatamin nin Señor Diosqa: Qayllamuwaychej noqaman, chantaqa kausankichejtaj.

⁵Ama Betelmanqa qayllaychejchu, amataj riychejchu Gilgalman, nitaj Beersebanejtapis riychejchu; imaraykuchus Gilgalmanta kajkunaqa presos apasqas kanqanku, Beteltaj chinkachisqa kanqa.

⁶Señorman qayllaychej, chantaqa kausankichejtaj. manachus jinata ruwankichej chayqa, Pay ninata apachimonqa Israelpa patanman; Betelpitaj mana pipis kanqachu chay ninata thasnoj.

⁷Ay qankunamanta cheqan kajta ajenjo jina jayaman tukuchejkuna. Allin ruwana kajtapis pampaman wijch'unkichej.

⁸Señormin chay chhika ashkha qoyllurkunata ruwajqa, tutatapis p'unchayman tukuchin, p'unchaytapis laqhaman tukuchin; Pay mar qochamanta yakutapis wajyaspa jallp'a pataman parachimun; Paymin jatuchaj perqasta urmachin, raqaymantaj tukuchin. Paypa sutenqa Señormin.

¹⁰Ay qankunamanta cheqan kajta ruwajta chejnejkuna, cheqanta sut'inchajkunata millachikojkuna.

¹¹Qankunaqa mana atiwajchejchu rumimanta ruwasqaykichej wasispi, nitaj vinotapis ujyawajchejchu tarpusqaykichej uvasmanta; wajchasta sarusqaykichejrayku; trigomanta impuestota mañasqaykichejrayku.

¹²Noqa rejsini millay sajra kasqankuta, juchasninkoqa mana tukukoj, llakichinku cheqan runasta, lluk'irastataj jap'inku; cheqanchana wasispitaj wajchastaqa imapipis atipankupuni.

¹³Chaynejta yachayniyoj kajqa ch'inllaña kakun, imaraykuchus p'unchaykunaqa ancha sajra.

¹⁴Mask'aychej allin kajta, mamataj sajra kajtaqa, chantaqa kausankichejtaj; ajinamanta qankunaj nisqaykichejqa cheqan kanqa. Tukuy Atiyniyoj Señor Dios qankunawan kashan.

¹⁵Sajra kajta chejniychej, allin kajtataj munakuychej. Cheqan ruwayta sayachiychej juzgana cheqapi; ichapis jinamanta Tukuy Atiyniyoj Señor Dios khuyasonqachej Israelmanta puchoj runasta.

¹⁶Ajinatamin nin Tukuy Atiyniyoj Señor Diosqa: Tukuy plazaspi waqay kanqa, tukuy callespitaj nanaywan qhapariy kanqa, chay llakiymantaj campo runasta wajyanqanku, waqaspa kausajkunatapis chay waqayman wajyanqanku.

¹⁷Tukuy uvas huertaspitaj waqanqanku, maypachachus jasut'ej jamusaj chaypacha. Ajinata nin Señorqa.

¹⁸Ay, phutiy, pikunachus Señorpa p'unchaynin chayamunallantaña munashanku chaykunamanta. Yachankichejchu imaynachus chay p'unchay qankunapaj kananta? Chay p'unchayqa laqha p'unchay kanqa, mana p'unchaychu.

¹⁹Chay p'unchayqa kanqa, imaynachus uj runa leonmanta ayqekushaspa, jukumariwanñataj tinkuykun, chayri wasinman yaykun, perqamantaj arrimaykukojtin katariñataj khanirparinan, jina kanqa.

²⁰Arí, Señorpa jamunampeqa laqha tutalla kanqa, mana k'anchayqa kanqachu; laqha kanqa, manapuni imaynamantapis sut'imonqachu.

²¹Fiestachakusqasniykichejta chejnikuni, qhesachanitaj; sumajta tantakusqasniykichejqa manapuni noqapajqa allinchu.

²²Mana noqaqa munanichu rikuchikusta sutiyrayku ruphachipuwasqaykichejta, ch'aki mikhuykunamanta ofrendasta apamuwasqaykichejtapis mana munanichu. Manallataj jap'isqaykichejchu sumachaj wira waka uñasta allinyakunawaykichejpaj ruphachisqaykichejtapis.

²³Karunchaychej noqamanta chay ch'ajwaspa takisqaykichejta, mana munanichu arpasniykichejpa waqasqanta.

²⁴Astawampis ashkhayachun cheqan ruway yaku jina, k'acha kaytaj kachun mana tukukoj yaku pujyu jina.

²⁵Israelitas, qankunaqa tawa chunka wataspichu ch'in pampaspi rikuchikusta, ofrendastawan jaywawarqankichej?

²⁶Kunanqa, Sicut reyniykichejta Quiyún qoyllurta q'epirikunaykichej tiyan, dioskunasniykichej lantista, mayqenkunatachus qankunallataj ruwankichej.

²⁷Damascomanta aswan jaqayman apachichisqaykichej. Ajinata nin Tukuy Atiyniyoj Señor Diosqa. Chaymin sutenqa.