Read Quechua Bolivia DC Bible NÚMEROS 23 Bible Online

NÚMEROS 23 - Quechua Bolivia DC Bible bible

NÚMEROS 23

¹Chaypi Balaamqa Balacman nerqa: Kaypi ruwapuway qanchis altarkunata; chaymantaj apamuy qanchis waka uñasta, qanchis carnerostawan, nispa.

²Balacqa kikinta ruwarqa imatachus Balaam kamacherqa chayta. Chay sapa uj altarmantaj uj waka uñatawan, uj carnerotawan churarqa.

³Chaymantataj Balaamqa Balacman nerqa: Qanqa kayllapi qhepakuy chay jaywanapaj wañuchisqa uywaswan khuska. Noqataj chaykama Señorta tapurimusaj, ichapis imatata niwanqa. Jamuspataj willasqayki imatachus niwanqa chayta. Chaymanta Balaamqa uj ch'in lomaman wicharerqa.

⁴Chaypitaj Señorqa payman rikhurerqa. Balaamtaj nerqa: Kunanqa qanchis altarkunata ruwachini, sapa uj altarmantaj uj waka uñatawan uj carnerotawan churachipuyki.

⁵Señortaj chay Balaampa siminman churarqa imatachus parlananta. Nerqataj: Kutispa Balacman nimuy, imatachus qanman niyki chayta.

⁶Balaamqa kutispa uywa wañuchisqa cantopi Balac sayashajta tariparqa, Moabmanta tukuy kuraj runastawan.

⁷Balaamtaj imachus kananmanta parlayta qallarerqa: Moab rey Balacqa, Arammanta pusachimuwan, inti llojsimuy orqosmanta, jamuspa israelitasta maldicipuway, Jacobpa miraynin runasta mana allinman churay, nispa.

⁸Ima nispataj maldicisaj pitachus Señor mana maldicinchu, chaytari? Ima nispataj chay runaspa mana allinninta ruwasajri; mayqenkunapajchus Señorqa ima sajratapis mana ruwanchu chaytari?

⁹Kay chhanka patamanta paykunata rikuni, kay orqo patamanta paykunata rikushani. Kay runasqa sapallanku tiyakunku, tukuy runasmanta waj jina runas kanku.

¹⁰Paykunaqa jallp'a t'iyu jina kanku. Pitaj paykunata yupayta atinmanri? Pitaj yachanman mashkhachus kasqankutari? Allin kanman kay cheqan runas jina wañunay, ajinamanta noqaj tukuyneyqa paykunajta jina kanman!

¹¹Balactaj Balaamman nerqa: Imatataj ruwashankiri? Noqaqa qanta pusachimorqayki enemigosniyta maldicenaykipaj, qanri paykunata bendicinki.

¹²Balaamtaj kuticherqa: Noqaqa nerqaykipuni, imatachus Señorqa simiyman churawan chayllata noqaqa parlasaj, nispa.

¹³Balactaj nillarqapuni: Kunanqa jaku wajnejmanñataj; chaymanta rikunki jaraspa cantollanta, mana tukuynin jarastachu. Chaymanta maldicepuwanki chay runasta.

¹⁴Jinamanta Balacqa Balaamta pusarqa Zofimman, Pisga orqo puntaman. Chaypi ruwachillarqataj qanchis altarkunata. Sapa uj altarmantaj uj waka uñatawan uj carnerotawan churarqa.

¹⁵Chaypi Balaamqa Balacman nerqa: Kay rikuchikuswan khuska, kayllapi qhepakuy, chaykamataj noqaqa Dioswan parlamusaj, nispa.

¹⁶Señorqa Balaamman rikhurerqa, siminmantaj imatachus parlananta churarqa, nerqataj: Kunanqa kutispa Balacman willamuy, imatachus nisusqayta.

¹⁷Balaamqa kutispa tariparqa Balac tukuy kuraj runasninwan khuska uywa wañuchisqa cantopi sayashajta. Balactaj payta taporqa: Señorqa ima nisunkitajri?, nispa.

¹⁸Balaamtaj imachus kananmanta parlayta qallarerqa: Ziporpa wawan Balac, uyariway sumajta.

¹⁹Diosqa mana wañojkuna jinachu, mana llullakunchu, nitaj imatachus nisqantapis q'ewichinchu. Imatachus nisqanta payqa junt'an. Imatachus nisqantapis payqa qompuni.

²⁰Diosqa noqata kamachiwan bendicinayta. Sichus Dios bendicin chayqa, noqaqa mana imanaytapis atinichu.

²¹Ni pipis Israelpeqa ch'aukiyayta tarinchu, nitaj ima sajrata chay Jacobpa wawasnimpi. Señor Diosninkoqa paykunawan kashan, paykunaqa ninku Señorqa reyninku kasqanta.

²²Paykunata Diosqa Egiptomanta orqhomorqa; Diosqa manchay kallpayoj búfalo waka jina Israelpa ñaupaqempi.

²³Jacobpa contranta Israelitaspa contranta ima sajrata ruwaypis mana kanchu; layqeriosqa mana imananchu israelitastaqa. Israelitasmanqa kunan nina allin kashan: Mashkha imastataj Señorqa qampaj ruwarqa!

²⁴Kay runasqa uj león jina sayarinku, imaynatachus leonqa imatachus jap'isaj nisqanta mikhunankama paran, imatachus jap'isqasnimpa yawarninta ujyanankama paran, ajinata.

²⁵Chaymanta Balacqa Balaamman nerqa: Mana qanqa kay runasta maldiciyta atinkichu chayqa, chayrayku kunanqa ama bendiciychu.

²⁶Chaymanta Balaamqa kuticherqa: Manachu nerqaykiña, noqa ruwasaj imatachus Señor niwasqallanta?, nispa.

²⁷Balacqa nillarqataj: Jina kajtenqa, jaku wajmanñataj risunchej. Ichapis Diospajqa allillan kanman chayllamantapis israelitasta maldicipunawayki.

²⁸Ajinata Balacqa Balaamta Peor orqo puntaman pusarqa. Chaymanta tukuynin ch'in pampas rikukorqa.

²⁹Chaypi Balaamqa Balacman nerqa: Kaypi qanchis altarkunata ruwapuway, chaymantaj apamuy qanchis waka uñasta, qanchis carnerostawan.

³⁰Balactaj kikinta ruwarqs Balaampa nisqanman jina; sapa uj altarman uj waka uñatawan, uj carnerotawan churarqa.