Read Quechua Bolivia DC Bible NÚMEROS 27 Bible Online

NÚMEROS 27 - Quechua Bolivia DC Bible bible

NÚMEROS 27

¹Chayllaman qayllaykamorqanku phishqa warmis, paykuna karqanku Manasés ayllumanta Zelofehadpa wawasnin. Sutisninkutaj karqa Maala, Noa, Hogla, Milca, Tirsa ima. Tatanku Zelofehadqa karqa Heferpa wawan. Hefertaj karqa Galaadpa wawan. Galaadtaj karqa Maquirpa wawan. Maquirtaj karqa Manasespa wawan. Manasestaj karqa Josejta.

²Chay phishqa warmis qayllaykorqanku Dioswan tinkukuna toldo punkupi Moisesman, sacerdote Eleazarman, israelitasmanta tukuy kuraj runasmanwan, nerqankutaj:

³Tataykoqa ch'in pampapi wañorqa. Mana Corewan khuskachu karqa Señorpa contranta rimaspa, manachayqa pay kikimpa juchanrayku wañorqa. Chaywampis mana uj qhari wawata saqerqachu.

⁴Chaywampis mana allinchu kanman tataykoj sutin chinkapunanqa ayllun ukhumanta mana qhari wawan kasqanrayku. Noqaykumampis qowayku jallp'ata ari, tataykoj wauqesnimpa jallp'anku ukhupi.

⁵Moisesqa Señorman willarqa chay warmispa mañakusqankuta.

⁶Señortaj payman nerqa: Zelofehadpa wawasnenqa cheqanta parlanku. Qoy ari jallp'ata tatankoj wauqesnimpa jallp'anku ukhupi, tatankoj chayaqen jallp'aqa paykunaman chayachun.

⁸Chantapis israelitasman niy: Sichus mayqen wañupun mana qhari wawata saqespa chayqa, chay chayaqenta warmi wawan jap'ikapuchun.

⁹Sichus warmi wawampis mana kanchu chayqa, wauqesninman chay chayaqenta saqeponqa.

¹⁰Sichus wauqempis manallataj kanchu chayqa, chayaqenta tatampa wauqesninman saqeponqa.

¹¹Sichus tatampa wauqempis manallataj kanchu chayqa, chayaqenta saqeponqa mayqenchus manaraj karu ayllunchu kajman. Kay leyqa israelitaspaj churasqa kanqa ajinata ruwanankupaj, imaynatachus qanman kamachisusqayman jina, nispa.

¹²Señorqa Moisesman nerqa: Wichariy Abarim orqoman; chaymanta rikunki israelitasman qosqay jallp'asta.

¹³Chayta rikuytawantaj qanqa wañupunki, ñaupa tatasniykiwan tinkumunki, wauqeyki Aarón jina.

¹⁴Qankunaqa iskayniykichej sutiyta mana jatuncharqankichejchu kamachisqasniyta mana kasuwaspa israelitaspa ñaupaqempi, Zin ch'in pampapi yakuta mañakuspa contrayta rimashajtinku. Kay yakoqa Meriba nisqa cheqapi karqa Zin ch'in pampapi.

¹⁵Moisestaj Señorman nerqa: Señor Diosníy, tukuyman kausayta qoj Dios, uj runata paykunallamantataj ajllaspa churay ari, paykunaj ñaupaqenta rispa pusanampaj maymanchá rishanku chayman, ama qhatirpayasqa ovejas jina mana michejniyoj purinankupaj.

¹⁸Señortaj Moisesman kuticherqa: Numpa wawan Josueta ajllay, payqa sumaj k'acha yuyayniyoj runa; paypa patanman makisniykita churay.

¹⁹Jinaspataj sacerdote Eleazarpa ñaupaqenman pusay, tukuy israelitaspa ñaupaqenman. Paykuna rikushajtinkutaj payta sayachiy cuentaykimanta.

²⁰Qan payman sumajta kamachiy, tukuy israelitas payta kasunankupaj qanta jina.

²¹Josuetaj Eleazar sacerdoteman qayllachun. Sacerdote Eleazartaj Urim nisqa suerteta qhawananejta noqata tapuwanqa. Jinamanta Josueqa israelitasta kamachenqa paykuna imatapis ruwanankupaj.

²²Moisestaj kikinta ruwarqa imaynatachus Señorpa kamachisqanman jina. Josueta pusarikuspa sacerdote Eleazarman rerqa, jinallataj runaspa ñaupaqenmampis.

²³Chaypi paypa patanman makisninta churarqa israelitaspa kamachejnin kanampaj paypa cuentanmanta, Señorqa Moisesnejta nisqanman jina.