Read Quechua Bolivia DC Bible NÚMEROS 11 Bible Online

NÚMEROS 11 - Quechua Bolivia DC Bible bible

NÚMEROS 11

¹Uj pachataj israelitasqa Señorpa contranta thutuyta qallarerqanku. Señortaj chayta uyarispa k'ajaj phiñakuyninta rikucherqa, jaraj ujnin cantonta ninawan ruphaykucherqa.

²Runastaj Moisesman qhaparerqanku. Moisestaj chay ratopacha Señormanta mañakorqa. Ninataj chay kikimpacha thasnukorqa.

³Chay cheqataqa suticharqanku Tabera, nispa, chay cheqapi Señorpa ninan jarankuta ruphaykusqanrayku.

⁴Israelitas ukhupi imaymana waj llajtayoj runas karqanku. Chaykuna yarqhaywan thutuyta qallarerqanku, jinallataj israelitaspis waqayta qallarerqanku: Pitaj kunan aychata mikhuchiwasunri!

⁵Noqaykoqa yuyarikuyku, Egiptopi qhasilla mikhoj kayku challwasta. Chanta mikhullajtaj kayku pepinosta, melonesta, puerrosta, cebollasta, ajosta ima.

⁶Kunanri yarqhaywan wañushaykuña, ni imapis kaypeqa kanchu; Maná nisqa t'antalla tiyan.

⁷Maná nisqaqa culandro muju jina q'elluyasqa karqa.

⁸Q'apaynenqa mosoj aceite jina karqa. Runasqa llojsispa pampasmanta pallakamoj kanku, apamuspataj kutaj kanku, manachayri takaj kanku; jinaspataj wayk'oj kanku, manachayri tortillasta ruwaspa chayachikoj kanku.

⁹Ch'isin jaranku pataman urmamojtinkama, Maná nisqapis chaypa patanman urmamullajtaj.

¹⁰Moisesqa uyarerqa israelitasta, wawasninku ima jarasninku punkupi waqarashajta. Señortaj chaymanta mayta phiñakorqa. Moisesmampis manallataj allinchu rijch'arqa.

¹¹Chaymanta Moisesqa Señorman nerqa: Imaraykutaj kay kamachiykita mana allinta ruwawankiri? Imapitaj mana allinta rijch'aykiri? Imapajtaj kay runasta pusachimuwankiri?

¹²Kay tukuy runasqa noqaj wawasniychu imataj kankuri, makiypi ichuspachu paykunata apaykachasaj uj ñuñoj wawata jina, mayqen jallp'atachus tatasninkuman qonaykita nerqanki chayman chayachinaypaj?

¹³Maymantataj noqaqa aychata apamusaj kay chhika runata mikhuchinaypajri? Aychata qowayku nispa noqallaman waqaspa jamuwanku.

¹⁴Noqa sapayqa manaña pusaykachaymanchu kay tukuynin runastaqa; noqapajqa anchapuni paykunata pusaykachanayqa.

¹⁵Sichus qan ajinallatapuni ruwawanki chayqa, qhechuway kausayniyta, sichus qan munakuwanki chayqa. Ajinamanta, Señor, noqaqa manaña ñak'arisajchu, nispa.

¹⁶Señortaj payman kuticherqa: Qan tantapuway qanchis chunka kurajkuna israelitasta, mayqenkunachus israelitasta kamachishanku chaykunata. Paykunata pusamuway Dioswan tinkukuna toldo punkuman, chaypi qanwan khuska suyawaychej.

¹⁷Chayman uraykamusaj, qanwantaj parlasaj. Chantaqa qampi kaj espirituta wakinta paykunaman qosaj, paykuna kay runasta kamachiyta, pusayta ima yanapasunankupaj. Ajinamanta qan manaña sapaykichu rikukunki.

¹⁸Chantaqa nillaytaj q'ayapaj runas llimphuchakunankuta, aychatataj mikhonqanku. Noqa paykunata waqashajta uyarini, nishajtataj: Mana aycha kanchu mikhunanchejpaj! Kaymanta nisqaqa allinta Egiptopi kakusharqanchej! Chayrayku kunanqa noqa qosaj aychata mikhunankupaj.

