Read Quechua Bolivia DC Bible NÚMEROS 18 Bible Online

NÚMEROS 18 - Quechua Bolivia DC Bible bible

NÚMEROS 18

¹Señorqa Aaronman nerqa: Qan, wawasniyki ima, Leví ayllumanta kajkunapiwan, cuentayoj kankichej Diospa tiyakunampa contranta juchallejkunamanta. Qanwan, wawasnillaykiwan cuentayoj kankichej sacerdote kashaspa juchallikusqaykichejmanta.

²Ayllusniyki levitas kajkunata, tataykej ayllusninta niy, jamuspa yanapasunankuta; qan, wawasniyki, paykuna ima Dioswan tinkukuna toldoj ñaupaqempi Señorpa kamachisqanta ruwanaykichejpaj.

³Paykuna ruwachunku imatachus kamachisqaykita, Dioswan tinkukuna toldopi ruwana kashan chaykunata ruwachunku. Chaywampis amapuni qayllanqankuchu Dioswan tinkukuna toldopi kashan chaykunaman, nitaj altarmampis, ama wañunankupaj, nitaj qankunapis wañunaykichejpaj.

⁴Qanwan khuska ruwanqanku Dioswan tinkukuna toldopi ruwanas kashan chaykunata; qankunamantaj ni pipis waj runasqa qayllamusonqachejchu chaykunata ruwashajtiykichej.

⁵Qankunalla cuentayoj kankichej Diospa tiyakunampi imaschus kashan chaykunamanta, altarmantawan. Ajinamanta manaña phiñakusajchu israelitaswan.

⁶Noqa wauqesniyki levitasta ajllani israelitas ukhumanta, qoykichejtaj Dioswan tinkukuna toldopi imastapis ruwanankupaj.

⁷Chantaqa qan, wawasniyki imalla ruwankichej sacerdotej ruwananta, altarpi imaschus ruwana kajta, veloj qhepampi, chay imasta qankuna allinta purichinaykichejpaj. Ajinata qankunata noqa churaykichej sacerdotej ruwanasninta ruwanaykichejpaj. Sichus pipis mana sacerdote kashaspalla sacerdotej ruwananta ruwanqa chayqa, wañonqa.

⁸Señorqa Aaronman nerqa: Qan qhawanki israelitas ofrendata apamuwasqankuta. Ima laya ofrendatatachus israelitas qowasqankuta, qanman, wawasniykimanwan qoykichej imastachus ruwasqaykichejman jina. Kayqa unaypaj kanqa sapa kuti ruwanaykichejpaj.

⁹Rikuchikusta israelitas noqapaj ruphachinanku karqa: Ch'aki mikhuymanta kajkuna apamuwasqanku rikuchikus, juchamanta apamuwasqanku ofrendas ima. Ajina kay llimphuchasqa ofrendasqa qampaj, wawasniykipajwan kanqa.

¹⁰Chay ofrendasmantaqa qampaj ajllasqa kasqanrayku tukuynin qharis qankunamanta kajkuna mikhonqanku. Chaytataj mikhunkichej Diospa tiyakunampi, chay mikhunas Señorpaj t'aqasqas kasqanrayku.

¹¹Chanta qollasqaykitaj, qanwan tiyakoj qhari wawasniykiman warmi wawasniykimanwan, israelitas sumajnin kaj ofrendata qowasqankumanta. Kay imasta ruwanapaj leyqa wiñaypaj kanqa. Pillapis wasiykipi llimphuchasqa kajqa, chay imasta atillanqapuni mikhuyta.

¹²Chanta qollasqaykitaj israelitas sapa wata ñaupajta poqochisqankumanta ofrendasta apamuwasqankumanta. Sumajnin kaj aceiteta, sumajnin kaj vinota, trigotawan.

¹³Israelitas ñaupajta imastapis poqochisqankumanta ofrendasta apamuwasqankumanta qampaj kanqa. Chaykunata mikhuysikonqanku pikunachus wasiykipi llimphuchasqas kashanku chaykuna.

¹⁴Tukuy ofrendasta israelitas apamuwasqasninkoqa qanllapajpuni kanqa.

