Read Quechua Bolivia DC Bible MIQUEAS 7 Bible Online

MIQUEAS 7 - Quechua Bolivia DC Bible bible

MIQUEAS 7

¹Ay, noqamanta! Cosechaj qhepampi uj chajmakoj jina kashani, manañataj tarinchu uvas nitaj higospis chay poqoykunata mikhuyta munasharqa chayqa.

²Kay pachapi manaña kanchu cheqan runas nitaj Diosman sinch'ita sayaj kajkunapis; tukuy suyashanku wañuchillaytaña, chay hora chayamunallanta ruwanankupaj; ujkuna ujkunataj misk'achinakunku.

³Juchata ruwanapajqa maestros kanku, chay kurajkunapis t'inkasta apamunankuta kamachinku, juezkunasri wajkunawan rantichikunku, atiyniyoj kajkunataj munasqankuman jina ruwaspa llajtata juchallichinku.

⁴Paykuna ukhumanta allimpaj qhawasqa kajqa uj khiska jinamin; aswan honrado kajpis uj itapallu jina. Jinapis jamun uj p'unchay chayman jina jasut'isqas kananku, chay qhawaj chayta nerqaña jamunanta chay p'unchay. Chaypacha paykuna ukhupi q'ala ch'ipanaku kanqa.

⁵Ama creeychu runa masiykej nisqampi, nitaj ni mayqen kausaqeykipipis confiakuychu; warmiykiwan imatachus parlanaykitapis allintaraj umacharikuy;

⁶imaraykuchus qhari wawaspis mana honrankuchu tatasninkuta, warmi wawasninkupis mamasnikoj contranta oqharikunku, ñojch'asninkupis, suegrasninkoj contrampi sapa ujninkoj enemigosninkoqa ayllusnillankullamantaraj rikhurinku.

⁷Jinapis noqaqa Señorllapi suyasaj, payllapitaj confiakusaj salvawajniy Diospi, imaraykuchus Pay uyariwanqa.

⁸Qan contray kaj nación, ama kusikuychu kay mana allin qhatiriwasqanmanta, urmarqani chaypis sayarikullasajtaj laqhayaypis muyuykuwachun, Señorllamin k'anchayneyqa.

⁹Señorpa contrampi juchallikuni, chayrayku phiñakuyninta ñak'arillasaj; chaykamaqa. Pay justiciata ruwawanqa juchayoj kasqaymantaqa. Señor pusawanqa k'anchayman rikuchiwanqataj atipayninta.

¹⁰Chay chejnikuwajniypis rikullanqataj, chaytaj p'enqaywan junt'aykuchenqa. Payqa niwaj: Maypitaj Señor Diosniyki kashan?, nispa. Jinapis kunanqa kusisqa kani rikuspa callespi t'uruta jina sarusqata.

¹¹Jerusalén, ña jamushanñamin chay p'unchay maypachachus perqasniyki watejmanta ruwasqa kananqa jinataj jallp'aykej cantosnimpis astawan suchurisqa kananqa.

¹²Jamushanña chay p'unchay, maypachachus tukuynejmanta Asiriamanta Egiptokama qanman chimpaykamunanku. Chantá, Nilo mayumanta Éufrates mayukama uj mama qochamanta waj mama qochakama, uj orqomanta waj orqokama.

¹³Kay pacha jallp'aqa ch'in pampaman tukuhisqa kanqa chaypi tiyakojkunaspa juchasninkurayku tukuy sajra kajta ruwasqankuman jinataj.

¹⁴Señor, waqaychay Israel aylluykita, qampata kaj ovejasniykita, imaraykuchus sapallanku sach'as ukhupi kashanku, chay muyuyninkupitaj poqoj jallp'as karishanku! Ñaupa tiempospi jina apay chay Basán jinataj Galaad pastosman.

¹⁵May t'ukuna imasta rikuchiy Egiptomanta orqhomushaspa rikucherqanki ajinata.

¹⁶Waj nacionmanta kajkunapis rikullachunkutaj atiyniyoj kashaspapis p'enqaypi rikhurinankupaj! Opas, jinataj joq'aras qhepakuchunku!

¹⁷Jallp'ata llajwachunku kataris jina chay uj qhatatikojkuna khurus jinataj! Thapasninkumanta kharkatishaj llojsichunku. Manchachikuywan chimpamuchunku qan Señor Diosman!

¹⁸Mana waj qan jina Diosqa kanchu, imaraykuchus qanqa juchasninkumanta perdonanki, qonqapunkitaj kay uj chhika puchoj aylluykej juchasninmanta. Qanqa munakuyniykita rikuchiwayku, manataj wiñaypajchu phiñakunki.

¹⁹Ujtawan khuyarikullaytaj noqaykumanta, juchasniykutataj p'ampaykapuy. Mama qochaj ukhunman juchasniykuta wijch'uykapuy.

²⁰Señor, waqaychallaypuni noqaykuwan kasqaykita munakuyniykitapis, ñaupa tatasniyku Abrahamman Jacobmantaj ñaupa wataspi prometerqanki chayta!