Read Quechua Bolivia DC Bible MIQUEAS 6 Bible Online

MIQUEAS 6 - Quechua Bolivia DC Bible bible

MIQUEAS 6

¹Kunan uyariychej qankuna Señorpa nisqanta: Sayarikuy, rikuchiytaj chay phiñanakusqaykita montespa ñaupaqempi, orqospis uyarichunku parlasqaykita!

²Uyariychej qankuna, orqos, jinataj jallp'aj sinch'i rumisnimpis: Señor renqa llajtampa contrampi cuentata mañaj; uj phiñanakuymantaj yaykonqa Israel ayllumpa contrampi.

³Kayta nin Señorqa: Kutichiway ayllúy, imanarqaykitaj, chayri imapitaj phiñacherqaykiri?

⁴Noqa Egiptomanta orqhorqayki, kamachi kashajtiyki librarqayki; Moisesta, Aaronta, Mariatapis kachamorqayki pusanasuypaj.

⁵Munasqa ayllúy, yuyarikuy kunan Moabmanta rey Balacpa wakichikusqanta, Beorpa wawan Balaampajman kutichisqantataj. Yuyarikuy, Sitinmanta Gilgalman pasasqaykita. jinataj rejsiy Señorpa atipachisqasninta.

⁶Imawantaj chimpaykuyman yupaychaj janaj pacha Dios Señorniymanri? Payman chimpaykuymanchu uj watayoj waka uñawan ruphachina rikuchikuta jaywanaypaj?

⁷Kusikunmanchu Señor, waranqa corderoswan chayri chunka waranqa aceite mayuswampis chimpajtiy? Kusikunmanchu, kuraj kaj qhari wawaytapis jaywajtiy, sajra kayniymanta jinataj juchaymanta paganaypaj?

⁸Ña nisunkiña, Señor, ya runa yachankichu, imapichus allin kaj ruway kasqanta, chaytataj qanmanta Payqa munan ruwanaykita: Cheqan kaj ruwayta, fiel kayta, mana qonqakapoj kayta, tukuy llamp'u sonqo kaywantaj Diosniykita kasunaykita.

⁹Señor wajyashan llajtata, allin ruwaytaj kanman atencionwan uyareyqa: Uyariychej, ayllumanta kajkuna jinataj llajtata umachajkunapis:

¹⁰Juchasapaj wasimpeqa kanku; sajra sonqowan tantasqa qhapaj kaykunas, chejnikuni chay faltaj pesaskunasta.

¹¹Imaynatataj perdonayman faltaj balanzasta, faltaj pesanasta jap'ejkunata?

¹²Kay llajtamanta qhapaj kajkuna tukuyninku kaypi tiyakojkunamantaqa; ñak'arichejkuna kanku, llullas, ch'aukeyajkunataj kanku.

¹³Chayrayku jasut'isqayki, phirisqaykitaj juchasniykirayku.

¹⁴Mikhuspapis mana sajsakunkichu, yarqhayllawampuni ñak'arinki; cosechasta oqharinki, chaywampis manataj ni imata salvayta atinkichu, imata salvawaj chaypis maqanakupi phirikunanta nisaj.

¹⁵Tarpunki chaypis manataj cosechata orqharinkichu; aceitunasta kutaspapis, manataj aceitenta oqharinkichu; uvasta saruspapis manataj vinotaqa ujyankichu;

¹⁶imaraykuchus qhaterqanki Omri jinataj Acabpa ayllumpa kamachisqasninta chantá ruwasqasninkutapis, imaynatachus paykuna ruwarqanku ajinallataj qampis ruwarqanki. Chayraykumin noqa ruwasaj qanwan, chaypi tiyakojkunasniykiwantaj llakiyta asipayasunankuta, Aylluypa p'enqaynintaj pataykiman urmamonqa.