¹⁵Ajinallataj qampaj kanqa israelitaspa kuraj wawasninkumanta uywasninkoj kuraj uñasninku ima. Chay kuraj wawasninkoj cuentanmanta mana mikhuna uywasmanta ima uywastachus qosqasninkuta qan jap'ikapunki.

¹⁶Chay imasmantaqa uj killamanta nacesqanmanta qhepaman imatapis qonqanku. Chaytaj kanqa phishqa phata qolqe, imaynachus Diospa tiyakunampi precio churasqa kashan chayman jina.

¹⁷Kay kinsa laya uywaspa ñaupaj kaj uñasnintari ama imawampis trocachinkichu: Wakaspata, ovejaspata, cabraspata ima, chaykunaqa t'aqasqasña. Ñak'aspataj yawarninkuwan altar patata ch'ajchunki; wirasnintataj sumaj q'apashajta noqa Señorpaj ruphachinki.

¹⁸Aychasnintaj qampaj qhepakaponqa, jinallataj sumajnin kaj apamusqa ofrendasmanta pecho aychasnin, paña pierna aychan ima.

¹⁹Israelitaspa tukuy sumaj ofrendasta Señorman apamusqankoqa, qampaj, qanwan tiyakushankuraj chay qhari wawasniykipaj, warmi wawasniykipajwan kanqa. Kay leyqa unaypaj churasqa kanqa. Kay tratotaqa ni pi p'akiyta atinchu. Unaypaj kanqa, chaytaqa noqa qanwan ruwani, jinallataj mirayniykiwampis.

²⁰Señorqa Aaronman nerqa: Qanqa mana jallp'asniyojchu israelitas ukhupi kanki. Noqa qampata kasaj, chayaqeykitaj kasaj israelitas ukhupi.

²¹Israelitas poqochisqankumanta sapa chunkamanta uj ofrendata Señorman qosqasninkuta levitasman qopuni. Chay kanqa pagonku jina, imastachus Dioswan tinkukuna toldopi ruwasqasninkumanta.

²²Israelitastaj mana qayllanqankuchu Dioswan parlana toldoman, chayman qayllaspaqa juchachakunkuman, chaynejtataj wañunkuman.

²³Levitaslla Dioswan tinkukuna toldoman qayllaspa imatapis ruwanqanku, paykuna cuentoyoj kanqanku ima juchatachus ruwasqasninkumanta; kay leyqa wiñaypaj kanqa mirayniykichejnintimpaj. Ajinamanta levitasqa israelitas ukhupi mana jallp'ayojchu kanqanku.

²⁴Paykunaman qoni israelitas poqochisqasninkumanta sapa chunkamanta ujta Señorman qosqankuta. Chayta levitasmanqa qon, chayrayku noqa nini, paykunaqa mana jallp'asniyojchu israelitas ukhupi kanankuta.

²⁵Señorqa Moisesman nerqa: Levitasman niy, israelitas poqochisqasninkumanta sapa chunkamanta ujta qosqasninkuta, levitasman qosqasmanta, levitaspis sapa chunkamanta ujta Señorman qonankupaj t'aqallachunkutaj.

²⁷Chayqa kanqa imaynatachus israelitas trigomanta vinomantawan ofrendata qowanku ajina.

²⁸Ajinata, israelitas ofrendasninkuta apamusqankuta jap'isqaykichejmanta, qankunapis ofrendasniykichejta sapa chunkamanta ujta Señorman qonkichej, chaytataj sacerdote Aaronman jaywaychej.

²⁹Tukuy ofrendasta jap'isqaykichejmanta, sumajnin kajta t'aqaspa qankunapis Señorman qonkichej.

³⁰Ujtawan nillaytaj: Qankunapis sumajnin kajmanta Señorman qonkichej, imaynatachus israelitaspis trigomanta, vinomantapis qonku ajinata.

³¹Chaymanta puchojtaqa atinkichej maypipis mikhuyta, qankuna, familiasniykichej ima. Chaymin qankunapajqa pagoykichej kanqa, Dioswan parlana toldopi ruwasqasniykichejmanta.

³²Señorpaj sumajnin kajta ñaupajta t'aqasqaykichejmantaqa, levitasqa puchojta mana juchachakuspa atenqanku mikhuyta. Ajinamanta mana ima sajratapis ruwanqankuchu israelitaspa Señorman qosqanku ofrendasta, amataj chaynejta wañunankupaj.