Read Quechua Bolivia DC Bible SOFONÍAS 3 Bible Online

SOFONÍAS 3 - Quechua Bolivia DC Bible bible

SOFONÍAS 3

¹Way qanmanta Jerusalén, mana kasukoj llajta, ch'ichichasqa, mana khuyakuyniyojtaj.

²Señorpa parlasqanta mana uyarerqachu, nitaj cheqanyachikuytapis munarqachu. Señorpi mana confiakorqachu, manataj payman qayllaykorqachu.

³Kamachejninkoqa qhapariykachaj leonkuna jina kanku. Juecesninkutaj, q'ayantimpaj ni uj tulluta puchuchej campo atojkunaman rijch'akunku.

⁴Profetasninkoqa sajra parlayniyoj kanku, Diospa contrampi sayarinkutaj, sacerdotesninkutaj llimphu kaj wasita ch'ichichanku, Señorpa kamachiyninkutapis p'akinku.

⁵Chay tukuywampis Señorqa llajtapi kashan. Allin kajtapuni payqa ruwan, manataj sajra kajtachu. Sapa paqarin cheqa kaj imasta wakichin, manataj pantanchu jayk'ajpis. Sajra runarí mana p'enqakuyllatapis yachanchu.

⁶Señorqa nin: Llajtasta t'unachini. Perqasniyoj wasisninkuta pampaman tukuchini. Callesninkutataj ch'impachata saqerparini, ni uj runapis purej kanchu chay callespi. Saqerasqa ch'usaj llajtasninkupeqa mana uj k'ata runallapis tiyakoj kanchu.

⁷Yuyarqani ajinamanta Jerusalén llajta manchachikunawanta. K'amisqaytataj jap'ikunanta, chay jinamanta noqa jasut'ejtiy ama aylluntin wañunampaj. Aswampis paykunaqa usqhaychakorqanku tukuy laya sajra ruwanasman.

⁸Chayrayku, qankuna suyariwaychej chay p'unchaykama maypachachus noqa sayarisaj contraykipi parlanaypaj. Noqa Señorqa kaytamin nini: Yuyaychakuni tantamuyta runasta, nacionesmanta reinosmantawan, phiñakuyniyta paykunaj patanman urmachinaypaj. May k'ajashaj phiñakuyta paykunaman rejsichinaypaj. Chaypachataj tukuynin jallp'a t'unasqa kanqa nina larwaj phiñakuyniyrayku.

⁹Chay p'unchay chayamojtin llimphuchasaj tukuy runaspa parlayninta, tukuyninku noqata qhaparikunawankupaj, tukuy runastaj noqata uj sonqolla sirvinawankupaj.

¹⁰Etiopiapi kaj mayusmanta aswan jaqaynejmantapacha, ch'eqerasqa runasniy, noqata yupaychajkuna jamonqanku ofrendasta apamuwaspa.

¹¹Munasqa runasníy, jaqay p'unchaykunapeqa, mana p'enqakunkichejñachu, ni mayqen sajra ruwasqaykichejmantapis, contraypi sayarejtiykichejpis. Chaypachaqa jatunyakojkunata, mana respetoyojkunata ima, qankuna chaupimanta wijch'usaj. Manataj jayk'ajpis ujtawan wapuykachankichejchu llimphu orqoypi.

¹²Noqa saqesaj qankuna ukhupi llamp'u sonqoyoj runasta, pisi kapuyniyoj runastapis. Paykunataj sutiypi confianzankuta churanqanku.

¹³Israel ayllumanta kausaypi qhepakojkuna imachus mana cheqa kajtaqa mana ruwanqankuchu, nitaj llullata parlanqankuchu, nitaj ch'aukiyaspa parlanqankuchu. Sumajta mikhurikonqanku, nitaj pimanta mancharikuspa samarikonqanku.

¹⁴Sión llajtayoj runas, takiychej! Israel ayllumanta kaj runas, kusiymanta qhapariychej! Jerusalempi tiyakoj runas, kusikuychej. Tukuy sonqoykichejwan kusikuychej!

¹⁵Señorqa qhechun contraykipi karqa chay juchachaytaqa. Contrarioyki karqanku chaykunatataj karunchan. Israelpa Señornenqa, Reynintaj qanwan khuska kashan. Mana ima sajrataqa manchachikunaykeqa kanqachu.

¹⁶Jaqay p'unchaypi Jerusalenta nenqanku: Sión, ama manchachikuychu, makisniykitaj ama llauchhuyachunkuchu!

¹⁷Señor Diosniykeqa qanwan khuskamin kashan. Atiyniyojmin payqa, salvasonqataj! Señortaj kusikonqa qanmanta. Munakuyninwan mosoj kausayta qosonqa. Fiestapi jina kusikuynimpi takenqa.

¹⁸Señorqa nin: Chay p'unchaykunapi noqa librasqayki llakichisoj imasmanta, ima p'enqay qampaj kanayajtimpis.

¹⁹Jaqay p'unchaypi noqa sayarisaj ñak'arichisunku chaykunaj contrampi. Chakinmanta onqosqa ovejata yanaparisaj. Chinkasqa kajtataj jap'ikapusaj tukuy jallp'api, mayqempichus qhesachasqa karqa chaykunapi honrasqa, alabasqataj kanampaj.

²⁰Jaqay p'unchaypi qankunataqa pusarimusqaykichej, tantaykusqaykichejtaj. Presochasqamanta kutirichimusqaykichej. Qosqaykichejtaj alabasqas honrasqastaj kanaykichejpaj kay pachapi tukuy llajtas ukhupi. Noqa Señor kayta nini.