Read Quechua Bolivia DC Bible NÚMEROS 22 Bible Online

NÚMEROS 22 - Quechua Bolivia DC Bible bible

NÚMEROS 22

¹Jinamanta israelitasqa rillarqankupuni, jarakorqankutaj Moab pampaspi. Chayqa kashan Jericó chimpapi, Jordán mayoj inti llojsimuynimpi.

²Ziporpa wawan Balacqa yacharqa israelitas amorreosta imatachus ruwasqankuta.

³Jinallataj Moabmanta kajkunapis maytapuni manchachikorqanku chay israelitas may chhika kasqankumanta, junt'aykamushasqankumanta.

⁴Chaymanta Moabqa Madianmanta kaj kurajkunaman nerqa: Kay chhika runasqa jallp'anchejta tukuchenqanku, imaynatachus wakas pastosta tukuchinku ajinata, nispa. Chaypacha Moabpeqa Balac nisqa rey kasharqa.

⁵Chayrayku payqa Balaamta wajyachimorqa. Chaypacha Balaamqa Amav suyu Petorpi kasharqa, chaytaj kashan Eufrates mayu chimpapi. Balacqa nicherqa Balaamman: Kay runasqa Egiptomanta jamuspa kay llajtasman junt'aykamunku, ñaupaqeypitaj tiyanoqashanku.

⁶Kunampacha usqhayta jamuy ari, kay runasta maldicinaykipaj, imaraykuchus noqamanta aswan atiyniyoj runas kanku. Ichapis qan maldicejtiyki atipayman, qharqoymantaj kaymanta. Noqa yachani qampa maldicisqayki, chayri bendicisqaykeqa ruwakumpuni, nispa.

⁷Moabmanta, Madianmanta kaj kuraj runasqa qolqe oqharisqa rerqanku maldicisqanmanta jaywanankupaj. Ajinata Balaampaman chayaytawan kacha runasqa willarqankupacha imatachus Balac nichisqanta.

⁸Balaamtaj paykunaman nerqa: Kunan ch'isi kayllapi puñukuychej, q'ayataj willasqaykichej imatachus Señor ninawanta, nispa. Jinamanta Moabmanta kacha kuraj runasqa chaypi chay ch'isi puñorqanku.

⁹Diostaj Balaamman rikhurerqa, taporqataj: Pistaj wasiykipi kashanku chay runasri?, nispa.

¹⁰Balaamtaj kuticherqa: Moabmanta Ziporpa wawan rey Balac kachamuwasqa willanawankupaj: Egiptomanta llojsimuspa runas kay tukuynejman junt'aykamuwanku, nispa. Chantapis nichimuwasqa, rispa chay runasta maldicimpunayta, ajinamanta atipaspa llajtamanta qharqonampaj, nispa.

¹²Diostaj Balaamman nerqa: Ama riychu chay runaswan israelitasta maldicej, imaraykuchus paykunata noqa bendicini, nispa.

¹³Q'ayantintaj Balaamqa tutamanta jatarispa, Balacpa kacha runasninman nerqa: Kunanqa kutipuychej llajtaykichejman. Señorqa mana munanchu qankunawan khuska rinayta, nispa.

¹⁴Chay kacha kuraj runasqa kutipuspa Balacman willarqanku: Balaamqa mana munanchu noqaykuwan khuska jamuyta, nispa.

¹⁵Balacqa ujtawan apurasqata waj aswan kuraj runastañataj aswan ashkhata kacharqa, ñaupaj kachasmanta nisqaqa.

¹⁶Paykunataj rispa Balaamman willamorqanku may apurasqata: Ziporpa wawan Balac nichimusunki ari: Allinta ruwaspa, amataj qhesachawaspa jamuriwaypuni.

¹⁷Noqaqa imatapis munasqaykita qollasqayki, imatachá mañawasqaykita ruwasaj; chayrayku allinta ruwaspa jamurillaway ari kay runasta maldicepuway, nimusunki, nispa.

¹⁸Balaamqa kutichillarqataj: Noqaqa manapuni riyta atiymanchu may chhika qorita, palaciompi tukuynin qolqeta qoshawajtimpis, jatunta, nitaj juch'uyta ruwajpis, Señor Diosniypa kamachiwasqasninta p'akispaqa.

¹⁹Chay tukuywampis kunan ch'isi kaypi puñukuychej, ujtawan Señorta tapurillasaj, ima niwanqachus kay kutipi.

²⁰Chay ch'isi Señorqa Balaamman rikhurerqa, nerqataj: Sichus chay runas qanta wajyasoj jamusunku chayqa, sayarispa paykunawan rillay, chaywampis noqaj nisqallayta ruwanki.

