Read Quechua Bolivia DC Bible NAHÚM 1 Bible Online

NAHÚM 1 - Quechua Bolivia DC Bible bible

NAHÚM 1

¹Kaymin chay Nínive llajtaman apachisqa willayqa. Elcosmanta Nahumpa mosqoypi jina rikusqanmanta willay libro.

²Señorqa, celosakuyta vengakuytataj yachaj Diosmin; Payman sayaykojkunamanta vengakunmin, enemigosnimpajpis phiñakullantaj.

³Señorqa llamp'u sonqo jinapis may atiyniyoj, chayrayku juchallejkunataqa jasut'enqapuni. Sinch'i loco para kajtimpis Señorqa purillan, phuyuspis chakisnimpeqa jallp'a jinalla.

⁴Payqa manchachin mar qochatapis chantá ch'akirparichintaj. Ch'akichillantaj mayuspi yakustapis. Basampa camposninmanta Carmelo orqosninmantapis qhorasnin qawipunku, Líbanoj t'ikasnimpis qawipullantaj.

⁵Paypa ñaupaqempeqa orqos kharkatirinku, chay lomaspis unuyallankutaj ñaupaqempeqa. Tukuy jallp'antin kharkatirin Payta qawaspaqa, kay pachapi tiyakojkunapis kharkatitillankutaj.

⁶Phiñakuynimpiri, pitaj sayasqallapipuni kanmanri? Pitaj chay phiñakuyninta ñak'ariyta atinmanri? Sinch'i phiñakuynenqa nina jinapuni t'akarikamun, ñaupaqempeqa qaqaspis iskayman lajrarikunku.

⁷Señorqa may k'achamin, waqaychan Paypi confiajkunataqa, waqaychantaj Paypi confiakojkunataqa.

⁸Jinapis imaynatachus yaku junt'aykuspa q'alata apakapun ajinatamin tukuy Paywan churanakojkunataqa pichaponqa, may llakiykunaswan laqhayaylla qhatirenqa tukuy enemigosnintapis.

⁹Qankunarí imatataj yuyaycharikushankichej Señorpa contrampiri? Payqa tukuyninkuta tukuchenqa. Manamin pipis iskay kutita Paywan churanakunmanchu!

¹⁰Imaraykuchus uj chhari khiska jina uj ch'aki ichhu jinataj tukuynin ruphachisqas kanqanku.

¹¹Qanmantamin, Nínive, pichus Señorpa contrampi sajrata yuyaychakojqa llojserqa: Uj millayta umallichej runa.

¹²Chayraykumin Señorqa nin aylluntaqa: Chay asiriosqa may wapuspis chayri may ashkhaspis kachunku jinapis tukuynin phirisqas kanqanku, chantá kausayninkumanta pasakaponqankutaj. Noqa mayta ñak'aricherqayki, jinapis manaña astawan ñak'arichisqaykichu.

¹³Kay pataykipi kashan chay yugota q'alata t'unasaj cadenasniykitapis p'itiraj.

¹⁴Qanta Ninivemanta rey, Señor kamacherqa imaynachus kanaykita: Manaña sutiykita apajkuna ayllusniyki kanqañachu, lantiykej yupaychana wasintapis phirisaj jinataj lantisniykita, fierro surusqamanta kajkunatapis, chay kikimpitaj pampaykusqayki, imaraykuchus tukuypa millachikunan kanki.

¹⁵Qhawaychej, orqos patanejta jamushanña, sonqo tiyasqa kaymanta willayta pichus apamojqa. Fiestasniykita ruwarikuy Judá, junt'ay nisqasniykita. Manaña jayk'ajpis chay sajra runasqa junt'aykamusonqankuchu imaraykuchus tukuyninku chinkachisqasña kanku.