Read Quechua Bolivia DC Bible NÚMEROS 35 Bible Online

NÚMEROS 35 - Quechua Bolivia DC Bible bible

NÚMEROS 35

¹Señorqa Moab pampaspi Moisesman parlarqa Jordán mayu cantopi, Jericó llajtaj chimpampi, kay jinata: Israelitasta sumajta kamachiy, paykuna levitasman llajtasta qochunku tiyakunankupaj maykunapichus israelitas jallp'asta jap'ikunku chaymanta. Jinallataj chay llajtaspa muyuynimpi uywasta michina pastosta.

³Levitasqa chay llajtaspi tiyakonqanku, chay canto pastospi uywasninkuta michinankupaj, jinallataj jatun uywasninkutapis.

⁴Chay uywasta michina llajtaj muyuynimpi kanqa perqamanta jawapi tawa pachaj phishqa chunkayoj metrosninkama.

⁵Chay jallp'asqa puraj cantonman chhikachajkama kanqanku isq'on pachaj metroskama inti llojsimuyman, inti yaykuyman, pataman, uraman ima, llajta cantón muyurisqa.

⁶Levitasman qosqaykichej chay llajtasmantaqa sojta llajtas pakakunapaj kanqanku. Pichus runa masinta wañuchejqa chay llajtaman ayqekonqa. Chay sojta llajtas jawaqa, waj tawa chunka iskayniyoj llajtastawan qonkichej.

⁷Tukuynimpi levitasmanqa qonkichej tawa chunka pusajniyoj llajtasta, uywasninkuta michinanku pastosnintinta.

⁸Chay llajtasta qonkichej sapa Israel ayllumanta chayaqe jallp'asninkumanta levitasman imaynachus kasqanman jina. Jatun jallp'ata jap'ejqa jatunta qonqa, pisi jallp'ata jap'ejqa pisillatataj qonqa.

⁹Señorqa Moisesman parlarqa: Kayta niy israelitasman: Maypachachus Jordán mayuta chimpankichej Canaán jallp'aman yaykunaykichejpaj chayqa, wakin llajtasta ajllankichej pakakuna llajta kanampaj, chaypi mayqen runapis pakakunampaj, waj runata mana wañuchiyta munaspachu wañuchisqanmanta.

¹²Chaypi chay runa pakakonqa, chay wañojpa ayllun ama wañuchinallampajtaj. Ajinamanta payqa mana wañonqachu tukuy runaspa ñaupaqempi justiciawan cheqanchasqa kanankama.

¹³Llajtasta qosqaykichejmantaqa sojta llajtas qhepakonqanku pakakunapaj:

¹⁴Kinsa llajtas Jordampa inti llojsimuynimpi, kinsataj Canaampi.

¹⁵Chay sojta llajtas pakakunapaj kanqanku, chayri chayman pakakonqanku israelitas jinallataj karu llajtayojkunapis, chaypi tiyakojkuna, chayri chayninta pasashajkunapis. Chaypi pakakonqanku pikunachus runa masinkuta mana wañuchiyta munaspa wañuchinku chaykunalla.

¹⁶Sichus pipis runa masinta ima fierrowan maqaykun, chanta chay maqasqa runa wañupuntaj chayqa, chay runaqa runa wañuchipaj qhawasqa kanqa. Chayrayku paypis wañuchisqallataj kanqa.

¹⁷Sichus pipis runa masinta rumiwan ch'anqaykun, jinamanta chay ch'anqasqa runa wañupun chayqa, chay runaqa runa wañuchipaj qhawasqa kanqa. Chayrayku paypis wañuchisqallataj kanqa.

¹⁸Sichus pipis uj runata k'aspiwan wajtaspa nanaykuchin, jinamanta chay wajtasqa runa wañupun chayqa, chay runaqa runa wañuchipaj qhawasqa kanqa. Chayrayku paypis wañuchisqallataj kanqa.

¹⁹Chay wañusqa runaj aswan qaylla kaj ayllun chay runa wañuchejta taripaytawan wañuchinan tiyan.

²⁰Sichus pipis runa masinta chejnikuspa mayman tanqaykun, chayri imawan ch'anqaykun wañuchiyta munaspa chayqa, chayri chejnikuspa makinwan maqaykojtin wañupun chay runa, chaypis, chay runaqa wañuchisqallataj kanqa. Chantaqa wañuchenqa chay wañusqa runaj aswan qaylla kaj ayllun mask'ajpis taripaytawan wañuchenqa.

²²Sichus pipis mana chejnikuspalla maymampis tanqaykun, chayri imawampis ch'anqaykun mana wañuchiyta munaspalla, chayri mana rikuspalla patanmanta rumiwan kachaykun, jinamanta chay runa wañupun chayqa, chay jinata ruwajqa mana enemigon kaspa, nitaj wañuchiyta munaspa, tukuy runas justiciawan cheqanchanqanku. Jark'anqankutaj chay wañusqa runaj ayllusnin wañuchinankumanta kay kamachiykunaman jina.

²⁵Jinamanta jark'anqanku wañojpa aswan qaylla kaj ayllun aynita junt'aspa wañuchinanmanta. Paytataj kutichenqanku pakakuna llajtaman, mayqentachus pakakunapaj mask'arqa chayman. Chaypi chay runaqa pakakonqa, aceitewan jawispa ajllasqa jatun kaj sacerdote wañupunankama.

²⁶Sichus chay runa chay llajta ukhumanta llojsin, chay wañuchisqa runaj ayllun, mayllapipis taripaytawan wañuchin chayqa, chay wañuchej runa mana juchayojchu kanqa.

²⁸Chayrayku chay runa chay pakakuna llajtamanta mana llojsinanchu tiyan, chay jatun kaj sacerdote wañupunankama. Aswan qhepataqa atillanqa llajtanman ripuyta.

²⁹Chay leyqa qankunapaj kanqa, tukuy mirayniykichejpajwan, mayllapipis tiyakusqaykichejpi.

³⁰Mayllapipis runata wañuchejqa, iskay rikojkuna kajtintaj paypis wañuchisqallataj kanqa. Ujlla rikoj kajtintaj ni pipis payta wañuchiyta atenqachu.

³¹Pichus runata wañuchejqa mana qolqeta qoyta atinchu, ama paypis wañuchisqallataj kanampaj, manachayqa chay jina runaqa wañuchisqapuni kanan tiyan.

³²Pakakuna llajtaman ayqejmantapis manallataj qolqeta jap'inaykichejchu tiyan, wasinman ripunampaj qolqeta qoyta munajtenqa. Chay runaqa kikimpi kanan tiyan jatun kaj sacerdote wañupunankama.

³³Amapuni runataqa wañuchinkichejchu, maypichus tiyakunkichej chay jallp'aspi. Runa wañuchiy chay jallp'asta ch'ichichanman. Chaymantaqa manaña waj imata qona atikunchu. Manachayqa jinata ruwaj runaqa yawarninwan junt'anan tiyan.

³⁴Ama ch'ichichankichejchu maypichus tiyakunkichej chay jallp'ataqa; noqapis tiyakuni chayllapitaj. Noqa Señor, israelitaswan khuska tiyakusqayrayku.