²¹Balaamqa q'ayantin tutamanta jatariytawan uj china burrompi karunaykukuytawan moabitaspa kurajkunasnin kachaswan rerqa.

²²Balaamqa burrompi rerqa, iskay kamachisnintawan pusarikuspa. Señortaj chay risqanmanta phiñakorqa, angelnintataj kachamorqa ñanmanta jark'anampaj.

²³Burronqa rikorqa Señorpa angelnin espadan oqharisqa ñampi sayashajta; chayrayku ñanmanta wajnejta phinkirispa rerqa. Balaamtaj ñanman kutichiyta munaspa mayta burronta jasut'erqa.

²⁴Señorpa angelnintaj sayaykorqa uvas ukhuta, chaki ñan risharqa chaypi. Chay ñanqa puraj k'uchunman perqayoj karqa.

²⁵Burrotaj Señorpa angelninta rikuspa, uj lado perqaman Balaampa chakinta ñit'iykorqa. Chaymanta Balaamqa astawan china burronta seq'orqa.

²⁶Señorpa angelnintaj aswan ñaupajman rispa uj k'uchunejman sayaykorqa. Chay ñanmanta china burronqa manaña maymampis ayqeyta aterqachu.

²⁷Burroqa Señorpa angelninta rikuspa chay kikimpi pampaman laq'arpakorqa. Chaymanta Balaamqa phiñarikuspa burrota k'aspiwan seq'orqa.

²⁸Chay kikimpacha Señorqa burrota parlaricherqa. Balaammantaj nerqa: Imanayquí noqa qantari? Kaywanqa kinsa kutitaña seq'owanki, nispa.

²⁹Balaamtaj burronman nerqa: Kaypi alqochakushawanki. Sichus makiypi cuchillo kanman karqa chayqa, kunitan wañuchiykiman karqa.

³⁰Burroqa nillarqataj: Noqaqa qampa burroyki kani, qanqa sapa kuti noqapi purinki rantiwasqaykimanta kunankama. Nitaj jayk'ajpis kay jinata purejchu kani qanta apaykachasuspa. Balaamtaj, arí, jinapuni, nerqa.

³¹Chaymanta Señorqa Balaamwan rikuchikorqa. Balaamqa Señorpa angelnin khuskan ñampi espadan oqharisqa sayashajta rikorqa. Rikuytawantaj payqa pampaman umanta chayachinankama qonqoriykukorqa.

³²Señorpa angelnintaj Balaamman nerqa: Ima nispataj burroykita kinsa kutita seq'onkiri? Noqa kani ñaupaqeykipi sayajqa. Noqamantaqa mana allintachu qanqa rishanki.

³³Burroykeqa noqata rikuwan. Rikuwaspataj manchariywan kinsa kutita ñaupaqeymanta waj ladoman rin. Sichus pay waj ladoman mana ayqenmanchu karqa chayqa, ñapis wañuwajña karqa, burrollaykita mana wañuchiymanchu karqa.

³⁴Señorpa angelninmantaj Balaamqa nerqa: Noqaqa juchallikuni. Mana yacharqanichu qan noqata ñaupaqeypi sayaykuspa ñanmanta jark'amushawasqaykita, sichus qampaj mana allin chayqa, kaymanta kutipusaj ari, nispa.

³⁵Señorpa angelnintaj kuticherqa: Atillanki riyta chay runaswan jaqayman. Chayaspalla qanqa noqaj nisqayta parlarinki, nispa. Ajinamanta Balaamqa Balacpa kachasninwan rillarqapuni.

³⁶Balactaj Balaam jamushasqanta yachaytawan, taripaj llojserqa, Arnón mayu chimpapi Moab llajtaman, chayqa chay jallp'aj tinkuyninña karqa.

³⁷Taripaspataj nerqa: Chay jinatapuni qanta wajyachimuyki, imaraykutaj qan mana kasumuwarqankichuri? Manachu qan yuyarqanki jamuwajtiyki imallatapis qanman qosunayta, jatumpitaj qhawasunayta?, nispa.

³⁸Balaamtaj payman nerqa: Kayqa kunanqa chayamuni, qanta imaynachus kasqaykita rikusunaypaj; chaywampis noqa kikiymantaqa mana imatapis parlasajchu, imatachus Dios niwanqa chayllata nisqayki.

³⁹Chaymanta Balaamqa Balacwan Quiriat-huzotman rerqanku.

⁴⁰Chaypi Balacqa runasninta kamacherqa wakasta, ovejasta ñak'anankuta, Balaamman, jinallataj paywan jamorqanku chay kuraj runasmampis qonampaj.

⁴¹Q'ayantin paqarin tutamanta Balacqa Balaamta Bamot-baalman pusarqa. Chaymanta qhawarispa Balaamqa chay israelitaspa jarasninkoj muyuyninta rikorqa.