¹⁹Manataj qosajchu uj diapaj, iskay diapaj, phishqa diapaj, chunka diapaj, nitaj iskay chunka diallapajchu.

²⁰Manachayqa qosqay aychata uj killa junt'ata mikhonqanku amichikunankukama, senqasninkumanta phullchichimunankukama. Paykunaqa noqata qhesachawanku, noqa Señor paykunaj chaupinkupi kashajtiy. Paykunaqa ñaupaqeypi waqanku, ninkutaj: Imapajtaj Egiptomanta llojsimorqanchejri?, nispa.

²¹Chaymanta Moisesqa Señorman nerqa: Noqawan rejkunaqa sojta pachaj soldados kanku. Chaywampis qanqa nishanki, uj killa junt'ata aychata mikhuchisaj, nispa.

²²Kanmanchu ovejas, wakaspis chayta ñak'aspa kay chhika runaman aychata qonaypajqa? Mar qochamanta tukuynin challwasta jap'ispapis manaraj kay chhika runasqa sajsankumanchu.

²³Señortaj payman kuticherqa: Atiyneyqa pisichu? Kunanqa rikunki kay parlasqayta junt'asajchus manachus chayta.

²⁴Moisesqa llojsiytawan runasman willamorqa, imastachus Señor payman nisqanta. Tantacherqataj qanchis chunka kurajkuna israelitasta. Paykunata Dioswan tinkukuna toldoj muyuyninman sayaykucherqa.

²⁵Señortaj chayman phuyupi uraykamorqa, Moisesmantaj parlarqa. Moiseswan kasharqa chay espiritumantataj, wakinta chay qanchis chunka kurajkunaman qorqa. Espíritu paykunaman chayajtintaj, chay kutilla Diosmanta sut'inchajkuna jina parlayta qallarerqanku.

²⁶Chay qanchis chunkamanta iskaytaj mana rerqankuchu Dioswan parlana toldoman, manachayqa jarallankupi qhepakorqanku; sutinkutaj karqa: Eldadwan, Medadwan. Chay tukuywan paykunamampis espiritoqa chayallarqataj. Paykunapis Diosmanta sut'inchaj jina jarasninkupi parlayta qallarillarqankutaj.

²⁷Chaymantataj uj wayna Moisesman willaj correrqa: Eldadwan, Hedadwan Diosmanta sut'inchajkuna jina, jarasninkupi parlashanku!, nispa.

²⁸Chaymantataj Numpa wawan Josué, Moisesta waynamantapacha yanapajnin payman nerqa: Wiraqochi Moisés, qan niy ari, ama jinata ruwanankuta!, nispa.

²⁹Moisestaj payman kuticherqa: Qanqa chaytapis jark'aytachu munashanki? Allin kanman, Señorqa tukuynin israelitasman espirituta qonan, ajinamanta Diospa sut'inchajnin kananupaj!

³⁰Chay qhepatataj Moisesqa tukuynin kurajkunawan khuska jaraman kutiporqanku.

³¹Ujllata Señorqa mar qochamanta wayrachimorqa, chay wayrataj ashkha p'isaqasta apachimorqa. Chaykuna jarasninkuman jina junt'aykamorqa, wakintaj chay tukuy muyuyninman uj día puriymantapacha. Chay tukuynimpi p'isaqasqa tauqakorqanku yaqha uj metrota jina patampi patampi.

³²Runasqa p'isaqasta jap'illarqankupuni tuta p'unchay q'ayantin p'unchaynintin. Atisqankuman jina wakenqa ashkhata, wakintaj pisillata jap'ikorqanku. Jinamanta aychasta jarasninkoj muyuyninman ch'akirachikorqanku.

³³Wakinmanqa chay p'isaqa aychasta siminkuman churaykurispa khamuykurishajtillankuraj Señorqa k'ajaj phiñakuyninta rikucherqa jasut'ispa; ajinamanta ashkhasta ñak'arichispa.

³⁴Chayrayku chaynejta suticharqanku, Qibrot-hataava, nispa; imaraykuchus jaqaypi p'amparqanku pikunachus mikhunallapi yuyajkunata.

³⁵Qibrot-hataavamanta israelitasqa riporqanku Hazerotkama, chaypitaj jarakorqanku.