Read Quechua Bolivia DC Bible NÚMEROS 32 Bible Online

NÚMEROS 32 - Quechua Bolivia DC Bible bible

NÚMEROS 32

¹Rubén ayllojta, Gad ayllojtawan ashkha uywasninku karqa. Chayrayku Jazer jallp'aswan, Galaad jallp'aswan uywasta mirachinapaj sumaj kasqanta reparaspa, Gadpa mirayninwan, Rubempa mirayninwan ima Moisesman, sacerdote Eleazarman, israelitaspa kurajkunasninkumanwan qayllaykorqanku, nerqankutaj:

³Jallp'asqa: Atarot, Dibón, Jazer, Nimra, Hesbón, Eleale, Sebam, Nebo, Beón ima, israelitaspa ñaupaqempi Señorpa qhechusqan jallp'as, uywasta mirachinapaj sumaj jallp'as, kay kamachisniykichejpatataj ashkha uywasniyku tiyapuwayku.

⁵Sichus qankunaman allin rijch'asunkichej chayqa, noqaykuman chay jallp'asta qowayku. Amaña Jordán mayuta chimpachiwaykuchu ari.

⁶Moisestaj chayta uyarispa paykunaman nerqa: Qankunaqa kayllapiñachu qhepakuyta munankichej, wauqesniykichej maqanakoj rinankukama?

⁷Imaraykutaj israelitasta iskayrayachiyta munankichej, ima jallp'atachus Señor qosorqachej chayman chayaytari?

⁸Tatasniykichejpis kikillantataj ruwarqanku Cades-barneamanta chay jallp'asta qhawamojta kachashajtiy.

⁹Paykuna chayarqanku Escol wayq'okama. Chaymantataj chay jallp'asta qhawaraspa kutimorqanku. Chayamuspataj israelitasta iskayrayacherqanku ima jallp'atachus Señor paykunaman qorqa chayman ama yaykunankupaj.

¹⁰Chayrayku Señorqa chay día maytapuni phiñakorqa, juraspataj nerqa, Egiptomanta llojsimojkunamanta iskay chunka tawayojmanta pataman yupasqasmanta kajkunamanta, chay jallp'ata mana rikunankuta, mayqentachus Abrahamman, Isaacman, Jacobman ima qonayta nerqani chayman, ñaupaqeypi mana allinta purisqankurayku.

¹²Ceneseo Jefonej wawan Calebwan, Numpa wawan Josuellawan Señorpa ñaupaqempi allinta purerqanku.

¹³Chaymanta Señorqa manchayta phiñakorqa, israelitasta ch'in pampaspi puricherqa tawa chunka watasta, tukuy rimajkuna wañuranankukama. Señorpa ñaupaqempi mana allinta ruwasqankurayku.

¹⁴Kunanqa qankunañataj, juchasapa tatasniykichej jina puriyta munashankichej, Señorta phiñachiyta munaspa israelitaspa contranta.

¹⁵Sichus qankuna mana ñaupajman riyta munankichej chayqa, israelitasqa unaytawanraj ch'in pampaspi qhepakonqanku. Qankuna juchayoj kankichej paykunañataj urmanankupaj, nispa.

¹⁶Paykunataj Moisesman qayllaykuspa nerqanku: Noqaykoqa munayku ovejasniykupaj, wakasniykupaj ima kanchasta ruwayta, llajtastataj familiasniykupaj.

¹⁷Chaymantataj, noqayku israelitaspa ñaupaqenta risqayku sumaj wakichisqas. Maynejpichus paykuna jallp'ata jap'ikonqanku, chayman chayanaykukama. Chaykamataj tukuy familiasniyku sumajta ruwasqasniyku llajtaspi sumaj waqaychasqas qhepakonqanku kay llajtayojkunamanta.

¹⁸Noqaykoqa kutimpusqayku maypachachus israelitas paykuna kikinkupaj jallp'ata jap'ikojtinkuraj.

¹⁹Chay jallp'asta noqayku jap'ikusqayku chayqa, manaña Jordán mayu chimpapi jallp'asta jap'ikusqaykuchu, nitaj aswan jaqaykunapipis jallp'ata mañakusqaykuñachu, kayllawanña qhepakusqayku, nispa.

