Read Quechua Bolivia DC Bible NAHÚM 2 Bible Online

NAHÚM 2 - Quechua Bolivia DC Bible bible

NAHÚM 2

¹Nínive chinkachisojqa contraykipiña jamushan, chay sinch'i wasi patasniykiman soldadosniykita churay. Allinta qhawakuy ñanta. Mat'ita espadaykita wataykukuy. Kallpaykita tantaykuy.

²Imaraykuchus Señorqa kausarichenqa Jacobpa runaykachananta jinataj Israelpa mayta runaykachanan kasqanta. Imaynatachus ñaupaj karqa manaraj kapuyninta qhechushajtinku, manaraj mana laqhesniyoj uvasta jina saqeshajtinku karqa ajinata.

³Maqanakojkunasnimpa espadasnenqa pukas kanku, p'achasninkupis pukasllataj kanku. Wakisqasña kashanku maqanakupaj Carrosnenqa ninaman rijch'akunku. Caballosninkoqa mana kakuyta atinkuñachu.

⁴Carrosninkoqa tukuy phiñakuywan callesnejta correykachanku, ujmanta uj ladomantaj imaynatachus k'anchanas ninawan jap'ichisqas kanku jinata, plazasnejta lliuj lliuj jina pasaykacharinku.

⁵Reyqa wajyan chay kamachejkunasninta, paykunataj chayman correj jina mayta takanakunku, jark'achinasnimpa perqasninman.

⁶Jinamanta mayoj pukusnin kicharikojtinkama, palacioqa uraman urmaykapun.

⁷Reinankuta waj jallp'aman wijch'umunku, chay warmi uywaqesnintaj payta khuskapayanku, uj paloma jina ayqospa, waqaspataj pechonkuta takakunku.

⁸Imaynatachus yaku jark'acha p'akikojtinkama yaku ayqen, jinatamin Nínive llajtapi tiyakojkunapis ayqenqanku. Suyaychej, kutimuychej nispa qhaparenqanku, pero ni pipis kutimonqachu.

⁹Suwaychej qolqenkuta, suwaychej qorinkuta. Nínivej qhapaj kaynenqa ashkha mana tukukuyniyoj kashan!

¹⁰Niniveqa q'ala phirisqa, ch'impacha, tukuy iman pampachasqa kashan. Mancharikuywan sonqosninkoqa p'akikushanña, moqosninkupis kharkatitishan. Tukuyninkoj kallpasninkupis manaña kanchu. Uyasninkupis manaña paykunapichu kanku; q'ellu q'ellullaña kanku.

¹¹Leompa jusk'umpi, imañataj qhepakunri? León uñaspa thapampipis imañataj qhepakunri? Chaypimin leonqa uñasnintin sumaj waqaychasqa qhepakoj, manataj pipis mancharichej jamojchu.

¹²Leonqa, aychata jap'imusqasninta rak'iraj león uñasman mamantinmantaj. Chay suwamusqasninwantaj jusk'unmanqa junt'achej.

¹³Tukuy Atiyniyoj Señor ujtawan nillantaj: Noqa contraykipi kashani: Maqanakupaj wakisqa carrosniykita ruphachisaj q'oshñimantaj tukuchisaj. León uñasniykita wañuchisaj, tukuchisajtaj jallp'aykipi tukuy suwanakuy kajta, manañataj willajkunasniykej parlasqasnin uyarikonqachu.