Read Quechua Bolivia DC Bible NÚMEROS 5 Bible Online

NÚMEROS 5 - Quechua Bolivia DC Bible bible

NÚMEROS 5

¹Señorqa Moisesman nerqa: Qan israelitasta kamachiy, tukuy lepra onqoyniyojkunamanta pikunajtachus mujun llojsipullampuni chaykunata, wañusqasta llujchejkunatapis jarasninku ukhumanta jawaman orqhonankuta.

³Chaykunata jawaman orqhochunku qharispis warmispis kachunku. Ajinamanta jaraqa llimphupaj qhawasqa kanqa imaraykuchus noqa paykunaj chaupinkupi kashani.

⁴Israelitasqa kasorqanku imatachus Señorqa Moisesman kamachisqanta, jaramanta chay jina onqoyniyoj runasta orqhospa.

⁵Señorqa Moisesman kamacherqa kay jinata: Niy israelitasman: pi qharipis, chayri warmipis ima sajra juchata Señorpa contrampi ruwaspa, chaywantaj waj runata mana allimpi rikhurichispaqa Diosman kutirichun.

⁷Chantapis chay runamanqa kikillantataj kutichipunan tiyan, chaymantaj yapapunan tiyan phishqamanta ujnin kajtawan, pejpa contrampichus juchallikusqanmanta.

⁸Sichus chay mana allimpi rikhurichisqa runa wañupunña, nitaj ima ayllumpis kanchu, chayllamampis qopunampaj chayqa, imatachus qonan kajqa Señorpaj kanqa sacerdotej allinnimpaj. Uj carnerotawan qonan tiyan sacerdote, chayta Señorman jaywanampaj, chay runa juchasninmanta perdonasqa kanampaj.

⁹Ima ramastachus, ofrendastawan israelitas Señorman qonankupaj t'aqanku, apankutaj sacerdotej ñaupaqenman, chaykunaqa sacerdotepaj kanqa.

¹⁰Imastachus sacerdoteman apanku, Señorman qonankupaj chaykunaqa, sacerdotellapajpuni kanqa.

¹¹Señorqa Moisesman kamacherqa; israelitasman kay jinata ninanta: Sichus uj warmeqa qosanta wasanchaspa waj qhariwantaj qhenchachakunman, chay jinata qhenchachakunman qosampa mana yachashasqallan, chay jinata ruwashaspapis mana sut'inchakunchu pakaypi ruwasqanrayku, mana qosan kikin imatachus ruwashajta jap'inchu, qosantaj mayta tumpanqa chay warminta; chayri qhasi mana kajllamanta warminta tumpanqa mana imata ruwashajtillan chayqa, mayqen kajllamantapis, warminta sacerdoteman pusanqa. Chaypitaj warmimpa cuentanmanta sumajnin kaj grano jak'u ofrendata iskay kilota jina qonqa. Chay jak'umantaj ama aceiteta jich'anqachu, imaraykuchus chay ofrendaqa tumpasqanmanta, juchantataj sut'inchanampaj.

¹⁶Sacerdoteqa chay warmita Señorman qayllachenqa.

¹⁷Chaymantataj Señorpaj nisqa yakumanta uj chhikata uj t'uru yuruwan wisenqa, chay yakumantaj jich'aykonqa Dioswan tinkukuna toldo ukhumanta uj chhika jallp'ata oqharispa.

¹⁸Warmitataj Señorpa ñaupaqenman sayachenqa, chaypitaj q'ara umachenqa, makinwantaj jap'ichenqa, juchata sut'inchanampaj apamusqa tumpanakuy ofrendata. Sacerdotetaj jap'enqa chay maldicionta apamoj jaya yakuta.

¹⁹Chaymantaqa warmita jurachenqa, nispa: Sichus mana waj qhariwan qhenchachakorqankichu, manataj qosaykita wasancharqankichu, nitaj ima qhariwampis ch'ichichakorqankichu chayqa, kay maldicionta apamoj jaya yakuta ujyajtiyki ama imapis qampi kachunchu.

²⁰Sitajchus qan qosaykita wasancharqanki, waj qhariwantaj qhenchachakusqaykirayku, chay jinamanta ch'ichichachikunki chayqa, Señor rikuchichun qannejta maldicionninta runaspa ñaupaqempi. Jinamanta wijsallikunki, nitaj wawayojchu kanki qanqa.

²²Chay jasut'eyqa jamusuchun maldicionta apamoj yakuta ujyajtiyki. Chaymantataj warmi kutichenqa: Ajina kachun, nispa.

²³Sacerdotetaj chay maldicionta uj libroman qelqanqa, chay jaya yakuwantaj mayllanqa.

²⁴Chay warmeqa ujyanqa; chay yakutaj ukhumpi jayachenqa.

²⁵Sacerdotej warminmanta tumpanakuy ofrendata jap'enqa, chayta Señorman jaywamunampaj; chaymantataj altar pataman churanqa.

²⁶Chaymantataj jak'uta ofrendamanta orqhonqa, altar patapitaj chay warmej sutimpi ruphachimonqa. Kutimuspataj sacerdoteqa chay maldicionta apamoj jaya yakuta chay warmiman ujyachenqa.

²⁷Sichus chay warmi cheqamantapuni qosanta wasancharqa chayqa, chay maldicionta apamoj yakoqa wijsampi millayta jayayanqa. Wijsan punkenqa nitaj wawayojchu kanqa. Jinamanta chay warmeqa tukuy yachanampaj maldicisqa kanqa ayllusnin ukhupi.

²⁸Chantá, sichus chay warmeqa mana qosanta wasanchanchu chayqa, chay warmipaj mana imapis kanqachu, astawanqa wawasniyoj kanqa.

²⁹Kay ley tumpanakuymanta, warmi qosanta wasanchasqanmanta, qhenchachakusqanmanta, chayri, sichus qosan warminta waj qharitawan qhasillamanta tumpasqanmantawan. Qhareqa warminta Señorman pusachun, chaypitaj sacerdoteqa cheqanchanqa chay leyman jina.

³¹Jinamanta qhareqa mana juchayojchu kanqa, warmitajri, juchachakun chayqa jasut'isqa kanqa.