²⁰Moisestaj kuticherqa: Sichus kay nisqaykichejta junt'ankichej, maqanakamunkichejtaj Señorpa nisqanman jina, tukuyniykichej qharis Jordán mayuta chimpankichej Señorpa nisqanman jina Señorqa tukuy enemigosniykichejta chinkachinankama chayqa, chay llajtasta qhechuspa atinkichej kutimpuyta. Chaywan qankunaqa Señorpa nisqanta junt'ankichej, jinallataj wauqesniykichej israelitaswampis. Jina kajtenqa, chaymanta kay jallp'asqa qankunajta kanqa Señorpa nisqanman jina.

²³Sichus mana ajinata nisqaykichejman jinachu ruwankichej chayqa, uj jatun juchata ruwankichej Señorpa contranta, Señorpa jasut'iynintaj ima ratollapis chayamusonqachej chay juchasniykichejrayku.

²⁴Kunanqa llajtasta familiasniykichejpaj ruwakuychej, kanchastapis uywasniykichejpaj, imastachus nisqaykichejtataj junt'aychejpuni, nispa.

²⁵Gadpa mirayninwan, Rubempa mirayninwantaj Moisesman kuticherqanku: Kay kamachisniykeqa imastachus kamachisqasniykita kikinta ruwasqayku.

²⁶Warmisniykuwan juch'uy wawasniykuwanqa, tukuy uywasniykuwan imaqa kay ruwasqayku Galaad llajtallapi qhepakonqanku.

²⁷Noqayku kamachisniykitaj tukuy maqanakupaj wakichisqas risqayku, Señorpa ñaupaqenta enemigoswan maqanakoj, qan kamachiwasqaykuman jina, nispa.

²⁸Chaymantaqa Moisés kamacherqa sacerdote Eleazarman, Numpa wawan Josueman, Israel tukuy ayllusmanta kurajkunaman ima, kay jinata:

²⁹Sichus Gad ayllumanta kajkuna, Rubén ayllumanta kajkuna ima, qankunawan khuska Jordán mayuta chimpanqanku enemigoswan maqanakoj Señorpa kamachisqanman jina, qankuna maypichus jallp'asta jap'ikunaykichejkama chayqa, qankuna qopunkichej kay Galaad jallp'asta paykuna tiyakunankupaj.

³⁰Sichus mana qankunawan khuska Jordán mayuta enemigoswan maqanakoj chimpanqanku chayqa, qankunawan khuska Canaampi jallp'ata jap'ikonqanku.

³¹Gad ayllumanta kajkuna, Rubén ayllumanta kajkunawantaj kuticherqanku: Gay kamachisniykichejqa imatachus Señor kamachiwasqaykuman jina ruwasqayku.

³²Canaanman chimpasqayku Señorpa kamachiwasqaykuman jina, chayaqeyku jallp'ata jap'ikusqayku Jordán mayoj inti llojsimuynimpi, nispa.

³³Ajinamanta Moisesqa qorqa jallp'asta Gad aylluman, Rubén aylluman, Manasespa khuskan ayllunmanwan. Chay jallp'asqa karqa Sehompata amorreo reypata, Ogpata, Basán reypata. Jinata paykunaqa jap'ikaporqanku llajtasnintinta, chay muyuynimpi kaj jallp'asnintinta.

³⁴Gad ayllumanta kajkunaqa watejmanta sayaricherqankupacha llajtasta: Dibonta, Atarotta, Aroerta, Atarot-sofanta, Jazerta, Jogbehata, Bet-nimrata, Bet-arantawan. Sumajta perqaswan muyuykucherqanku, jinallataj kanchastapis ovejasninkupaj ruwarqanku.

³⁷Rubén ayllumanta kajkunapis kikinta llajtasta sayaricherqanku: Hesbonta, Elealeta, Quiriataimta, Nebota, Baal-meonta, Sibmatawan. Wakin llajtasta watejmanta ruwasqasninkuta waj sutiswan suticharqanku.

³⁹Manasespa Maquirpa miraynin, Galaad jallp'ata qhechumorqanku, chaypi tiyakoj tukuy amorreosta qharqospa.

⁴⁰Chaymanta Moisesqa Maquirpa mirayninman chay jallp'asta qoporqa. Ajinamanta paykunaqa Galaad jallp'aspi tiyakorqanku.

⁴¹Manasespa wawan Jairpis wakin ranchosta amorreosmanta qhechullarqataj, suticharqataj chay cheqasta, Havot-jairta.

⁴²Jinallataj Nobapis Kenat llajtata tukuy ranchosnintinta qhechuspa jap'ikaporqa. Chay jallp'astataj suticharqa Nobata kikin paypa sutillanwantaj.