Read Quechua Bolivia DC Bible HAGEO 1 Bible Online

HAGEO 1 - Quechua Bolivia DC Bible bible

HAGEO 1

¹Darío iskay wataña rey kashajtin, sojta kaj killamanta ñaupaj p'unchaypi, Señor parlarqa Hageo profetanejta Judapi kamachej Salatielpa wawan Zorobabelman, Josadacpa wawan Josueman ima, mayqenchus sacerdotespa kurajnin karqa.

²Tukuy Atiyniyoj Señorqa kay jinata profetanejta nin: Kay runakuna nishanku manaraj tiempochu kasqanta templota watejmanta noqapaj ruwanapajqa.

⁴Qankunaqa sumaj ruwasqa wasispi tiyakunaykichejpaj tiempo kashan. Kay wasiytaj chaykama thuñisqa kashan, icharí?

⁵Noqa, Tukuy Atiyniyoj Señormin niykichej: Allinta reparakuychej purisqaykichejta.

⁶Qankuna ashkhata tarpunkichej, pisitataj oqharinkichej. Mikhunkichej, manataj sajsakunkichejchu. Ujyankichej, chaywampis ch'akichikullankichejpuni. P'achata churakunkichej, manataj q'oñikunkichejchu. Jornal llank'ajtaj, pagonta jap'ispa jusk'u wayaqaman churaykun.

⁷Noqa, Tukuy Atiyniyoj Señormin niykichej: Allinta reparakuychej purisqaykichejta.

⁸Lomasman riychej k'aspista oqharimuychej, watejmantataj templota ruwaychej. Noqataj chaypi kusisqa kasaj. Gloriaytataj rikuchisaj.

⁹Qankuna ashkhata mask'ankichej, pisitataj tarinkichej. Wasisniykichejpi waqaychasniykichejtataj, ujta phukuspalla apakapusaj. Imarayku? Wasiy thuñisqa tarikusqanrayku, qankunataj wasisniykichej sumaj ruwasqa kanallanmanta yuyankichej. Noqa Señor chaytaqa nini.

¹⁰Chayrayku qankunapaj mana paramunchu, jallp'apis qankunapaj mana poqoyta qonchu.

¹¹Noqa mana parachimunichu pampasman, orqosmampis, trigoman, uvas chajraman, olivo tarpusqasman, pampapi poqojkunaman, runasman, animalesman, tukuy ima ruwasqasninkumampis.

¹²Zorobabel, Josué, jinallataj tukuy runakuna manchachikorqanku uyarispa Señorpa nisqanta paykunapaj, Hageo profetanejta. Chaytarí, Señor Dios, profetaman kamachisqa sut'inchanampaj.

¹³Chaypachataj Señorpa kachasqan Hageoqa, paykunaman parlarqa Diospa sutimpi kay jinata: Señorqa nin: Noqa kaspa cheqamanta niykichej: Noqa qankunawan kashani.

¹⁴Ajinata Señorqa sonqocharqa Zorobabelta, pay Judata kamachishajtin, ajinallataj sacerdotespa kurajnin Josuetapis, chay llajtapi kaj tukuynin runastawan. Chanta, Tukuy Atiyniyoj Señor Diosnimpaj templonta watejmanta ruwayta qallarerqanku, Darío iskay watataña rey kashajtin, sojta killamanta iskay chunka tawayoj kaj p'unchaypi.